Đồng Tháp lac tỉnh taphia negar, hu labik dang praong dalam bruk pacang caga di Quân khu 9 saong di negar. Ngan saong jalan taphia negar atah labaih 50km,  nan ye bruk khik ramik siam mekre salamat taphia negar saong khik hòa bình hu gah mbien phong abih hatai sangka.

Di labik pabah mbang negar pakat dunya Dinh Bà, yaok bilan, dom urang di kapul tự quản bhian peih bruk nao rivang got mốc chủ quyền saong dom dấu hiệu di labik ini. Ong Nguyễn Công Thành, kapul jalan taphia negar cột mốc di pabah mbang negar pakat dunya Dinh Bà lac:

"Camereip kapul hu 13, 14 urang. Hadei ini tagok hu 20 urang. Kayua dahlak sahaneng lac got jamang brei mboh bruk ngak po di taneh ia. Yau nan ye khol dahlak brei patagok bruk khik caga siam ka dua gah".

Taphia bruk duah thau labik ini, dom urang dalam kapul lac dom urang taha umo di tỉnh Đồng Tháp jeng bhian taom gauk, klah rabha ilamu ka gauk piah thau samar di abih. Tuk hu bruk hagait rah tabiak di dua gah jalan tapen negar, hu dom kapul jeng yau dom urang di kapul sumu khan ka Đồn mbien phòng. Tukvak tapa, meng bruk ngak ini bo mikva hu khan brei thau rilo ka bruk kanjak jhak rah tabiak melam di labik ini. Thượng tá Đào Đình Hậu, Akok Đồn Biên phòng 909, Pabah negar pakat dunya Dinh Bà lac: "Kapul urang khik jalan got mốc taphia negar nan yau tangin pambuak atah di gah mbien phong. Taong abih dom bruk ngak suan pambak tal bruk ngak po labik taphia negar saong an ninh trật tự  jeng hu bhap bini brei thau. Dalam bruk padang dom kapul khik jalan taphia negar hu urang taha umo. Khol dahlak biak iek praong bruk ngak di urang taha".

Daok di labik pabah mbang negar pakat Dunya Thường Phước, kapul khik iek jalan got mốc taphia negar hu parabha bruk cambaic laic ngan saong 35 urang di 4 dấu hiệu saong sa got mốc praong. Di dom mbang ginum biai, dom urang nan jeng yau bhap bini bhian brei thau dom bruk kanjak jhiakrah tabiak di labik taphia negar. Meng nan, dom gah chức năng samar thau rilo bruk meng bhap bini saong dom urang di kapul. Ong Hà Văn Oai, Akok Kapul khik iek jalan got mốc di pabah negar dunya pakat Thường Phước daok brei thau lac:

"Urang halei daok jaik got moc nan brei hu bruk tui iek got mốc nan. Meyah hu bruk hagait ye brei khan chip ka akok kapul piah khan ka Đồn mbien phòng thau piah samar langyah. Gam khik salamat  an ninh trật tự di labik drei. Tuk hu bruk hagait rah tabiak  ye Đồn langyah samar jang xã, kayua  xã daok atah labik ini".

Gam saong nan, meda lac, rilo thun tapa, langiu bruk khik iek salamat bhum taphia negar ye bruk pacang caga  pablei salih bleik saleik di Đồng Tháp jeng hu gah mbien phong saong dom jabat karei ngak sumu gauk. Yaok rituh  mbang pajeng ba pandap lậu, pandap pakauk, pandap điển tử…yaom  yaok tỷ đồng hu gah bien phong chap mek. Trung tá Chu Công Thành, Chính trị viên Đồn Biên phòng  917, pabah negar pakat dunya Thường Phước khan lac : "Piah khik salamat bruk ngak po an ninh mbien gioi negar ye khol dahlak thau lac kadha praong camereip brei paglaong akaok sahaneng di bhap bini ka hukum taphia negar. Ngak siam bruk pambuak dua gah negar, piah padang talei rohim di dua negar. Peih bruk jak ba taong abih bhap bini khik iek an ninh negar ye khol dahlak jeng hu iek praong dom kapul khik iek got mốc ".

Meda  meng ngak siam bruk jak ba bhap bini bo tukvak tapa bruk an ninh bhum taphia negar di tỉnh Đồng Tháp tuk halei jeng khik kajap tani tanat. Tapa nan, ba mai salamat ka yaok pluh ribau baoh sang bhap bini daok di 8 xã taphia negar saong dom huyện karei. Langiu di nan, meng bruk sangka di Đảng saong Karja, bruk cak rok patagok kinh tế bhum taphia negar hu rilo salih birau, rik daong praong ka bruk patagok kinh te, khik kajap an ninh salamat bhum taphia negar./.