Meng tuk daok di ceik glaong, ong Patau Pôn Minh hu amaik ame pato jao bruk pak gak piah ngak tabiak dom ndap nda yau ciet, yot, naih, katăng duh ka bruk daok dang ngak mbang dalam sang. Hu jaik 40 thun pagam haong bruk pak gak, yaom lac oh ka meda hu min bruk ini jeng brei ka baoh sang hu jien mek tame khik kajap raidiuk yaok harei. Tui ong Minh, piah hu ndap nda pak gak gheih, hu rilo urang blei pandar chreih takre ye urang pak gak brei buh hatai anit ranam tame yaok baoh ndap nda. Ong Patau Pôn Minh, xa Phước Hà, tinh Khanh Hoa brei thau:

Bruk ini, ong amuk caik ka anek bik ngak. Dahlak hulin jeng bom ciuk ngak baoh yot, chapi, ngak kaya taong mek ikan. Dahlak hulin lahei tukvak ye ngak pablei, thei kakei blei ye dahlak ngak. Hu bruk ini ye daong lagaih lo.”

Atah di nan oh dom, diuk pasang sa-ai kamei angan Chamaléa Thị Tuyên jeng daok jal val haong bruk yaok harei piah jao dil dom ndap nda pak gak ka tuai damuai urang khin blei pandar. Dom ndap nda di baoh sang sa-ai Mến ngak tabiak rilo meng lac yau ye dom katăng, baoh ciet duh ka adat cambat di urang bangsa Cam saong mikva urang bangsa Raglai. Sa-ai Chamaléa Thị Tuyên brei thau veik:

Dom ndap nda mikva pak gak ngak tabiak dalam nan hu ciet, katăng, yot, chapi biak rilo. Ndap nda di mikva daok di Phước Hà ngak tabiak ndom ka jien duah hu ye yaok ndap nda. Yau baoh ciet hu sang ngak tabiak 5 baoh/harei saong pablei hu labaih 500 ribau/harei. Nan jien mek tame meng bruk pak gak biak glaong.”

Tui amuk Pinang Thị Mai – Akaok UB Bhap bini xa Bác Ái, piah khik ramik bruk pak gak meng tangin di bangsa Raglai, caga plaih kurang lahik bruk ngak, di xa bhum ceik Bác Ái hu padang kapul bruk pak gak hu 20 urang piah daong duah akaok tabiak ka ndap nda. Ndap nda pak gak meng nan jeng sit lagaih jang, gheih meta jang, rilo sambo bar jang dut haong dom ndap nda randap yaok harei.

Bruk pak gak meng tangin jeng lac jalan ngak di bhum palei piah khik ramik bruk pak gak meng tangin di urang bangsa Raglai, gam haong di nan ba mai jien mek tame ka bhum palei. Tukvak mai meng anak tal, bhum palei jeng hu brei panuac likau patui ngak danak dak jalan ngak pakat negar piah khik ramik bruk pak gak, piah ngak meda ndom ndap nda kaya yau ye yot, naih, ragam ragu chapi, oh lac sa janih brei patagok di bhum palei blaoh daok piah duh ka jirah rivang.”

Urak ini, ndap nda pak gak meng tangin di urang bangsa Raglai hu mai jaik jang haong tuai damuai urang blei pandar. Dom kapul pak gak jeng pabak rilo ndap nda ka darak pasar. Meng nan, jien mek tame di mikva jeng dak harei dak hu pasiam, daong prein ka mikva bangsa Raglai kham merat khik ramik bruk ngak meng tangin di bhum palei bangsa.