Tuk ngak bruk di duk cấp cứu khoa hồi sức cấp cứu anek naih saong anek kamar, sang iek ruak đa khoa tỉnh Đắc Lắc, dalam sap ieu tít tít di dom janih jamriah, dalam jar var ngak bruk di dom bác sĩ, điều dưỡng, sa anek naih kamei daok ndih bingi dalam baoh yin tapen bàn ngak bruk. Harak hồ sơ pagam tapen radaih brei thau lac, anek naih nan hu jaik 3 bilan.

Điều dưỡng Lê Thị Quế brei thau, anek naih kamei oh ka hu caik angan, bhian ieu lac “anek naih kumei anek di amaik Nga”, njauk urang klak veik di khoa sản saong ba tame khoa nhi harei 29/1/2015 dalam tuk suy hô hấp, nhiễm trùng di anek kamar ndih tapui kurang bilan tuk bahrau hu 30 adit saong trak 1kílô 6. Ngak tui dom ilamu iek glang anek kamar siam di abih, dom bác sĩ, điều dưỡng di khoa hồi sức cấp cứu anek naih saong anek kamar, sang iek ruak đa khoa tỉnh Đắc Lắc hu ba pren yava mai ka anek kamar saong meng nan mai urang jeng dom urang amaik, urang ame, salih gauk iek glang. Điều dưỡng Lê Thị Quế khan lac:

 “Bhian di nyu drei daong iek min, hu menuac sang ye drei cadu jang hasit min oh hu menuac sang ye drei brei ngak abih meng plaih tả, brei mbang tal bruk nao likau ia tasau amaik brei anek naih kayua nyu daok takik bilan bo mum ia tasau langiu oh siam nan ye harei halei jeng nao likau ia tasau amaik brei ka anek naih. Dalam tuk daok iek glang ralo kamuan tra, tuk ngak bruk daok hu ralo menuac, daok tuk khik melam ye biak glaih galar kayua hu 4 điều dưỡng min bo iek glang dua duk, saong tuk halei jeng dalam tuk daok hu 5, 6 pluh urang ruak”.  

Mboh anit jang nan lac kamuan Hoàng Hà Nhi njauk urang klak veik di khoa nhi meng bilan 11 thun 2013 tuk barau ndih tapui hu 4 harei. Bruk njauk biai nan lac, Hoàng Hà Nhi njauk ruak tim bẩm sinh di anek kamar njauk ruak down, pandiak glaong saong suy hô hấp trak. Anit ka kamuan, dom y bac sĩ di khoa abih hatai sangka, iek glang. Labaih 17 bilan tapa, yaok var mbang saong khan ao cuk yaok harei di kamuan jeng kayua dom điều dưỡng, bác sĩ di khoa nhi đảm trách. Sa labik sit taphia bàn ngak bruk di dom điều dưỡng jeng baoh sang anit ranam di kamuan. Kamuan Hà Nhi urak ini meda daok la me-in dom pandap me-in langiu hành lang duk iek ruak dalam tuk dom điều dưỡng ngak bruk. Angan Hoàng Hà Nhi jeng hu dom bác sĩ labik ini caik brei kamuan ngan saong makna đặc biệt yau panuac khan di bác sĩ Lê Đình Nhân:

 “Angan Hoàng Hà Nhi hu makna lac Hoàng lac họ bac sĩ Tuấn, ieu lac ame raong, angan Hà lac angan amaik pajeng di kamuan, hadei di tuk ndih tapui amaik kamuan brei urang kamei ba tame sang iek ruak, Nhi hu makna lac khoa Nhi nan ye kol dahlak caik angan saong makna yau nan”.

Bác sĩ Hoàng Ngọc Anh Tuấn, akaok khoa brei thau, yaok harei, khoa taduan saong cấp cứu iek ruak ka 50 tal 60 anek kamar ala 15 harei; dalam tuk daok iek glang dom anek naih njauk urang klak veik. Dom anek naih njauk urang klak veik bhian hu dị tật bẩm sinh, pren yava biak yếu, mbuan metai. Bruk iek ruak di kol nyu hu bảo hiểm bayar jien min bruk raong ba, meng hộp ia tasau, bịch tã tal khan uak, ao capha jeng kayua dom bác sĩ, điều dưỡng di labik ini blei meng jien bilan di drei saong hatai caong khin hu daong ka dom anek naih nan patrun meneng dom thiệt thòi:

 “Oh hu bruk hagaih karei, kol  dahlak biak glaih glar kayua iek glang sa uranaih ruak nyu glaih jang iek glang 2 ,3 urang praong. Min kol dahlak ngak bruk ini mboh dom kamuan yau nan kol dahlak oh  klak hu. Yaok harei kol dahlak hu khan tagok mban giám đốc saong jao ka khoa phòng iek glang dom kamuan, ba siam lagaih di abih piah raong saong iek glang dom kamuan. Kol dahlak jeng oh mbuah amaik ame dom kamuan, mboh dom kamuan yau nan, langiu bruk ngak di drei, kol dahlak sangka jang 2, 3 mbang, meng iek ruak tal iek glang dom kamuan gah tinh thần piah dom kamuan praong tagok dak harei dak siam jang”.  

Yaok harei di khoa hồi sức cấp cứu anek naih saong anek kamar, sang iek ruak đa khoa tỉnh Đắc Lắc oh lac hu sap ieu di dom janih jamriah, sap ndom biai nao mai dalam bruk ngak bo daok hu sap bi bô pasram ndom di dom uranaih kayua sang iek ruak raong. Daok ngan saong dom bác sĩ, điều dưỡng labik ini, bruk ngak di sang iek ruak gam lac trách nhiệm gam lac labik urang caik hatung hatai tabiak tagok akaok, halan hatian ngak dom “urang ame, urang amaik ao patih” piah iek glang dom uranaih njauk urang klak tuk barau ndih tapui./.