Bilan hè - thu thun 2021, bruk pala drak dalam tỉnh Đồng Nai hu ramik veik ka nyu laghaih haong bruk bahrau. Meng hu langik tasik mbuan laghaih jang, hu aia hajan ginup nan ye mblang taneh pala drak dut haong tukvak ini thun 2020, dalam tỉnh pala drak bilan hè - thu hu jaik 60 ribau ha. Năng suất dom janih phun pala yau padai, njam patam dom janih jeng tagok jang dut haong tukvak ini thun dahlau.

Abih di nyu nan lac, bruk pala dom janih njam hijao, janih pandap daok hu urang blei pandar caik hatai sangka rilo kayua daok kurang labik pabak, kayua gaok kan kandah meng dịch Covid-19, daok hu rilo mbuan laghaih. Dom adit jaik di ini, yaom dom janih njam patam, baoh karaoh jeng tagok yaom jang rilo mbang duk haong dahlau diah, daong ka urang nong chreih hatai piah pala.

Amuk Nguyễn Thị Thủy, urang nong pala njam di xã Xuân Phú (H.Xuân Lộc) khan lac: “Yaom dom janih njam patam yau: njam sabei, njam lang… pablei di bein urak ini yaom meng 15-17 ribau đồng sa kg; tamun aia, baoh daak meng 25-30 ribau đồng sa kg, hu janih tagok tal 40 ribau đồng sa kg... Tui yaom ini, urang nong pala njam hu laba rilo nan ye chreih hatai pala. Rilo janih njam daok jaik tal harei paik, pabak ka darak pasar rilo jang dut haong urak ini”.

Amuk Trần Thị Tú Oanh, Phaok akaok Chi cục Pala drak, khik caga phun pala saong halau aia (Sở Ngak nong saong patagok palei pala) brei thau, gah ngak nong tuk halei jeng tui iek bruk langik tasik, bruk rah tabiak di dom janih halak palai kaik phun pala piah tacei pato dom HTX, tổ pambuak bruk, mblang bein, urang nong ramik veik tukvak trun pajaih, salih janih phun pala saong pandar dom ilamu kỹ thuật bahrau tame bruk pala drak. Nan ye bruk pala drak di dom puk palei jeng hu siam laghaih, abih di nyu lac dom janih njam that hijao jeng pabak hu ka darak pasar.

Anak bruk darak pasar pablei kaya nong gam gam srau kadau kayua gaok kan kandah meng jit ruak Covid-19, gah ngak nong tỉnh hu kuhria caga dahlau, padang jalan pacang caga. Daok jalan ngak katut panak, gah ngak nong kuhria mboh dahlau lac dalam 2 bilan 7 saong 8, dom kaya nong, athur raong dalam tỉnh hu jaik 504 ribau tấn, dalam nan hu: 367 ribau tấn pandap pala drak, 130 ribau tấn kaya pandap meng athur raong, saong 6,4 ribau tấn kaya ikan dalam aia. Ngan haong dom janih phun mbang baoh tui bilan, gah ngak nong sangka tacei pato urang nong ilamu ngak brei tabiak bingu suan bilan piah ramik veik bilan tabiak baoh, bilan paik baoh ka nyu laghaih haong bruk bahrau.

Gah ngak nong jeng caik hatai tal bruk raong glang, abih di nyu lac ngak siam bruk klauk jru patagok pren pacang caga jit ruak ka tapon menuk, ada, athur raong; paglaong bruk khik iek jit ruak saong pasang iek bruk thik ngak ralow, khik kajap bruk siam mekre hacih sa-at pandap panda.

Gah ngak nong sangka tal bruk pathau khan, kakei urang  raong kaya ikan duah thau ka yaom kaom di darak pasar piah ramik veik bruk raong ka nyu laghaih. Dom HTX, tổ pambuak bruk, labik raong praong di mblang bein, baoh sang raong pala kaya ikan dalam aia hu daong ba, tacei pato ilamu kỹ thuật yau: patrun mật độ raong ka nyu laghaih haong langik tasik urak ini; pandar ilamu kỹ thuật raong ka nyu laghaih piah patrun yaom phun, min jeng daok khik hu chất lượng pandap panda piah pabak siam ka darak pasar dalam tuk gaok kan kandah di jit Covid-19./.

Urang lang: Jasi -23/07/2021