Dang akok Nyaom biai jhul pakhang bruk pachreih tuai damuai dunya tame Viet Nam peih tabiak page ini harei 21/12 di Hà Nội saong online pambuak 20 tỉnh ban, Thủ tướng Phạm Minh Chính caong khin, di nyaom biai  ini, dom mentri, dom gah, bhum palei, đơn vị, D.N, dom urang ilamu langyah kayua halei, bruk ngak dalam dui pachreih tuai dunya mai Viet Nam. Dalam nan, njauk kuhria tal bruk parilo janih pandap dulich; parilo darak pasar, chuoi pabak dich vu; pathau khan, yaih khan pambak praong bruk dulich; pasang iek bruk salih birau, salih pandar so, salih pandar hijao dalam bruk cakrok patagok dulich…Tui nan, ba tabiak jalan langyah dom kan kandah, tavak tavaiy; brei hu jalan, bruk ngak jhul khang bruk pachreih tuai damuai dunya mai Viet Nam hu suai lavik, khang kajap.

UBND tỉnh Đồng Nai bahrau pok meyaom 260 urang hu angan je, nhân sĩ trí thức, doanh nhân, sang ngak mbang pablei salih naih joi bangsa takik tỉnh Đồng Nai mbang ka II, thun 2022. Di tuk peih bruk pok meyaom, urang pan akaok tỉnh Đồng Nai hu panuac ieu dom pakat, dom gah patui bruk sangka, jhul khang bruk buh jien tame padang ngak jalan mbak, hạ tầng cơ sở, patagok bruk ngak mbang, ilamu, xã hội ka bhum bhap bini bangsa takik. Patui bruk paglaong jalan sahneng di karja, MT saong dom kapul nyaom ka bruk ngak, ka labik dang di urang hu angan je, nhân sỹ trí thức, doanh nhân, sang ngak mbang, pablei salih naih joi lac urang bangsa takik dalam bruk salih bahrau…

 Harei ini 21/12, Mban Khik iek jalan pasei đô thị brei peih iek radaih meng ga Mblang radaih Suối Tiên tal ga Bình Thái di Jalan metro ka 1 (Bến Thành – Suối Tiên). Jalan peih atah jaik 9km meng ga Mblang radaih Suối Tiên, tapa ga Đại học pakat negar TPHCM tal ga Khu Công nghệ glong. Hadei di nan, radaih  nao veik tapa ga Thủ Đức tal ga Bình Thái. Bruk peih iek nan, lac sa bruk hu mak na praong ngan haong danak dak, brei mboh bruk salih meng vaktu salah bruk padang ngak tapa bruk peih ngak iek, taong yaom tanut chuan ka bruk ba tame ngak bruk.

Meng ini tal thun 2024, tỉnh Trà Vinh caik tabiak labaih 15.900 tỷ đồng piah ngak ka nyu salah danak dak padang ngak palei pala bahrau dahlau di thun 2025. Tỉnh ba tabiak bruk lac tal jhung thun ini, 3 xã puac abih di tỉnh mek hu angan palei pala bahrau, 10 xã palei pala bahrau paglaong, 2 huyện Cầu Ngang saong Duyên Hải mek hu angan palei pala bahrau. Piah ngak hu bruk nan, tỉnh meda ba tabiak rilo jalan ngak ka quy hoạch, sarak, pambuak palei pala haong patagok đô thị; ieu pataom saong pandar dom prein khang, patagok bruk ngak mbang kinh tế kapul nyaom, HTX, parilo pandap OCOP…

Tet Nguyen dan thun nasak Tapai 2023, tỉnh Kiên Giang peih  2 mbang  gaiy gilai pajeng pandap pablei khik yaom tabiak 7 xã kaoh pulao di bhum tasik Tay Nam di tỉnh piah pablei ka mikva. Pandap hu ba tabiak  kaoh pulao nan ralo lac rilo pabui, brah, ndiuk, dom janih ratak, ia tasau, menyek mbang, ia mesir, ia tut, gia vị, ahar keo, mứt, pandap ngak bloh, alak, mbia, baoh manuk saong dom janih pandap pacang caga jit COVID-19. Tỉnh meda daong 400 trieu đồng jien pajeng ba pandap, jien nao ngak bruk, pasang iek bruk ba pandap panda tabiak kaoh pulao.

Gilang pariak dunya (WB) hu brei tapa pok jien daong bahrau yaom 610 triệu USD brei ka Ukraine dalam tuk bruk mesruh gauk jeng daok rah tabiak. Dalam pok jien daong ini, WB meda daong ka rajaei Ukraine jien pambuak tal phúc lợi ka uranaih saong baoh sang, jien bilan di công viên chức saong bayar dom dịch vụ công. Ini lac mbang ka 3 WB brei tapa pok jien daong Ukraine dalam dom bilan jaik di ini.

 Rajaei  Ân Độ hu panuac iew dom bang samar jhul khang bruk langyah trình tự gen COVID-19 piah caga ka bruk meda hu sa mbang jit birau tamuh tabiak. Panuac ieu ini hu ba tabiak dalam tuk urang njom COVID -19 tagok rilo di Trung Quốc, Nhật Bản, Mỹ, Hàn Quốc saong Brazil ngak haduh hatai ka jit ruak COVID-19 mbang ka 4. Ấn Độ  ba tabiak bruk ngak brei takik njom mbak  virus SARS-CoV-2 saong khik brei urang birau nyom ruak ala 1.200 mbang dalam sa adit. Kayua yau nan ye, bruk ngak urak ini lac tui iek tani tanat dom jalan patagok urakni  di dom biến chủng daok hu mboh.

Dom uranaih ndih tapui tabiak di Nhật Bản dalam thun ini tui kuhria meda trun tal tanut biar di abih dalam 7 thun gam saong mbang camereip abih trun tal tanut mala 800.000 uranaih. Bruk njaom mbak di jit praong Covid-19 ngak brei patrun dom gu dom yau tok gauk saong urang kumei metian, gam haong nan, dom urang umo meng 20 tal 30 thun jeng duh hatai rilo jang ka bruk ngak saong jien mek tame, ba tal bruk urang oh khin tok diuk tok pasang. Bruk ndih tapui trun daok ngak ka menuac sia di Nhật Bản taha nao biak samar. Bruk ini meda ngak kan kandah biak praong tal dom gah dalam raidiuk./.