Padang meng thun 2023 di labik ban palei 5, phuong Mũi Né, gilang hu ong Nguyễn Ngọc Ẩn – sa urang chreih takre kaya yao klak meng sit hu tapak pasang khik. Dalam mblang poraong labaih 2.500 m², labik parang hu rabha jeng dom sang kareik saong labik di langiu mblang.

Labik ini daok pataom khik labaih 50.000 angan baoh kaya kan, kaya jaman yao klak hu meng 1.500 thun dahlau Cong nguyen dui mai mbiah tal dahlau thun 1975. Dom kaya kan brei hu ramik dak tui dom kadha dalam nan hu: thaik cih, rup patau di dom urang cih thaik danei angan; ilamo Champa saong dom bangsa adei sa-ai; ilamo ngak lan, sứ tapa dom jaman; bruk duh paling mukkei; labik parang di langiu mblang yau kumo yao klak tapa dom jaman; parang thaik patau yao klak di agama, adat cambat di urang Yuen tapa dom jaman…Dalam nan, rilo kaya yao klak hu yaom glaong, brei mboh luac jalan patagok di dom ilamo klak yau Đông Sơn, Sa Huỳnh, Óc Eo, Khmer. Champa, jeng yau dom rai patai bia Viet Nam… Yaok ndap nda jeng hu langyah cambaih laih meng sap Viet Nam saong sap Anh, pagam tui thaik thaot, daong tuai damuai mbuan thau khau tin.

Khan dak dalikal brei ka hatai chreih takre pataom khik, ong Nguyễn Ngọc Ẩn brei thau: “Puac di dom thun 1980, tuk rilo kubo meng kal klak di Mũi Né njauk kol co klaik bleik cakac dalam malam, ong hu nao duah tal labik, likau veik dom asar pacah di pangin jaluk, lan am njauk klak gilac. Hadei di nan ba mai, hadar di ala takai phun li-u dalam bein piah baoh sang oh duh hatai. Rilo thun hadei, tuk cakac tagok, nyu jeng “gilang” kaya yao klak akaok meti di baoh sang ong.

Dalam “gilang” kaya kal yao klak blaoh ong Ẩn pataom khik saong khik ramik jaik 40 thun tapa, yaok kaya jeng khik sa asal kadha ka sajaraj, ilamo, roh duah hu makna.

Meng tuk hu peih gilang di thun 2023, Gilang kaya yao klak Mũi Né hu samar drah jeng sa labik mai rah rivang dui pachreih tuai damuai. Yaok harei, ong Ẩn jeng tapak hu mbaok piah langyah ka tuai rah rivang, rilo meng lac anek saih, sinh vien saong dom urang dam dara chreih takre sajarah. Dalam tuk bruk rah rivang hu salih karei biak chreih takre meng bruk rah rivang padeih padei tapa rah rivang ba drei tame duah thau ilamo, gilang khik drap ar. Oh mek jien rah rivang, gilac bhian pambuak haong dom labik pato magru, danak dak ilamo, gilang dak harei dak hu thau tal yau sa labik bac megru, roh duah hu angan je.

Labaih yaok hu 100.000 mbang tuai damuai dalam nagar jeng ye saong langiu negar hu mai tal gilang, dalam nan hu rilo kapul anek saih, sinh vien, urang roh duah ilamo, roh duah kaya kan jaman dahlau. Dom kadha ka bruk mai meng halei, ilamo ky thuat ngak, adat cambat… daong urang thau dalam jang ka dom yaom kaom meng kal dahlau.

Gilang kaya jaman yao klak Mũi Né oh lac sa janih labik pataom khik ndap nda blaoh nyu daok ieu lac labik brei khan kadha, dom kadha ka sajarah, ilamo, adat cambat, urang menuac…di bhum taneh Mraong Bhum kreih nagar. Ngan haong bruk buh abih hatai tian di urang padang tabiak, gilang ilamu jaman lama kan klak di ini daok dak harei dak daong pambuak meng kal saong urak ini, ngak jeng sa labik ilamo siam gheih saong biak chreih takre ka rhara bhap bini, ralo abih di nan ieu lac brei ka rairah urang daok sit thun umo./.