Harei pahadar gru pato biak hu iek prong iek glong 

Di tuk ngak adat, Akaok Mintri Pato Megru Nguyễn Kim Sơn ndom lac: "Pato bac lac sa bruk praong glaong. Bruk praong glaong nan oh lac nyu hu eng. Nyu praong glaong kayua nyu ngak jeng anek menuac. Iek praong gru pato bhian nao gam haong iek praong ilamu hu gru pato tacei, gru hu iek praong kayua lac menuac hu đạo đức saong bac da-a glaong, thau rilo, ba nyu patoa veik ka anek saih. Khin pato ka anek saih jeng menuac, naih joi bruk ngak, gru pato brei bac da-a pasram megru, brei pasiam rup drei, yau kreih camin, meng yau kreih camin bo jeng praong glaong. Uan harei gru pato Việt Nam 20/11, dahlak khin ndom tantu cambaih laih saong pok paglaong bruk praong glaong di bruk pato bac, saong caong lac taong abih gru pato di kol drei tuk halei jeng khik ramik bruk praong glaong ini”.

Gru pato ngak abih bruk di drei, ngak hu bruk kan di bruk pato bac, nan njauk lac biak quý. Gru pato ngak bruk siam, ngak biak gheih, bruk nan dak njauk iek praong jang, kayua gru pato ngak hu biak siam bruk, ye ngak jeng bruk siam gheih ka rilo menuac, rilo anek saih. Dalam tuk, dalam labik kan kandah, tavak tavaiy, rilo cuang kandah, min daok ngak siam, ngak biak gheih bruk ngak, nan lac bruk siam gheih di abih saong brei hu pok meyaom. 

Akaok Mintri Pato Megru Nguyễn Kim Sơn daok ndom lac: "Harei ini, labik ini pataom mbaok dom menuac, dalam kan kandah tavak tavaiy di gah pato megru saman salih bahrau, saman pacang caga saong patrun dom kan kandah di jit ruak Covid-19, hu ngak salah biak gheih bruk di drei. Dom cei gru, anai gru lac dom menuac brei hu pok meyaom biak praong. Dahlak likau payua tal dom cei gru, anai gru lambaok ka urang pato bac dalam taneh ia, panuac pok meyaom, taong yaom prein yava rik tame saong panuac dhar phor praong di abih.

Yaok gah, bruk jak jeng ba mai dom yaom glaong karei di gauk. Bruk jak jeng di urang pato bac ba mai dom yaom glaong biak praong, kayua nyu ngak jeng bruk jak jeng ka taong abih menuac sia, ngak jeng bruk jak jeng di taneh ia. Kayua yau nan ye, dahlak likau tadhau ayuh taong abih dom urang pato bac hu jak jeng saong tuk halei jeng jak jeng hadah tanyak dalam bruk pala menuac di drei. Tapa ini, dahlak likau payua tal taong abih urang pato bac saong urang ngak gah pato megru dalam taneh ia, panuac tadhau ayuh di tuk uan harei gru pato Việt Nam 20/11. Tadhau ayuh ka taong abih hu salamat, haniem phul, tuk halei jeng mboh bui sambai oh abih hu dalam bruk pala menuac biak praong glaong.

Tapa nan, Akaok Mintri Pato Megru Nguyễn Kim Sơn jeng oh var payua panuac dhar phor biak praong tal bruk sangka di urang pan akaok Đảng, Karja, Quốc hội, Rajaei hu caik hatai sangka biak praong tal gah pato megru.

Harei 20/11 lac tuk abih menuac sia brei mboh hatai thau dhar phor tal gru pato, min jeng lac tuk gru pato dhar phor abih menuac sia. Akaok Mintri pato megru hu lambaok ka gah pato megru, hu panuac dhar phor tal taong abih dom amaik ame di anek saih, dom menuac pandar urang ngak, dom anek saih SV hu pachreih tui, hu daong ka gah pato megru./.

Urang lang: Mousaphuong -20/11