“Amaik” lac panuac ieu anit ranam bak hatai iek praong di diuk pasang sa-ai Nguyễn Thị S iew amuk Thái Thị Tuyết Mai, umo 74 thun, Phaok akok Kapul halan hatian ngak bruk xã hội phường 2, quận 5, mai meng dom dar phor bo amuk ngak ka sang sa-ai. Ngan saong sa-ai S, muk Mai nan lac urang amaik ndih tapui sa-ai mbang ka dua. Sa-ai S metui amaik ame, oh hu adei sa-ai halei. Hadei di 5 thun me-in matuy, sa-ai hu ba tame cai nghiện blaoh veik mai saong dua plak tangin saoh. Dalam tuk having akaok oh thau ngak mbang hagait, sa-ai S hu muk Mai saong dom urang halan hatian mai jak ba piah plaih njuk veik, hu iek glang prein yawa, daong phun jien ngak mbang, salih raidiuk. Sa-ai S daok hu amaik Mai saong Kapul halan hatian ngak bruk xa hoi ini palakhah ka sa-ai Đào H, sa urang hu raidiuk dreih yau sa-ai. Diuk pasang sa-ai urak ini thau cambaih ka bruk kanjah jhak di matuy ngan saong prein yawa, tính mạng saong mbaok meta di dom urang gam tame. Sa-ai S khan lac:

 Gaok tuk hu bruk haduh hatai, dahlak nao tal amaik Mai, jeng yau 2 thun dahlau, pasang dahlak ruak, kurang tal 4 kadung darak. Tuk nan dahlak biak huac, dalak nduac nao duah amaik Mai daong. Pasang dahlak ruak, dahlak tok sa drei eng oh thau ngak habar. Amaik Mai daong ka dahlak tuk kan kandah. Meyah oh hu kapul daong ye kan plaih hu jalan klak.

Takik thei thau lac, urang nyuk matuy hadei di tuk cakak klaoh, diukrai hu siam mekre, dom urang halan hatian njauk yam tapa rilo kan kandah, glaih glar. Amuk Thái Thị Tuyết Mai brei thau, tuk camereip, urang halan hatian nao tal yaok baoh sang urang nghien matuy, min oh thei khin taom mbaok. Hu sang kamlah lac anek drei oh nyuk jru phien, bloh kareik pabah mbang pateok urang halan hatian. Min dom urang halan hatian kham tui harei melam, oh huac di hajan angin nao tal yaok baoh sang urang nghien piah caik hatai tui pang saong uah jalan daong, jak ba urang tame cakak matuy. Ba hu urang nao cakak blaoh, urang halan hatian daok tui iek bruk cakak jru phien, peih bruk taduan urang nao cakak matuy mai sang yau gauk gar di drei. Mbaih tal ini, Kapul urang halan hatian ngak bruk xa hoi Phường 2, quận 5 hu 5 urang, umo meng 60 thun tagok, meng angan je saong hatung hatai di drei, jak ba 70 urang klaak njuk, daong ka urang duah hu bruk ngak tani tanat. Amuk Mai lac:

 Harei ini tal harei diah, khol dahlak da-a tabiak menyum caphe meyai, jak ba nao balai y tế iek ruak. Khol dahlak buh jien kadung tabiak ngak. Meng nan, sang ini maong tapa sang diah, urang mai jaik khol dahlak rilo jang. Ngak bruk ini, langiu kham merat ye brei hu hatai anit ranam, iek nan yau anek kamuan di drei.

Oh lac ta-eng diuk pasang sa-ai Nguyễn Thị S, yaok rituh urang nghien matuy di rilo labik dalam Ban raya HCM hu dom urang halan hatain ngak bruk xa hoi daong, cakak jru phien, mai veik ngak urang siam. Karei di nan, amuk Vũ Thúy Nga, urang halan hatian di phường Cầu Kho, quận 1, Ban raya HCM, thun ini umo 80 thun min labaih pluh thun tapa patak pataom jien bilan padeih hưu saong jien anek taco brei piah daong dom urang cakak jru phien veik mai saong raidiuk mesre phun jien ngak mbang. Gaok tuk, hu urang nghien matuy hu amuk brei nyim jien bayar sre njuk, klauk jru phien dahlau diah, brei jien mbang panal page. Amuk saong 6 urang halan hatian karei dalam phường, duah rilo jalan ngak karei di gauk, mek angan drei dang ka urang nghien mesre phun jien di rilo kadung karei di gauk. Dom bruk ngak nan nyu ngak ka rilo urang nghien mboh druat druai, dauh mai tal amuk piah tut angan nao cakak. Amuk Vũ Thúy Nga brei thau: 

 Tuk dom adei khin, dom adei ndom bloh drei buh jien kadung di drei tabiak tuk nan, cang ngak harak gar suai lo, cang tal luac bilan, labik bruk di dom adei. Drei sahaneng lac payua tiết kiệm jeng oh hu hadom. Rilo adei hu jien bayar, daok rilo adei oh ka hu jien bayar jeng oh lac hagait. 

Di ban raya Ho Chi Minh urak ini hu 319 urang halan hatian ngak bruk xa hoi di 319 xã, phường, ieu pataom dom urang jakar padeih hưu, urang halan hatian lac dom urang taha, hu angan je dalam bhap bini takre ngak bruk xa hoi. Ong Le Van Qúy, pho akok Chi cuc pacang caga tệ nạn xã hội ban raya Ho Chi Minh brei thau, ban raya mboh hu dom bruk ngak siam di dom kapul urang halan hatian ngak bruk xa hoi. Ban raya brei paglaong jien daong ka urang halan hatian saong jien hjik khan ao, pathau khan piah daong ka dom kapul ngak bruk hu siam lagaih jang.  Ong Lê Văn Quý lac:

 Dahlau di abih, khol dahlak mboh bruk ngak nan mai meng hatai anit. Dom wa ngak bruk dalam kan kandah, min meng hu rilo ilamu, caik rilo tukvak di drei piah daong ka dom adei. Njauk ndom lac, meyah oh hu hatung hatai oh kham merat rilo ye oh ngak hu bruk ini. Nan lac bruk khol dahlak biak iek praong.

Dom bruk ngak yau sit sot, takik thei thau tal min hatung hatian di dom urang halan hatian daong urang nghien klak matuy, kumei mein mai veik jeng menuac siam, menuac hu kein laba ka xa hoi. Dom bruk ngak nan hu daong ngak salih jalan sahaneng saong bruk neh rabha di bhap bini ngan saong dom urang nao suan jalan./.