Sang baha Mot Cot daok dalam mblang bein bangu Gilang khik drap ar Ho Chi Minh, taphia Mblang bein Ba Đình saong kalan Chu tich Ho Chi Minh. Rahra saong tuai damuai meda pambuak nao rivang sang baha gam haong Kalan Wa Ho, Sang ngak bruk di Phủ Chu tich, Madin Putao Bia Hoang thanh Thang Long… jeng doak dalam labik.

Hu panuac khan, ampam baoh sang baha Mot Cot pagam haong lapei di Raja patao Lý Thái Tông. Thun 1049, patao lapei mboh Bhat Quan Am daok di angaok bangu caraih, ba patao tagok bangu caraih.

Tuk medeih, patao khan brei tal ka dom matri jabuel pang. Hadei di nan, ong Acar Thiền Tuệ hu pok panuac pachreih po patao padang sa baoh baha piah pahadar phol dhar praong di Bhat Quan Am.

Yau ye dalam lapei, baoh sang baha hu padang meng kayau lim, ngak jeng bangu carah di Bhat Quan Am caik di angaok gang. Hadei di nan, dom ong acar nao vil taom dar puac gal haong hatai caong “phol siam suai atah dhua”, kayua nan bo sang baha hu angan Diên Hựu.

Baoh baha hu padang meng sa mbaik gang biak karei. Thaik thaot maong yau sa bangu caraih chroh tamuh tagok di kreh danao Linh Chiểu. Danak dak lac bruk hadah krah pambuak di rilo bruk karei meng paoh sarak, tak cih. Mbaok ia jeng lac bruk gheih, lac kareih pasang ngak hadah tagok sang baha gah angaok.

Sang Baha Mot Cot padang tui thaik pak mata. Yaok gah di sang baha atah 3m. Gah ala lac gang meng patau glaong 4m, duong kinh 1,2m dalam nan hu 2 khối pagam gauk. Angaok gang lac 8 siaok kayau choh praong maong yau sa bangu caraih daok choh. Gah angaok tabung sang baha lac thaik ia bilan khuah apui, dua gah lac angaok ine girai payeng tame thaik ia bulan. Sang baha hu 4 tabung hu 4 akaok ndao vaiy saong thaik akaok ine girai mblo tagok.

Sang baha ndung bak siam gheih ginreih saong maong ieik gheih ghang, siam mekre, njuel njac di agama Bhat.

Rah tapa rilo rai patao, maong mboh bruk salih bahrau di sajarah, sang baha jeng rilo mbang hu pasiam. Tal harei ini, thaik thaot sang baha jeng hu salih karei dut haong meng akaok meti.

Tuk mai rivang me-in jirah tal sang baha Mot Cot, rahra saong tuai damuai brei nao tapa Bambang jang Tam Quan. Biak nao, ini lac danak dak peih praong bahrau ba tame piah duh ka hatai caong mai rivang me-in, duh paling di rahra di bingun harei raya rija, Tet.

Bambang jang Tam Quan hu dua pakat hu klau jalan nao, bambang kreh praong lac jalan hu nao rilo. Maong tapa nan dreih yau thaik thaot dom danaok kalan, sang baha bhap bini di Viet Nam.

Meng mblang pasak Liên Hoa Đài bac gal, duh paling, rahra saong tuai damuai brei yam tapa 13 tal kanyal hu praong labaih 1,4m. Dom tal kanyal ini hu padang meng jaman patao Lý nan daok khik tamo yau meng kal klak dom thaik thaot sang danaok tuk nan. Langiu di nan, dua gah lac daning akiak daok pagam patau khan ka sajarah baoh sang baha.

Paban duh Quan Am Bo Tat hu caik di labik kreh di Liên Hoa Đài, rup patau daok di labik glaong abih, di angaok bangu caraih meng kayau mathik som thiếp kanyik, vil taom dan lac kalaok bangu, balaok meng kang ban saong janih kaya paling ngak yang.

Sang baha Mot Cot di Ha Noi hu Padang ngak mek hu tanut glaong abih di Asia pilih ruah lac sa dalam dom baoh sang baha hu thaik thaot karei abih di Chau A di thun 2012. Gam haong Khuê Văn Các, ini jeng lac inem mek sajarah meng lavik mai, lac sa dalam dom mbaok meta di Ban ine ribau thun ilamo.