Karja pak ni hu thau cambaih bruk pablei salih taneh tái định cư di labik tái định cư Lộc An - Bình Sơn

Ngak urang caong pablei taneh nền di labik tái định cư Lộc An - Bình Sơn, khol dahlak hu “cò” taneh angan Vũ yaih khan, ong H. daok di xã Suối Trầu (klak) hu 2 suất tái định cư di mbaok jalan labik tái định cư Lộc An - Bình Sơn caong pablei, yaom 800 triệu đồng. Mayah njauk hatai blei, Vũ ngak harak gar caik jien takai, khol dahlak njauk biyar jien takai dahlau lac 750 triệu đồng, tuk halei taduan hu taneh ye biyar binak daok veik. 

Vũ ndem lac, ong H. vak harak tangin taduan jien takai saong jao sổ hộ khẩu ka khol dahlak khik piah. Bruk brei ka urang blei khik sổ hộ khẩu lac plaih bruk ong H. pablei ka rilo urang. Tuk halei ong H. taduan taneh ye ngak harak adat jao brei. Tui bhap bini daok pak ni brei thau, mayah caong blei taneh nền di labik tái định cư ni urak ni lac oh mbuan, njauk blei tapa tangin 2-3 urang.

Langiu di bruk pablei salih “padai meda” yau nan, lac pablei meng menuac dalam labik tái định cư min ka oh taduan taneh, ye di pak ni jeng hu rilo urang blei veik taneh nền meng dom urang hu bốc thăm taneh dalam labik tái định cư. Vũ ndem lac, bruk pablei salih phiếu taduan taneh nền tái định cư ye gaok bala bier jang bruk pablei salih padai meda, kayua takik rahtabiak bruk meriak gauk.

Rilo sang hu tái định cư dalam danak dak mblang kapar ahaoh dunya Long Thành dalam diện kathaot. Tuk taduan hu taneh tái định cư, dom urang nan njauk buh jien pandar taneh tui adat, ngan haong dom lô tái định cư phụ ye daok njauk buh veik 50% jien cơ sở hạ tầng; ka oh kuhria jien padang ngak sang, kak je... Oh hu jien ngak, dom urang nan njauk pablei veik paok taneh tái định cư di drei piah nao labik karei blei ngan haong yaom lap jang.

Urak ni vil val labik tái định cư Lộc An - Bình Sơn hu rilo kapul “cò” taneh pataom mek dom taneh tái định cư blaoh pablei veik ka dom urang mai meng dom tỉnh, ban jaik taphia piah duah laba. Taong abih dom bruk pablei salih jeng lac ngak harak tangin.

Tui ong Nguyễn Trung Hiếu, chuyên gia luật di Đồng Nai, bruk pablei salih ini mbuan hu rilo bala di gah adat hukum, kayua sang daok di labik tái định cư hu brei ka bhap bini taduan đền bù, harak adat quyền pandar taneh hu angan dom urang nan. Kayua yau nan ye, tuk urang pablei mek jien di urang blei blaoh, meda plaih mbaok piah plaih bruk jao. Langiu di nan, bala daok meda rahtabiak dalam tuk ngak harak gar likau harak chứng nhận quyền pandar taneh, kayua harak ni ngak brei ka urang taduan taneh tái định cư, mayah hu pablei tapa tangin rilo mbang ye urang puac di abih meda kan duah tabiak urang akaok meti piah ngak harak gar. Lingiu di nan daok hu bruk, urang ngak po dahlau daok ngak kan kandah dalam tuk ngak harak gar jao taneh, ndok jien gac... 

Ong Lê Văn Tiếp, Phó akaok UBND huyện Long Thành, brei thau, karja pak ni hu thau cambaih bruk pablei salih taneh tái định cư di labik tái định cư Lộc An - Bình Sơn. Piah pasiam bruk ni, huyện Long Thành hu pato tacei dom jabat pambuak tal bruk nan di huyện, di dom xã vil val labik ni paglaong bruk pathau khan, kakei bhap bini jhui pablei taneh tuk ka oh hu jao taneh, kayua bruk ni oh njauk adat hukum saong mbuan tamuh tabiak dom bruk meriak gauk di harei hadei. Gam haong nan, UBND huyện jeng hu harak ieu kakei urang jakar, công chức dom jabat oh hu mbaok tame, oh pambuak pagam tal bruk pablei salih taneh tái định cư, mayah ngak suan njauk langyah biak catang./.

Urang lang: Thu Thảo – 15/03