Tuk bhap bini nao iek ruak njauk khik ramik thẻ BHYT, harak gar hu thaot binguk di drei, plaih di bruk njauk kol jak nyu co klaik

Labaih 2 bilan, 80 mbang nao iek ruak di 18 labik y tế dalam bal raya HCM, urang ruak Nguyễn Tuấn Khôi hu rilo sang iek ruak brei dom đơn jru rilo mbang yau gauk. Kadung jien BHYT njauk ba-yar labaih 60 triệu đồng ka bruk pasang iek ruak biak karei ini. Tui gah BH Xã hội (BHXH), dahlau daih jeng hu dom bruk dreih yau nan, yau bruk iek ruak labaih 50 mbang di 8 sang iek ruak di bal raya HCM. Urak ini gah BH hu ba hồ sơ tapa công an piah pasang iek, duah thau.

Ini lac dua dalam yaok rituh bruk duah kein laba meng BHXH. Bahrau ini, amuk Nguyễn Thị Thùy Lan (daok di quận Phú Nhuận) khan lac: amuk OH nao iek ruak di Sang iek ruak đa khoa Thủ Đức, Sang iek ruak Hòa Hảo, min hu harak gar iek ruak rilo mbang di dom labik ini. Jabat BHXH bal raya hu khan brei dom labik y tế thau, njauk khik veik urang nao pasang iek ruak pandar mã thẻ di amuk Lan.

Bác sĩ Kim Phúc Thành, Akaok Jabat Kế hoạch tổng hợp Sang iek ruak bal Thủ Đức brei thau, Sang iek ruak mboh hu dom urang ruak pandar BHYT nao nyim, atau co klaik hu di urang karei. Bác sĩ Thành dahlau daih hu iek ruak ka sa urang ruak daok ranaih umo min mã thẻ BHYT lac di sa urang hưu trí. Tuk tangi sua tal bruk ngak, urang likei nan brei thau lac daok ngak công nhân, ngak bruk di khu công nghiệp... Tuk thau lac bác sĩ mboh hu bruk bleik saleik di drei saong iew bảo vệ ye urang likei nduac nao lahik: “Urang ruak hu nao iek ruak di sa labik karei blaoh ka mai tal sang iek ruak Thủ Đức, tuk pasang iek thông tuyến ye mbohbruk iek ruak dahlau di nan. Bác sĩ ieu ba toa jru tabiak piah iek, piah thau tái khám dom mbang rilo atau takik, biak di nyu hu njauk ruak halei oh, piah ramik veik la nyu laghaih.”

Amuk Nguyễn Thị Thu Hằng, Phaok akaok BHXH bal raya HCM brei thau, meng thun 2017, gah BHXH hu jamriak thông tin giám định, dalam nan hu khik veik bruk iek ruak di urang. Piah thau urang iek ruak duah kein laba ka drei halei oh, ye tagok hệ thống pasang iek thông tuyến, blaoh đối chiếu CMND, harak gar di urang nan haong thẻ BHYT.... Yaom lac bruk pasang iek ini abih biak takik tukvak, min hu oh takik sang iek ruak caik brei tapa dom bruk duah kein laba BHYT kayua kurang tame phần mềm duah thau, urang y tế oh ka peih bruk pasang iek…. Gaok mai daok hu mboh dom sang iek ruak oh caik hatai tal, oh khik iek hu ruak mãn tính, brei đơn jru yau gauk rilo mbang ka sa urang ruak; oh ba thông tin tagok dữ liệu di BHXH njauk tukvak tui adat hukum. Min bruk yau nan jeng njauk BHXH oh brei ba-yar veik jien: “Dom sang iek ruak njauk khik iek urang ruak ka nyu catang, pasang iek bruk iek ruak di urang ruak. Urak ini hu thông tuyến, urang ruak hu quyền nao taong abih dom labik iek ruak tui hatai caong khin, tui ruak, min oh brei trùng lặp. BHXH hu ngak hệ thống công nghệ thông tin, công nghệ piah pasang iek bo urang ngak dalam sang iek ruak oh pandar ye oh klah gaok bruk nan.”

Jeng tui BHXH bal raya HCM, ngan haong dom urang pagam pambak tame, duah kein laba meng BHYT, jabat BHXH payua thông tin nao tal dom jabat hu thẩm quyền yau Sở Y tế piah taong phạt, nao tal jabat công an piah pasang iek, langyah tui Bộ luật Hình sự. Anak meta mboh lac, hu biak rilo urang njauk taong phạt hành chính, atau kaoh duas hình sự jaik 10 thun guk.

BHXH saong Sở Y tế TPHCM daok hu panuac kakei dom labik iek ruak ngak njauk tui bruk ba dữ liệu tame tuk urang ruak tabiak truh sang iek ruak piah khik iek thông tuyến; pasang iek hồ sơ ruak mãn tính piah plaih brei toa saong tacei pandar dịch vụ rilo mbang yau gauk. Gam haong nan, tuk bhap bini nao iek ruak njauk khik ramik thẻ BHYT, harak gar hu thaot binguk di drei, plaih di bruk njauk kol jak nyu co klaik./.

Urang lang: Jasi – 05/04