Urang bac daok huac dom sang bac đại học hu eng drei khik ramik lac tagok jien bac 

Tuk dom sang bac đại học hu eng drei khik ramik ye bruk tagok jien bac lac meda rah tabiak kayua urak ini labaih 80% jien mek tame di dom sang bac lac meng jien bac. Tui Tiến sỹ Lê Trường Tùng, akaok kapul khik ramik Sang bac Đại học FPT, hu 3 gah njauk sangka tuk dom sang bac đại học peih bruk eng drei khik ramik nan lac jabat khik ramik karja, dom sang bac haong urang bac. Meyah jabat khik ramik haong sang bac peih ngak oh siam, mbuan ba tal bruk urang bac sahneng lac eng drei khik ramik hu makna lac buh jien bac rilo jang bo oh mboh hu dom kein laba di bruk eng drei khik ramik đại học ba mai: “Kol dahlak sahneng lac, bruk langyah brei thau lac praong di abih, nan lac langyah brei ka urang bac thau. Dom salih karei ini meda ba mai kein laba ka urang bac. Jien bac meda buh rilo jang, min praong di abih nan lac kein laba di urang meda hu rilo jang yaom jien bo urang buh tame.”

Tui jalan ba tabiak, dom sang bac đại học hadei di tuk ginup kadha eng drei khik ramik, meda brei thau yaom jien bac tui jalan kuhria njauk, kuhria ginup yaom jien pato pakai, nan ye jien bac đại học anak tal meda tagok jang 2 mbang duk saong urak ini. Dalam thun bac 2020-2021 ini, dom sang bac đại học công lập eng drei khik ramik meda mek jien bac meng 20 triệu meteh tal 50 triệu meteh sa thun, glaong jang meng 2 tal 3 mbang meteh duk saong yaom jien bac danak dak yau nan di sang bac oh ka hu eng drei khik ramik. Phó Giáo sư- Tiến sỹ Vũ Thị Lan Anh, Phó Hiệu trưởng sang bac Đại học Luật Hà Nội mboh lac, bruk tagok yaom jien bac lac 1 dalam dom bruk oh siam tuk dom sang bac đại học eng drei khik ramik: “Eng drei khik ramik đại học pambuak pagam haong eng drei khik ramik jien padai saong dom labik pato pakai tok sangka rilo tal bruk patagok yaom jien mek tame meng jien bac.Bruk nan ba tal oh samu gauk saong patakik jalan bac megru di dom menuac kan kathaot. Atau hu bruk patagok meriak gauk oh siam di dom labik pato pakai sa gah yau gauk. Piah patrun yaom jien bac ye urang patrun chất lượng, pandar tapa prein di labik pato pakai saong taong abih bruk nan meda ngak jeng paga pacang piah kan ngak hu dom bruk ka eng drei khik ramik đại học.”

Rilo panuac ndom lac, piah kuhria jien bac njauk iek tui yaom jien pato pakai 1 sinh viên, min urak ini oh ka hu jabat halei tacei pato dom labik pato pakai đại học ka jalan kuhria. Daok tanut ka kinh tế - kỹ thuật (hu Mintri Pato Megru tacei pato dom sang bac meng thun 2014) min biak kan piah ngak tui di tuk yau urak ini. Dalam. tukvak bahrau ngak tui bruk eng drei khik ramik jien bac, bruk dom sang bac ba tabiak yaom jien bac tui hatai lac kan plaih hu. Kayua yau nan ye, dom jabat khik ramik tui iek kajap saong ieu dom sang bac langyah brei thau tuk mboh hu bruk oh siam saong langyah meyah mboh lac njauk ngak piah padang hatai jia ka urang bac./.

Urang lang: M. Phương – 26/12