Hatai gul pataom di bhap bani dalam bruk kham merat jhul kadhul lakuk jit ruak

Dom harei tapa, Mặt trận dom pakat dalam tỉnh taduan mek hu biak rilo jien padai rik daong di bhap bani brei ka bruk pacang caga jit Covid-19 di tỉnh. Blah thaot amuk taha umo jaik 80 thun angan Lê Thị Lập daok di phường Tân An, bal sit  La Gi juak radaih nao tal UBMT negar bal sit piah rik daong yaom jien 10 triệu đồng patak pataom hu di amuk ngak ka rilo menuac mboh drut druai. Daok amuk Ngô Thị Loan umo 89 thun daok di phường Lạc Đạo, bal Phan Thiết jeng buh tabiak yaom jien 10 triệu đồng anek taco brei, daok khik piah meng lavik mai piah daong ka bruk pacang caga jit. Dom amuk yaom lac umo prong, daok hu anek taco raong min tuk taneh aia caong khin ye halar hatian ba jien patak pataom hu dalam rilo thun tapa piah daong ka bruk pacang caga jit ngan haong hatai caong khin rik daong pren yava gam haong karja dom pakat saong bol bhap rah ra dalam bruk mesruh jhul kadhul likuk jit ruak, khik caga pren yava ka bhap bani.

Atau bruk ngak biak hu makna di ong Võ Thành Tuyên – po bein lan Tuyên Võ di bal sit La Gi hu pablei to yaom 2 phun lan di drei hu 580 triệu đồng rik daong tame kadung jien pacang caga jit Covid-19 di tỉnh. Drut druai jang, lac dom menuac daok rilo kan kandah yau sa-ai Sáu pablei vé số di tapen jalan, anai Hoa duan kanduh klaok klaak di huyện Tuy Phong hu rik daong sa triệu đồng brei kadung jien pacang caga jit Covid-19… Dom thaot binguk siam gheih nan hu ngak brei pamedeih tagok hatai gul pataom, “anit ranam gauk”, drei brei ka manuac sia saong lac kareih camin hadah piah ka urang karei ngak tui.

Dalam tuk nan, yaom lac jit ruak ngak kan kandah praong tal bruk ngak mbang pablei salih, min dom công ty, doanh nghiệp dalam saong langiu tỉnh jeng kham merat abih drei, rik daong jien padai piah sa tangin haong tỉnh dalam bruk pacang caga jit ruak Covid-19. Njauk khan tal bruk rik daong di Kapul Novaland daong brei 10 tỷ đồng, Công ty Địa ốc Nam Hoàn Cầu 1 tỷ đồng… Abih di nyu nan lac, dalam mbang jit camereip, Kapul Rạng Đông hu daong jaik 8 tỷ đồng, dalam nan hu kaoh tabiak 1 tỷ đồng brei Kadung jien pacang caga jit Covid- 19 tỉnh, daok veik 7 tỷ đồng brei ka bruk alin pandap ka urang kathaot gaok kan kandah meng jit ruak.

Daok dalam mbang jit ini, kapul daok hu daong 10 tỷ đồng ka bruk pacang caga jit di tỉnh. Yaom jien ini rik daong oh sit dalam bruk patagok pren khang di tỉnh piah peih ngak siam jang bruk pacang caga jit ruak. Lingiu di bruk daong brei jien tame kadung jien pacang caga jit Covid-19, rilo urang, jabat daok hu nao rivang, alin brei pandap panda ka dom kapul nyaom manuac urang daok pacang caga jit atau dom balai pasang iek ruak dalam tỉnh. Dom pok pandap yaom lac sit min brei mboh bruk sangka, pachreih ba dom pakul nyaom manuac urang yam tapa kan kandah, glaih glar.

Dalam mbang mesruh pacang caga jit Covid-19, yaok kapul nyaom, yaok menuac urang hu bruk klah rabha, daong brei meng rilo jalan ngak karei di gauk, min taong abih jeng lac hatung hatai di manuac urang pamaong tal bol bhap rah ra. Meda ndom lac, dom “hatai ameh” di dom manuac urang, kapul nyaom daok ngak pambak khang tal bol bhap rah ra, ngak brei pambak prong dom bruk ngak siam gheih, brei mboh hatai gul pataom di bhap bani Bình Thuận dalam bruk kham merat jhul kadhul lakuk jit ruak, samar ba mai rai diuk sron mbon ka bhap bani./.

Urang lang: Jasi – 11/07