Urang nong hu peih bruk ngak mbang pablei salih 

Yaok thun, labik ngak aia mesin Cá Đen (di Phan Thiết, Bình Thuận) ngak hu labaih 100 ribau lít aia mesin. Hu peih labik pablei di bilan 11/2019, min kayua jit ruak Covid-19 nan ye dalam thun 2020 ia mesin mek hu tanut 4 patuk OCOP 2020 di Bình Thuận tok pablei hu dom pluh ribau lít. Ong Huỳnh Văn Dung, Yam ndok Cty TNHH Cá Đen brei thau, bruk sàn pablei salih điện tử Bình Thuận tabiak rai lac kadha bui sambai daong ka doanh nghiệp meyaih khan pandap panda siam jang tal tuai damuai urang blei pandar:

Khaol dahlak jeng caong khin tuk hu bruk ini piah meyaih khan haong ayut sahabat daok di negar langiu thau ka aia mesil meng kan di drei, janih pandap ini nyu hu meng dom rituh thun blaoh di Phan Thiết, Bình Thuận.  

Amuk Trần Thị Bảo Trâm, po labik ngak Yến sào Trường Ca (di bal Phan Thiết, tỉnh Bình Thuận) ndom lac, dalam tuk hu jit ruak Covid-19, bruk meyaih khan pablei salih tapa internet lac njauk hu kayua nyu meda daong ka doanh nghiệp tỉnh Bình Thuận trun hu rilo jien ndo yau: jien pah urang dang pablei, jien pah labik pablei... saong jeng hu daong ka urang blei palih ruah hu dom janih pandap siam, yaom kaom mbiah, laghaih:

Grap tanat yaom nan lac sa dalam dom bruk piah ka doanh nghiệp atau urang blei sahanag hatai ka yaom jien buh tabiak. Yaom kaom hu tut angan brei thau blaoh saong meyah hu danak dak pachreih urang blei ye njauk tut angan tapa Sở Công thương. Nan ye yaom kaom atau taong abih bruk hu khan brei thau di Sở Công thương angaok sàn giao dịch ini, ye dahlak saneng lac nyu biak hu kein laba, kadua nan lac grap tanat saong ba mai hatai jia glaong ka urang blei pandar.

Piah daong ka doanh nghiệp di 3 tỉnh jaik taphia gauk lac: Bình Thuận, Ninh Thuận saong Lâm Đồng pambuak bruk haong urang blei pandar saong meyaih khan pandap panda,  Sở Công thương Bình Thuận hu padang danak dak “Padang sàn pablei salih điện tử daong pambuak pagam bruk pablei salih di 3 tỉnh Bình Thuận, Ninh Thuận saong Lâm Đồng”. Puac thun 2020, danak dak hu Mentri Công thương pasang iek, brei ngak. Tal urak ini, Bình Thuận hu ngak salah blaoh abih bruk saong daok cang Cục Pablei salih điện tử saong Kinh tế số brei tapa. Yaom lac oh ka peih tabiak ngak, min hu labaih 10 labik ngak mbang pablei salih saong dom công ty tut angan tame sàn pablei salih điện tử di Bình Thuận.

Ong Đỗ Xuân Lâm, phaok Jabat khik iek darak pasar pablei salih, Sở Công thương Bình Thuận brei thau, ngan haong dom công ty, labik ngak mbang pablei salih di Bình Thuận tuk akaok mereip hu mbaok tame sàn giao dịch meda gaok rilo kan kandah. Min Sở meda hu pato pathram cambaih laih piah ka urang meda pambuak hu haong menuac blei pandar tapa sàn pablei salih điện tử:

Dom doanh nghiệp, dom labik ngak mbang pablei salih brei hu sa urang ngak thau cambaih công nghệ thông tin piah thau jalan pataom mek pabak dom thông tin ka pandap panda di doanh nghiệp, di labik ngak nan tagok Sàn pablei salih điện tử, ye bruk ini daok gaok kan kandah. Sở jeng hu jalan ngak lac hadei di tuk abih jit ruak Covid, Sở Công thương njauk pambuak bruk haong Cục Pablei salih điện tử saong Kinh tế số peih dom tal pato pathram ka bruk ngak ini.

Gam haong nan, Sở Công thương Bình Thuận daok pambuak bruk haong Cục Peih bruk Pablei  salih – Mentri Công Thương daong ka baoh thanh long hu mbaok angaok dom sàn pablei salih  điện tử dalam negar saong angaok dunya yau: Shopee, TiKi, Sendo, Lazada,… tapa nan, daong ka doanh nghiệp meyaih khan saong pablei pandap. Dalam tuk jit ruak Covid-19 yau urak ini ye bruk ba pandap panda tagok sàn pablei salih điện tử meda lac sa jalan pablei salih praong daong ka doanh nghiệp Bình Thuận pambuak hu siam jang haong urang blei ./.

Urang lang : Jasi -25/7