Pathau mikva saong taong abih gauk! Dalam dom jayah di urang jakar, urang lin angaok pulao Trường Sa, hu biak rilo pren yava rik tame di dom urang lin oh trực tiếp pan phao. Nan lac dom urang lin công binh, lin thông tin, bác sĩ quân y di dom pulao kaoh, dom urang thợ máy, urang ngak mbang huak angaok dom baoh gilai ba urang jakar, urang lin saong pandap mbang menyum meng baoh taneh tabiak pulao. Dalam mbang ba lin tabiak salih saong ba pandap Tết tabiak pulao, Thành Lương – urang vak di rayo sap ndom VN hu kadha vak ka “dom urang lin thầm lặng" angaok sruh gilai HQ571.

        Tuk kol dahlak tangi lac kadha halei njauk caik hatai di abih dalam bruk ngak di urang thợ máy, urang lin daok ranaih umo angan Nguyễn Văn Huỳnh khan lac: "Dang kreh 2 jamriak praong, tuk jamriak megei tagok, rup drei jeng megei tui, tuk nan mboh chreih chrai lô. Bloh sahneng tal bruk khik kajap bruk megei nan!".

Tuk kol dahlak caong trun rivang hầm máy sruh gilai HQ 571, ye Huỳnh oh brei kayua trun nan sap jamriak biak khang ngak tangaoh tanye. Biak yau nan, oh lac dom urang lin bahrau atau dom urang vak kol dahlak, bo dom urang lin tasik livik thun angaok gilai jeng mboh having akaok, kan daok tuk trun khik ala hầm máy pandiak yau pui, sap yava tangaoh tanye… kol dahlak meng thau hu dom kan kandah glaih glar di dom thợ máy.

Yau nan bo Thượng úy Phạm Thành Đạt, urang pan akaok gah cơ điện gilai 571 jeng daok ndom lac, oh glaih glar jang dom urang ngak mbang huak angaok gilai. Tuk nao angaok boong mboh yau megei nao megei mai, min tuk trun buồng máy ye brei kham merat, brei caik hatai. Tuk daok ala buồng máy drei oh mboh hagait, min tuk ngak bruk bloh drei meng mboh having akaok, mebuk riyak.

Đại úy Trần Văn Huy, Chính trị viên gilai 571, bahrau nao tăng cường labaih 70 harei "biển động" di Hoàng Sa, khan lac: Angaok gilai hu rilo gah, yaok gah hu sa bruk ngak karei di gauk, yau bruk kỹ thuật ye nyu trak jang, ngak bruk nan sap yava nyu khang lô, pandiak lô, adei sa-ai labik nan takik hu ndom biai haong gauk.

Phạm Thành Đạt bhian ndom bui lac "gilai meda megei, tasik meda megei, menuac meda megei, min hatung hatian oh brei megei piah ba gilai nao tal labik": Tuk hu ngin riyak, bruk ngak biak kan kandah, biak glaih glar min kham merat ngak siam piah ba gilai nao tal labik. Tuk ngin riyak, gilai megei jamriak mbuan khut, yaom lac mebuk riyak jeng hu mbaok khik iek, kham merat yam tapa.

Tabiak truh labik hầm máy, Đại úy Huy ba kol dahlak mbleing mblang tui riyak, nao gah iku gilai. Gam nao, sa-ai Huy gam tangi kol dahlak: "Dom sa-ai thau kayua halei urang lin tasik bhian hu ieu lac "chim cánh cụt" ha-ô?". Tangi nan, jeng javap nan, makna mai meng 2 gah takai yam mbleing mblang, 2 gah tangin pa-laik trun saong rup megei nao megei mai tui riyak. Bruk mbang huak brei caga siam, oh brei kurang, oh brei labaih piah patak pataom, ngak habar ka adei sa-ai mbang huak angaok tasik bo khik hu pren yava khang kajap. Pakat ủy, mban chỉ huy gilai jeng mboh, jeng thau dom bruk ngak thầm lặng nan, jeng lac hatung hatian di adei sa-ai urang jakar, urang lin angaok sa baoh gilai.

Maong Thiếu tá Nguyễn Văn Huyên, iek gah hậu cần gam lac bếp trưởng gilai 571, pok chậu ia tuh tame gaok lisei quân dụng, caik angaok baoh ging hu pagam tame daning sang ging…, dahlak oh thau lac ngak habar bo chậu ia nan oh haok tagok rup sa-ai, tuk bo riyak paoh, megei khang baoh gilai: Nao tasik gaok riyak khang biak glaih glar. Dahlak hu pô brei oh mebuk riyak, min nao tasik gaok ngin riyak oh thau lac yau habar. Pagap yau tuk riyak khang bo drei bahrau caik gaok ia tagok, riyak taong jaleih gaok ia trun ngak padam ging, ye drei njauk tuh ia karei tame piah tahanek veik. Tuk ngak mbang huak, drei njauk nao tal yaok bilik tangi piah ngak njauk hatai caong di urang.

Dahlak jeng tatuak drei tuk mboh sa-ai Huyên, lac urang ngak ka dahlak sa jaluk mỳ tôm pandiak bingi, tuk dahlak ndih di labik kayua mebuk riyak di angaok sruh gilai  HQ996 dalam mbang tabiak Trường Sa 12 thun dahlau. Thiếu tá Nguyễn Văn Huyên lac: Dahlak hu 27 thun duh ka dom kapul tabiak tasik. Dalam tuk nao, bruk caga mbang huak angaok tasik nyu kan kandah jang rilo mbang dut haong di baoh taneh. Ka sa lac tuk ngin riyak, brei nao tal yaok bilik, maong iek urang halei mbang hu hagait ye drei ngak ka urang, pagap yau bu, ia tasau, lisei piah khik pren yava. Tuk ngin riyak, hu urang tok mbang hu sa mbang, min jeng hu urang mbang tal 3-4 mbang, kayua ngin riyak, drei brei ba tal labik ka urang, kayua urang mebuk riyak oh nao mai hu.. Bu, mì tôm, lisei, njam, ralo… taong abih jeng caga ginup, ngak pandiak ka urang mbang piah khik siam pren yava. Nan lac bruk oh mbuan.

Lisei tasak, pandap mbang hu parabha tui khẩu phần. Labaih 20 urang dalam tổ hậu cần saong phục vụ jar var caga pandap mbang menyum ka labaih 200 menuac angaok gilai: var mbang mesup hu ngak meng  3tuk meteh, tal 8tuk ye ngak caga ka var huak jala pandiak, tal 15 tuk ye tahanek ka var huak melam, nan oh ka ndom tal var mbang tamuh tabiak tui hatai caong di urang mebuk riyak. "Tal tuk huak, likau da-a thủ trưởng saong dom kapul trun labik huak lisei”– harei 3 mbang, baoh loa papar sap menyi tagok. Dom urang oh mebuk riyak ye chreih chrai ba gauk tame labik huak.

Thiếu tá Đinh Xuân Hoàng, Chính trị viên phó di Hải đội 411 - Hải đội hu 5/7 gilai ngak bruk ba lin tabiak salih saong ba pandap Tết tabiak pulao tuk Tết, khan lac: Kol dahlak sahneng, lac urang lin ye tuk tagok jalan nao ngak bruk jeng brei kham merat, ngak biak siam bruk di drei. Dalam dom kham merat di taong abih urang dalam hải đội, kol dahlak tuk halei jeng caik hatai sangka tal dom rik daong thầm lặng di dom urang lin ala hầm tàu. Nan lac dom thợ máy, dom urang lin ngak mbang huak saong dom urang duh ka bruk mbang huak yaok harei di taong abih menuac angaok baoh gilai. Kol dahlak tuk halei jeng mboh, jeng thau, lac urang lin, yaom lac ngak bruk hagait, jeng hu yaom glaong yau gauk.

Saong dom urang lin thầm lặng nan tuk halei jeng thau, yaom lac ngak bruk dalam kan kandah, glaih glar, jeng brei khang hatai ngak siam bruk di drei, piah rik daong hasit pren yava di drei ka yaok mbang gilai nao ngak bruk hu jak jeng, siam mekre./.