Taneh likhun atau daok ieu lac taneh mesam, di dom mblang hamu hu ia jangaih hijao, taneh tapen takai hamu hu sambo xám hareik tamuh takik ye hamu nan njom likhun nhôm, daok labik hu ia sambo meriah, mbau mesam ye hamu njom likhun pasei. Mblang hamu njom likhun bhian takik pacah meta, phun padai biar, asal mbet, hala hu sambo kanyik katam brei năng suất biar.

Piah pasiam dom mblang hamu njom likhuan mikva brei ngak dom jalan ngak yau ini:

- Hamu brei li-ua ka nyu samu, tapak, kayua taneh biar lac labik mbuan tamuh likhun ngak ka padai oh tamuh siam.

- Mikva brei ngak jalan tathuak ia siam ka mblang hamu.

- Angaok yaok taneh hamu brei rok ribaong vil taom dar piah mbuan ka bruk pruh ia, ngak jalan tathuak ia siam piah tuk hamu njom likhun meda tathuak ia klak hu mbuan sahanang.

- Dalam tuk trun pajaih bilan hè thu, jui li-ua taneh dalam jang 20 cm, piah klah gaok tal tal ia likhun piah plaih nyu sraiy tabiak angaok mbaok taneh ngak khat lahik ka phun padai.

- Pandar ia taba piah rau likhun, cang dom mbang ia tagok glaong brei ia tame hamu piah likhun tui ia trun dom kraong, ribaong, tuk halei jeng hu tal ia angaok mbaok hamu piah patrun patakik likhun. Oh caik ka hamu nyu thu ia, cang dom mbang hajan khang tathuak abih ia dalam hamu piah hu labik caik ia hajan barau. Dom mbang hajan khang gam gam meda ngak ka độ likhuan dalam taneh saong ia patrun biak ralo.

- Meyah hamu njom likhuan brei buh pabak dom janih khak hu ralo lân yau: DAP, NPK, jeng meda buh pabak sufer lân, cu tapung.

-Njauk pandar dom pajaih padai hu pren pacang likhun yau OMCS2000, OM 3536, OM 4900./.