Đồng Nai daok dalam bhum kinh tế praong gah Meraong negar, lac pasak di jalan mbak pambuak Tây Nguyên, Nam Trung Bộ saong taong abih bhum Đông Nam Bộ. Yaom lac tỉnh ngak kong, gah ngak nong oh ka tal 6% min Đồng Nai tuk halei jeng ba bruk ngak nong, urang nong, palei pala caik di labik praong dalam cak rok patagok kinh tế khang kajap. Dalam thun 2020, yaom kaya nong, kaya glai, kaya ikan  ngak tabiak hu jaik 44 ribau tỷ đồng. Meng nan, jien mek tame kuhria tui akaok manuac di bhum palei pala tagok yaok thun. Kuhria tal thun 2020, jien mek tame kuhria tui akaok manuac di bhum palei pala dalam tỉnh  hu jaik 62 trieu đồng sa urang sa thun, tagok jaik 4,4 mbang dut saong thun 2008.

Dalam cak rok pala drak, Đồng Nai brei salih tapa ngak praong piah  pabak bruk blei pandar dalam negar saong daok pamaong tal bruk pablei tabiak negar langiu. Dalam tỉnh  hu labaih 100ha taneh pala phun cong nghiep lavik thun, jaik 70 ribau ha phun mbang baoh dom janih. Dalam nan, hu rilo taneh pala phun đặc sản dang kaok dalam negar saong padang hu dom bhum pala sa janih phun di taneh praong. Tỉnh padang ngak hu 151 chuỗi pambuak ngak tabiak saong ba pablei, 17 danak dak mblang hamu praong. Ini lac jalan lagaih piah jhul khang bruk pablei  kaya nong di Đồng Nai tabiak negar lagiu dalam tukvak anak tal.

Phaok bi thư thường trực Tỉnh ủy Đồng Nai Hồ Thanh Sơn taong yaom, gah ngak nong hu patagok, bruk ngak tabiak kaya nong hu cak rok drah samar tui jalan cong nghiep haong bruk mblang hamu praong, raong glang cong nghiep. Meng nan, bruk cak rok patagok di gah ngak nong dalam thun ini biak siam yaom lac gaok kan kandah kayua jit ruak Covid-19.

Dalam bruk padang ngak palei pala birau, palei pala birau paglong saong palei pala birau kiểu mẫu, dom palei pataom tame  cak rok patagok bruk ngak tabiak piah oh padeih paglong raidiuk mbang ngui di bhap bini palei pala. Bruk patrun kathaot tuk halei jeng hu sangka meng rilo danak dak, sarak daong njauk lagaih yau: bruk daong pajaih piah patagok pala drak, bruk daong urang kumei kathaot, bruk Urang nong jum pataom ngak kaya meda, patrun kathaot khang kajap…

Tukvak 2008 -2021, dalam tỉnh hu jaik 88 ribau mbang baoh sang kathaot, jaik kathaot di bhum palei pala hu mesre phun jien abih tih 1.709 tỷ đồng. Kuhria rah tapa yaok  baoh sang mesre hu jaik 190 trieu đồng. Bhap bini blei BHYT jeng tagok glaong, hu 85, 45%. Dalam nan, rilo xã palei pala birau kiểu mẫu jaik taong abih bhap bini hu blei BHYT.

Ong Lê Văn Gọi, Phaok yam ndoc Sở Ngak nong saong Patagok palei pala, Phaok Jabat tacei ba Danak dak bruk ngak negar padang ngak palei pala birau tỉnh Đồng Nai brei thau, Đồng Nai daok dalm nyaom dom tỉnh dang akaok di negar ka bruk buh jien tame ngak hạ tầng ka palei pala, abih di nyu lac buh jien tame ngak hạ tầng. Meng thun 2008 tal thun 2021, taong abih yaom jien buh tame ngak jalan mbak palei pala dalam tỉnh labaih 930 ribau tỷ đồng, dalam nan  phun jien meng kadung jien karja tok labaih 7%, daok veik lac phun jien mesre saong phun jien di D.N haong bhap bini.

Danak padang ngak palei pala birau di Đồng Nai mek hu dom jak jeng biak praong, rik daong ngak brei salih birau mbaok meta palei pala, dak harei dak dui katut veik bruk atah di gauk ka cak rok patagok di bhum palei saong bhum đô thị. Ini lac dom jak jeng praong, lac bruk ngak hu meng rik prein, sa hatung hatai haong gauk  di taong abih gah chính trị saong bhap bini./.

Urang lang: Ai Nghiem -5/1/2022