Daoh ragu daoh bhap bini bhian hu urang Chăm peih tabiak dalam dom harei pataom bhap bini, dom rija roya… Dalam bruk ngak mbang pala drak, mikva jeng daoh brei cadu glaih glar. Panuac daoh nan, lac dom baoh panuac hu ralo rai palih ruah, ngak jeng dom panuac ariya hu rilo ragu ragam, urang pang meda duah mboh dalam nan dom ilamu diuk rai, jalan ndom puac daok dang… Tuk ragu ragam, panuac daoh yava tagok, urang pang ba drei tame nyu, sahneng..bloh hadar. Kol drei gam pang amuk Qua Thị Hồng Loan – sa dalam takik urang daok khik hu dom kadha daoh bhap bini Chăm di palei Lạc Trị, xã Phú Lạc, huyện Tuy Phong, tỉnh Bình Thuận daoh sa kadha daoh bhap bini Chăm ndom ka bruk anit ranam gauk di dam dara:

Kadha daoh: Caik hatian

Caik mei leiy caik hatian/ meng sit mei leiy tal prong/ tal mbuk  tal mbuk  poh araong/ mai hu mai hu ka urang).

Meng labaih 20 panuac, meng nhịp 4 - 6 tuk biar tuk glaong tui nhịp paranưng dalam dom rija roya meng kan di urang Chăm, kadha daoh ndom tagok hatai jai di urang likei tuk maong urang drei ranam nao tok pasang.

Jeng ndom ka bruk anit ranam gauk min oh jeng diuk jeng pasang hu kayua sang kan kathaot, oh môn đăng hộ đối, nyu jeng paga pacang, neh rabha dom likei kamei. Kol drei pang amuk Hồng Loan daoh veik sa ragu daoh bhap bini Chăm hu asal mbuah kan thar vak. Meng nhịp điệu 3-3, 3-4, meng panuac daoh mộc mạc, nyim rup binguk asal brah: asar brah bak saong asar brah pait piah ndom tagok panuac mbuah kan.

Kadha daoh: Than thân trách phận

Langik halei halei/pajeng adei mai/sa-ai nyu leiy/mai leiy adei mai.

Urang yau/urang yau urang yau padai/adei yau/adei yau/sa-ai nyu leiy ralang leiy ralang.

Jeng hu asal yau nan, min amuk Thiên Thị Mẫn daok di palei Vân Lâm, xã Phước Nam, huyện Thuận Nam, tỉnh Ninh Thuận daoh tui jalan daoh ru. Tapa nan kol drei mboh hu bruk phong phú saong đa dạng meng asal tal jalan daoh kadha daoh bhap bini Chăm.

Kadha daoh: Than thân trách phận

Tui dom urang ruah duah ilamu Chăm, dom kadha daoh bhap bini Chăm bhian ndom tal dom asal kadha yau: pok glaong dhar phon di amaik ame, bruk kham merat ngak mbang pala drak, daoh ru, daoh hội saong ralo di abih nan lac bruk anit ranam gauk … Meng rilo ragu daoh karei di gauk, meng dom panuac daoh lai li-an yaom lac pang mboh drut drui min nyu jaik saong rai diuk di urang Chăm. Amuk Thiên Thị Mẫn brei thau:

  Meng lavik mai drei lac urang Cham doh Cham saoh, doh ru anek

Ndom ka bruk gheih mekre di kadha daoh bhap bini Chăm, ong Thập Liên Trưởng – akaok duk ruah duah, pasak ruah duah ilamu Chăm Ninh Thuận brei thau:

Dom kadha doh Cham meng kan piah veik biak bingi pang. Nyu nan lac yau pandap  mbang ia menyum   

Taphia dom ragu daoh bhap bini Chăm meng kan, dom thun jaik di ini, dom nhạc sĩ, nghệ sĩ urang Chăm hu ruah dauh, paneh tabiak tui dom ragu bhap bini meng kan ngan saong ilamu nghệ thuật glaong jang. Min, dom kadha daoh ini jeng daok takik saong dam dara Chăm harei ini jeng oh ka mbak carak saong ragu ragam meng kan di bangsa drei. Nan lac sa paga pacang praong piah khik ramik saong patagok ragu daoh bhap bini Chăm. Amuk Qua Thị Hồng Loan caong khin lac:

Hulin mboh dom kadha doh Cham biak gheih, meng panuac doh tal lagu hu ba tame hatung hatai.

 Ngak hagait piah ragu daoh bhap bini Chăm daok khik hu dalam dòng nhạc barau patagok khang yau urak ini daok lac bruk duh hatai di ralo urang saong dom gah chức năng./.