Sa rituh pak pluh kapul nyaom saong menuac urang birau hu Uy ban bhap bini ban raya Ho Chi Minh pok meyaom lac “Dom kreih camin gandi gandang min hatain biak siam”. Dom urang nan hu iek praong kayua halan hatian brei drap ar saong rik prein yawa tame piah daong ka dunya, daong ka menuac sia.  

Thun ini umo 72 thun, min harei halei ong Phạm Văn Tân jeng kham merat srong mek hareik hareim theik angaok kraong Cầu Mé, quận 11. Langiu kraong Cầu Mé, ong Tân daok puh ramik jalan hẻm 161 D Hòa Bình, ngak brei hacih sa-at, laneng lanoi ka urang nao mai, ong lac:'"Dahlak sahaneng lac tuk halei oh daok prein yawa meng padeih ngak, meyah daok pren ye daok ngak ka alam moi truong hacih sa-at".

Daok amuk Huỳnh Thị Tươi, Phó akok Kapul pachreih bac xã Bình Chánh, huyện Bình Chánh ye yaok harei hu pang sap bac ê a dalam tal bac anit ranam di drei ye amuk mboh biak haniem phul. Meng hatai anit tuk mboh rilo uranaih ban glai ban klo oh hu nao bac da-a, thun 1989 amuk Tươi peih tal bac anit ranam pato meng tal 1 tal tal 5. Dua pluh lime thun tapa, yaom lac rilo mbang salih labik min tal bac oh tuk halei kareik pabah mbang. Jiak 900 anek saih jeng hu praong tagok meng nan. Amuk Huỳnh Thị Tươi khan lac: " Harei ini tapa harei diah tuk pato dom adei 24 anek khar huroh, mboh dom adei thau bac, thau vak  ye dahlak biak bui saong haniam phol. Bruk bui haniem phol  nan tui dahlak 25 thun ini mai yaom lac dahlak oh njuak lac gru pato chuyên nghiệp".

Tui jalan diukrai “ Haniem phol nan lac brei nao”, ong Trương Văn Đổng daok di palei 3, xã Bình Hưng, huyện Bình Chánh halan hatian kaoh brei 1.000 mét vuông taneh, tui yaom jien jaik 1 tỷ đồng piah ngak jalan palei.  Nan lac hatung hatian bo ong Đổng brei ka bhum taneh Bình Chánh labik ong praong tagok: " Dahlau di abih, dahlak kaoh brei taneh nan,  lac bac megru tui jalan diukrai di Wa Ho, palei biak kan kathaot bo oh hu jalan nao mai. Hadei di tuk ginum biai saong anek bik, thei jeng njauk hatai dahlak biak uan tabuan. Yaom lac harei hadei gaok kan kandah dahlak jeng oh damen bruk brei taneh".

Nan bahrau lac dom urang dalam yaok rituh urang gandi gandang daong ka menuac sia, daong ka dunya meng rilo jalan ngak karei di gauk. Dom bruk ngak di dom urang nan biak mbuan mbiah dalam raidiuk min ndung bak hatai menuac. Dom kreih camin nan hu daong ngak brei mekre jang hatai anit ranam gauk di anek menuac daok dalam ban raya angan Wa./.