Phong vien, BTV - Rayo papar sap ban sit Mỹ Tho

Sa-ai Nguyễn Ngọc Hiếu, urang jakar di rayo papar sap phường 4, jeng yau dom urang jakar rayo papar sap 17 xã, phường di ban sit Mỹ Tho urak ini biak jar var haong bruk brei thau, pathau khan pacang caga jit Covid-19. Sa-ai Hiếu brei thau, urak ini yaok harei, sa-ai brei hu mbaok piah papar sap 4 mbang, abih tih lac 07 mon, dalam nan hu bruk: tiếp âm rayo sap ndom VN, rayo papar sap Tiền Giang haong rayo papar sap ban sit Mỹ Tho, blaoh ba danak dak di rayo papar sap phường, saong brei thau dom harak gar samar drah di karja palei. Lingiu di nan, yaok harei, sa-ai daok ndik radaih patuh 2 kong pajeng thùng loa nao pathau khan ka pacang caga jit di dom darak pasar, labik hu rilo menuac dalam labaih 1 mon. Duk haong dahlau di tuk hu jit Covid-19, urang jakar papar sap ini ngak bruk rilo jang 2 mbang meteh. Sa-ai Nguyễn Ngọc Hiếu, khan lac: “Pachreih drei ngak lac drei hu pathau khan tal mikva piah paglaong akaok sahneng ka dom jalan pacang caga jit. Drei jeng hu khan brei mikva thau dom jalan ngak, dom sarak di UB bhap bini ban sit piah meng nan mikva caik hatai jang dalam bruk pacang caga jit Covid-19. Daok hu prein ngak ye kham merat abih drei piah pacang jit njaom mbak tabiak bhap bini”.

Daok rayo papar sap – papar binguk ban sit Mỹ Tho jeng yau nan, urak ini meng urang pan akaok tal urang vak,  urang biên tập, kỹ thuật viên jeng “nao aval, mai malam”.  Urak ini, rayo papar sap, papar binguk ban sit Mỹ Tho  papar sap yaok harei 5 mon meteh. Yaok mbang papar sap hu caik tal 35 minit brei thau dom bruk praong daok rah tabiak, dalam nan hu tal 60% asal kadha pathau khan pacang caga jit Covid-19.

Piah pathau khan pacang caga jit Covid-19 hu siam lagaih, Rayo papar sap – papar binguk ban sit Mỹ Tho brei 4 urang vak nao vak tin, bài; duah thau samar drah dom khau tin meng Sở Thông tin- truyền thông tỉnh, Rayo papar sap  Papar binguk tỉnh Tiền Giang haong mBan tacei jalan pacang caga jit Covid-19 ban sit Mỹ Tho piah brei thau angaok riyak langik saong ba ba trun rayo phường, xã. Langiu di nan, yaok harei suk dalam adit, rayo daok hu ngak sa danak dak papar binguk angak rayo papar sap - papar binguk Tiền Giang  dalam 15 minit. Lingiu di bruk brei thau dom văn bản meng pakat angaok, rayo papar sap - papar binguk ban sit pataom tame brei thau dom labik ngak siam bruk pacang caga jit, dom menuac gheih bruk siam saong brei panuac ka dom tavak tavaiy piah ramik ngak pasiam veik...

 Sa-ai Phạm Nguyên Khang, urang daok di xã Đạo Thạnh, ban sit Mỹ Tho bhian pang meng sap loa papar sap di ban sit Mỹ Tho. Sa-ai Khang brei thau, meng pang rayo papar sap bo dom bruk pacang jit ruak Covid-19 hu thau samar, drah: “Bhap bini kol dahlak yaok harei jeng pang rayo papar sap ban sit Mỹ Tho haong di xã. Ini lac danak dak biak gheih, bhap bini pang jeng hu thau paglaong hatai sahneng jang dalam bruk pacang caga jit Covid-19. Pang rayo hatai sahneng di kol dahlak hu glaong jang, tuk tabiak jalan cuk pataih pacang mbaok, daok atah di gauk njauk tui bruk ba tabiak, ngak tui 5 paka di Mintri y tế”.

Yaom lac dalam Rayo papar sap, papar binguk ban sit Mỹ Tho tok hu 11 urang jakar, urang ngak bruk, jien padai takik, labik ngak sit sot kan kandah min khik hu siam bruk ngak, abih di nyu lac bruk pathau khan pacang caga jit ruak hu samar, drah, siam, lagaih, oh caik rah tabiak labaih, kurang. Ong Nguyễn Thành Lâm, urang pan akaok rayo papar sap - papar binguk ban sit Mỹ Tho daok brei thau lac:“Urak ini, piah pathau khan pacang caga jit Covid-19 hu siam lagaih, dahlak mboh lac dom loa papar sap di rayo ban sit haong dom rayo puk palei brei ngak ka nyu samu gauk, samar ramik pasiam dom khut khat. Ka dua lac asal kadha brei hu peih ngak samu gauk meng ban sit tal puk palei, piah khan brei bhap bini mbuan pang, mbuan thau saong ngak tui siam. Bruk brei thau dom jalan ngak, dom sarak di pakat angaok brei vak veik ka nyu lagaih, njauk haong bruk di anak meta.”

Yaom lac bruk daong jien mbang huak ka urang jakar puk palei langiu định biên daok biak takik min meng hatai anit bruk saong meng trách nhiệm haong menuac sia nan ye dom urang jakar papar sap puk palei di ban sit Mỹ Tho daok kham merat abih drei, ngak siam bruk hu jao brei, yau dom urang lin tuk halei jeng ba akaok nao dahlau dalam bruk brei thau, pathau khan, piah rik daong jhul kadun likuk jit praong./.

Urang lang: M.Phuong -26/6/2021