Harei Vu Lan hu meng dak dalikal agama Bhat di dalam agal Vu Lan bồn khan brei ka kadha tôn giả Mục Kiền Liên (Mogallana) daong amaik. Tui pato tacei di Po Bhat, dalam harei Po Rami bilan 7 Saka ia bulan, Mục Kiền Liên saong dalam kapul po acar hu gam haong gauk ngak adat duh paling, hu prein khang biak praong piah paklah ka amaik di ong truh tapa bruk kan kandah jhak bhut bhaong abilih wang, pahadiuk di lok siam. Pháp Vu lan bồn hadei di nan hu Po Bhat brei pandar praong piah daong rahra.

Asal kadha ka halau agha harei Vu Lan nan hu lac brei bayar phol dhar saong makna klak tapa duas urang lahik dalam harei Po Rami bilan 7. Adat Vu Lan oh lac bingun harei piah anek taco brei mboh hatai thau dhar phol saong hu phol dhar tal amaik ame mukei tuk daok diuk lac kein lagaih piah pahadar, likau phol ka dom urang but pajaih plang lahik.

Dalam bingun harei ini, urang tui agama Bhat bhian ngak adat palingyang, palao anek athur, ngak pahla piah pataom phol dhar brei ka amaik ame. Dom danak dak ini oh lac ba mai kein lagaih agama blaoh nyu daok brei mboh cambaih laih bruk siam mekre, gheih ghang saong hatai anit ranam di menuac urang.

Sa di dalam dom thaik thaot karei harei adat Vu Lan di Viet Nam ieu lac bangu rose cuak tame ao / ye Yuan lac bông hồng cài áo. Urang hu mbaok tame adat Vu Lan cuk pagam tame rup drei sa bangu rose bhong meraih meyah amaik ame daok diuk, atau bangu rose mbong patih meyah amaik ame plang lahik paje. Bruk ini oh lac bruk piah brei ka mboh blaoh daok lac sa bruk kakei ka yaok urang ka hatai anit ranam saong bruk ngak di drei brei ka amaik ame.

Vu lan daok lac bingun harei brei piah grauk urang maong ieik gilac veik rup drei, daok dang tani tanat gilac saong sahaneng ka adat ngak menuac urang. Tapa dom bruk anek bik thau pang, anek bik daok bac hu bruk bayar phol dhar, daok dang thau ka bruk di drei saong anit ranam gauk jang.

Harei Vu Lan bayar phol ieu lac sa adat cambat di bhap bini hu angan praong di dalam ilamo saong adat cambat di agama Bhat. Meng halau agha pagam haong kadha brei ka hatai thau phol thau dhar di Mục Kiền Liên, adat Vu Lan hu pambak praong saong jeng sa banah oh kurang hu di dalam raidiuk manuac urang Viet Nam. Nan lac bingun piah ka taong abih urang, yaom lac di thun umo halei, jeng gam saong gauk pahadar saong brei mboh bruk hu thau dhar phol amaik ame, daong khik ramik saong patagok ilamo saong yaom kaom siam mekre di rahra bhap bini./.