Dalam bruk pala thanh long piah pablei di tỉnh Tiền Giang ye mô hình siam di abih njauk ndom tal mô hình sang ong Võ Ngọc Diệp,  palei Lương Phú C, xã Lương Hòa Lạc, huyện Chợ Gạo. Ini lac mô hình akaok meti di tỉnh dalam bruk pala thanh long tui jalan an toàn, chất lượng saong pandar công nghệ hacih, kein laba glaong piah pablei tabiak negar langiu.

Hu bruk daong kỹ thuật di gah chuyên môn, baoh sang ong ngak ro pala jaik 8.000 m2 phun thanh long brei sro angaok xi măng. Urak ini phun tabiak baoh pablei hu meng 4 tal 7 thun. Piah ngak ka phun hu năng suất, chất lượng glaong, ong Diệp hu pandar quy trình sản xuất tui tanut chuẩn Viet Gap. Meng khak drak tal pandar jru khik caga phun pala… khik kajap an toàn ka urang pala saong urang blei mbang. Jaik di ini, ong Võ Ngọc Diệp buh jien tabiak ngak hệ thống pruh ia sit sit meng năng lượng ia harei di Australia ka bein thanh long; saong daok ngak iek hệ thống gom patak pataom điện piah ngak ka phun tabiak bingu sung bilan brei năng suất saong yaom glaong. Mô hình ini daong ka ong patak pataom hu ia pruh, harei ngak, jien điện… meng 3 tal 5 triệu đồng sa bilan. Yaok thun bein thanh long ini hu 3 mbang paik baoh, yaok mbang paik hu 30 tấn. Meyah kuhria yaom labaih 10 ribau đồng sa kg ye yaok thun baoh sang ong hu jien mek tame jaik 400 triệu đồng. Ndom ka mô hình pala thanh long tui tanut chuẩn Viêt Gap, ong Diệp brei thau:

 “Baoh kayau ngak tui Viet Gap mboh kein laba biak glaong. Piah pablei nao atah, dalam 7 janih baoh kayau di tỉnh Tiền Giang ye dahlak mboh pandar jalan an toàn – Viet Gap ka phun thanh long hu kein laba di abih. Ndom ka bruk peih ngak dahlak mboh oh hagait kan, drei vak sổ sách, ngak njauk tui”.

Urak ini, kapul pambuak bruk pala thanh long Lương Phú, Lương Hòa Lạc kayua ong dang akaok hu jiak 30 urang. Tapa tacei pato di ong dom urang dalam kapul hu pandar quy trình kỹ thuật Viet Gap tame bruk sản xuất hu kein laba.

Jeng di palei Lương Phú B, xã Lương Hòa Lạc, huyện Chợ Gạo, tỉnh Tiền Giang hu urang nông angan Võ Văn Chung bo ralo bhap bini bhum taneran kraong Cửu Long thau tal saong angan lac “patao padai pajaih”. Tukvak tapa, ong ngak hu siam ralo mô hình VAC; dalam nan bruk pala 7 asar padai pajaih di sang bac đại học Cần Thơ tabiak jeng yaok pluh tấn padai pajaih brei ka bruk pala drak di urang nông bhum taneran kraong Cửu Long di dom thun 1977 – 1978 hu jeng huyền thoại. Urak ini, ong lac po trang trại raong 200 drei pabui pajaih, pala 3 ha bein, dalam nan hu: mận An Phước, kruac bung kanduh hijao, li-u saong ralo danao ikan… Langiu di nan, ong daok hu ngak sa ha pajaih padai chất lượng glaong. Yaok thun, ong Võ Văn Chung ngak hu jaik 30 tấn padai pajaih, yaok pluh tấn baoh kayau dom janih saong yaok ribau drei pabui pajaih, jien laba mek tame meng bruk ngak mbang ini labaih 500 triệu đồng sa thun. Ong Võ Văn Chung brei thau: meng ngak njauk tui dom ilamu kỹ thuật, sahneng duah jalan ngak bahrau nan ye dom mô hình VAC jeng hu kein laba. Abih di nyu nan lac, dom var ro raong glang di baoh sang jeng hu padang ngak tui mô hình khép kín, tự động hóa, siam ka alam môi trường. Urak ini, yaom lac umo labaih 80 thun min urang ngak nong angan Võ Văn Chung jeng daok roh duah piah ngak tabiak padai pajaih, anek pajaih chất lượng glaong brei ka gah ngak nông dalam tỉnh.

 “Ndom ka pajaih ye brei ngak njauk pajaih tui mintri ngak nông saong patagok palei pala atau duk ngak nông tacei pato ye drei ngak tui, bruk halei oh njauk ngak. Urang nông jui nduac tui kinh tế, pang mboh hagait hu yaom glaong, pablei hu ralo jien ye ngak, nan lac oh siam. Kayua bruk nan urang ilamu oh ka ba tabiak, bo drei pang tui urang ba tabiak angan bo pala ye nyu khat lihik ka bruk ngak nông biak praong”.

Daok di xã An Hữu,  huyện Cái Bè, tỉnh Tiền Giang hu urang nông “kỹ sư” Lê Phước Lộc. Ieu ong lac " kỹ sư" kayua ong lac urang ngak tabiak ralo pandap brei ka bruk ngak nông. Ong Lộc brei thau, tukvak hadei di thun 1975, mboh urang nông yuak padai meng tangin biak glaih glar, abih rilo pren yava, dalam tuk năng suất biar, tukvak yuak padai dui atah. Meng nan, ong ruah duah saong brei tabiak rai sruh máy tuốt padai akaok meti di huyện Cái Bè. Sruh mac kayua ong ngak tabiak hu ralo bhap bini pandar saong taong yaom glaong kayua nyu biak siam, lagaih. 

Thun 2003, ong peih cơ sở cơ khí Phước Lộc di huyện Cái Bè – bhian ngak pabah mbang pasei, pandap cơ khí dom janih. Meng nan, ong hu jalan mbuan lagaih piah ngak tabiak dom janih pandap tui hatai sahneng di drei yau: katrei cakak đa năng, péc pruh ia, cần papaok baoh… Dalam nan, katrei kaoh cakak gam kaoh hu dhar gam paik hu baoh kayau. Bruk njauk biai di katrei ini lac nyu hu pandar piah cakak dhar, gam cakak, gam kẹp khang baoh, khik ka baoh daok that, bak phấn saong gam hala hijao nan ye hu urang ngak bein biak takre.

Katrei cakak đa năng di ong Lộc mek hu giải B nyaom pakacah sáng tạo kỹ thuật tỉnh Tiền Giang; giải 3 pakacah sáng tạo kỹ thuật urang nông pakat negar mbang ka IV kayua kapul urang nông VN peih tabiak saong mek hu giải brei ka “urang sáng chế” kayua rayo papar binguk VN peih tabiak… Dalam dom janih pandap kayua ong ngak tabiak tukvak tapa, hu 3 janih hu cục sở hữu trí tuệ brei bằng độc quyền kiểu dáng công nghiệp nan lac: katrei cakak, péc pruh (vòi pruh) song cần papaok baoh. Eng katrei cakak đa năng yaok thun ong Lê Phước Lộc ngak tabiak labaih 15.000 ribau mbaik, pablei ka dom darak dalam taneh ia.  

Yaok thun, tỉnh Tiền Giang hu yaok ribau urang nông hu brei angan ngak mbang pablei salih naih joi biak njauk pok menyaom. Urang thau saneng, thau ngak, tari tarieng ngak mbang, thau ba dom ilamu kỹ thuật tame bruk sản xuất. Tapa nan, gam ngak tabiak pandap hu kein laba ka xã hội gam ngak kaya meda ka baoh sang saong rik daong dak padang puk palei dak harei dak kaya meda./.