Hadei di dom siam lagaih meng bruk Rajaei brei adat ngak iek taduan raok tuai dunya tal 5 tỉnh ban dalam 2 bilan tapa saong bahrau di abih lac, Rajaei njauk hatai haong panuac likau di Mintri Jalan mbak Pajeng ba, brei adat peih veik dom jalan par dunya meng harei 1/1/2022, dom doanh nghiệp du lịch di ban raya HCM dak maong akaok bruk pasiam veik darak pasar dunya dalam thun bahrau. Dalam jalan ba tabiak ngak di thun ini, Sở Du lịch ban raya caong lac meda taduan raok jaik 3 triệu 500 rabau mbang tuai dunya. Pak di tuk ini, dom Cty du lịch di ban raya hu ngak dom bruk piah caga ka bruk peih veik pabah mbang darak pasar dunya.

Yaom lac maong akaok pasiam veik darak dunya, min gah du lịch ban raya HCM jeng thau lac darak pasar dalam taneh ia lac bruk praong dalam thun 2022. Piah ka bhap bini chreih hatai haong bruk nao ravang me-in dalam taneh ia, ye dom Cty jeng daok kham merat duah tabiak dom labik bahrau atau ngak bahrau, pasiam dom tour tuyến klak tui jalan "labik nao klak min brei hu janih bahrau". Pagap yau Cty TST Tourist, dalam 2 bilan tapa, gam gam peih rilo mbang nao pasang iek tal Cần Giờ, Củ Chi, ban Thủ Đức haong tỉnh Long An piah ba tabiak dom jalan bahrau piah pabak bruk nao ravang me-in jaik, salamat di rahra hadei di jit praong.

Dalam jalan ngak di thun 2022, gah du lịch ban raya HCM ba tabiak 2 kadha ka darak pasar dalam taneh ia. Kadha ka 1, bruk jit ruak dalam taneh ia hu pasang iek siam, dom bruk ngak du lịch hu mai veik siam mekre bahrau, gah du lịch ban raya meda taduan raok hu 25 triệu mbang tuai dalam taneh ia, tagok jaik 67% duk haong thun 2021. Kadha ka 2 lac, bruk jit ruak oh ka hu pasang iek, ye ban raya meda kham merat taduan raok 18 triệu mbang tuai dalam taneh ia, nan lac tagok 20% duk haong thun 2021. Piah ngak hu bruk ini, gah du lịch ban raya HCM hu padang dom jalan ngak saong peih tabiak ngak meng di puac thun 2021.

Tui bruk “yaok quận huyện sa janih pandap du lịch di drei”, tok dalam 1 bilan tapa, langiu di Cần Giờ, Củ Chi, dom labik karei yau ye: Hóc Môn, Nhà Bè, Bình Chánh,... hu pambuak haong dom Cty du lịch, ngak hu pandap di drei. Taphia di nan, du lịch jalan ia, du lịch ngak nong, sinh thái, atau dom janih bahrau yau ye tour radaih juak, tour bus jalan kraong, radaih bus 2 tal, vah ghe angaok kraong,... gam gam hu peih tabiak ngak veik saong hu ngak bahrau, jeng daok ngak tabiak mbaok meta bahrau ka gah du lịch ban raya. Meng bruk kham merat, sa hatung hatian haong gauk di dom mban ngành haong dom doanh nghiệp, jia lac du lịch ban raya  HCM hu siam veik khang kadang dalam thun 2022./.

Urang lang: M.Phuong -8/1/2022