Ganesha lac yang patuah, hu ilamu, lac anek likei di yang Shiva haong amuk yang Parvati

Rup patau Ganesha (hu ngak meng patau cuah; ký hiệu BTC 5; glaong 95cm, atah 48cm, praong 34cm) hu Viện Viễn Đông Bác Cổ Pháp (EFEO) duah mboh di thun 1903 tuk peih bruk roh duah di bimaong kalan E5 dalam nyaom E (tui bruk parabha nyaom di dom urang roh duah lac urang Prang) di inem krung Mỹ Sơn, tỉnh Quảng Nam. Hadei di nan, rup patau hu ba mai khik piah saong saong yaih khan di Miuyim meng thun 1918.

Tui dalikan di urang Kling, Ganesha lac yang patuah, hu ilamu, lac anek likei di yang Shiva haong amuk yang Parvati. Ganesha lac 1 dalam dom yang lavik saman abih di dom baoh kalan Hindu saong jeng lac 1 dalam dom yang hu anit ranam di abih kayua hu prein yam tapa dom kan kandah, tavak tavaiy dalam raidiuk. Dalam ilamu sarak di agama, yang Ganesha bhian hu ngak yau sa urang likei biar katut, limek, tian praong, hu akaok limen haong 2 gah tangin, atau 4 tangin, atau rilo tangin jang. Yang hu pok kakuh biak rilo dalam dom urang tui agama Hindu, meda mboh di Kling, Sri Lanka, Bangladesh, Nepal haong rilo taneh ia dalam bhum Đông Nam Á. Di Việt Nam, yang Ganesha hu mboh dalam ilamu Champa haong ilamu Óc Eo (Phù Nam).

Yang Ganesha oh hu mboh rilo dalam dom pandap sarak Champa daok hu khik piah tal harei ini. Ini lac sa dalam dom rup patau gul takik hu, brei mboh yang daok medeih dang, daok yau jaik tamo, praong saong ndung bak ilamu dalam vaktu aval – lac abap VII – VIII, di ilamu sarak meng kan ini.

Rup patau Gajasimha (ngak meng patau cuah; ký hiệu BTC 221; glaong 215cm, atah 100cm, praong 84cm) hu duah mboh dalam mbang kuac raok di Tháp Mẫm (Bình Định) thun 1933-1934 kayua Viện Viễn Đông Bác Cổ Pháp (EFEO) ngak. Hadei di nan rup patau hu ba mai Miuyim meng thun 1935.

Gajasimha (atau Lamen – Sư tử) lac sa athur ginreih dalam dalikan Kling hu akaok lamen saong rup sư tử. Akaok lamen yau brei mboh prein khang di yang saong rup sư tử lac brei mboh jayah, uy quyền di sa ong patao. Di dom bimaong kalan, rup patau Gajasimha hu caik anak pabah mbang yau piah khik bruk ginreih, bruk praong glaong ka labik nan. Dalam ilamu sarak Champa, rup patau ini hu mboh ralo tapa ralo vaktu saong hu ngak meng ralo janih yau ye patau cuah, haluk am cuh; rup patau hu ngak gul vil atau lac phù điêu piah tual iek ka nyu mekre … Duk saong dom rup patau hu asal kadha yau nan hu duah mboh, rup patau urak ini daok hu khik piah di Miuyim Điêu khắc Chăm lac rup patau praong abih saong daok tamo, brei mboh yau ginup abih dom hagait di drei athur ginreih Gajasimha. Lingiu di nan, rup patau daok brei mboh bruk gheih tangin saong hadah krah dalam ilamu ngak rup patau di urang Champa klak, gam haong bruk gheih pambuak dom hagait di athur biak di gah lingiu haong athur ginreih dalam dalikan, dalam agama. Rup patau ndung bak ka ilamu di 1 dalam dom vaktu hadei abih – hu dom urang roh duah sajarah, ilamu hu angan je dak tame sa jalan ngak karei nan lac jalan ngak di Tháp Mẫm, abap XII – XIII, dalam tukvak angaok jalan patagok di ilamu sarak Champa./.

Urang lang: M. Phương – 11/02