Rilo F0 halar hatian mai veik sang iek ruak dã chiến daong y bác sĩ mong iek, daong ka dom F0

Gah dalam duk cấp cứu di Sang iek ruak dã chiến ka 3, phường An Khánh, ban Thủ Đức, ban raya HCM - labik cấp cứu urang ruak COVID-19 trak - tok hu sap mac suak yava, gam haong mùi jru pametai anek ruak. Dom gru jru pak ini thei jeng jan van haong bruk ngak, piah taong ruak ka urang ruak.  

Nguyễn Minh Quang (ndih tapui thun 1988, daok di quận Bình Tân) pachreih ong T. luai suan haong mac suak yava ngan haong chỉ số SpO2 daok tok 70%: “Kham merat nao ong nye, khaol dahlak tuk halei jeng daok taphia ong, ong brei khang hatai jia, dom harei tra ong khang kadang gilac saong hu nao sang haong anek taco”. Hadei di dom panuac pachreih bak hatai ranam nan di Quang, ong T. drut droi, yuh akaok. Quang nan lac urang halar hatian daok ngak bruk di Sang iek ruak dã chiến ka 3, yaok harei daong ka dom gru jru mong iek, salih mac oxy bahrau ka dom urang ruak COVID-19.

Harei 2/8, Quang tame sang iek ruak, hadei di 14 harei taong ruak ye abih ruak. Quang tabiak truh sang iek ruak nao sang patui veik bruk daok karei tui adat. Dalam dom harei taong ruak di sang iek ruak, mboh y bác sĩ labik ini ngak bruk biak glaih glar, bhian kurang ndih min jeng abih hatai rivang iek urang taha, sangka tal urang ruak daok ranaih umo. Hatung hatai di kapul urang gru jru di labik ini, lac pren khang piah ka Quang yam tapa bruk oh njauk hatai di urang dalam sang di drei piah ngak harak likau mai veik sang iek ruak piah daong mong iek F0.

Quang khan lac: “Dom hagait bo sa-ai hu yam tapa blaoh saong ja yah ruak kik ye drei saneng lac dalikan di drei meda ngak brei ka dom cei dom anai prong thun pachreih hatai piah yam tapa jit ruak”.

Jeng lac F0 hu taong abih ruak di Sang iek ruak dã chiến ka 3 saong tut angan daok veik mong iek dom F0 karei, urang likei sinh viên Nguyễn Duy Khánh (palei daok di Quảng Ninh) brei thau, hadei di 14 harei brei daok karei di sang, hu manuac urang dalam sang njauk hatai, sa-ai likau mai veik sang iek ruak. Yam tapa huac kanda ka jit ruak, Khánh pambak prong dom kadha siam gheih, daong ka manuac sia thau cambaih jang ka jit ruak, thau jalan paglaong pren pacang ruak, yam tapa saong khang hatai jia dalam tuk daok taong ruak.

Khánh brei thau: "Dalam duk cấp cứu hu rilo urang ruak prong thun hu ruak dalam rup, dahlak mong mboh ye saneng tal ong amuk di drei.  Dahlak mboh dom urang nan yau gauk gar di drei nan ye caong khin daong ka dom urang nan. Min dom hagait dahlak ngak oh hu hagait prong. Dut haong dom gru jru pak ini, pren yava di dahlak buh tabiak lac biak sit".

Duy Khánh caong lac dom urang ruak njauk saneng ka nyu chreih chai piah ja-yah jit ruak saong plaih atah jalan saneng oh siam. Khánh ndom lac: “Urang jakar y tế ngak abih pren paje, dom urang ini jeng  mong abih jit piah mai veik haong bao sang di drei, nan ye yaok urang drei njauk jak gauk kham merat hasit”.

Ndom biai haong urang vak di VTC News, bác sĩ Phạm Trường An, Phaok akaok Khoa lâm sàng, Sang iek ruak dã chiến ka 3 brei thau, urak ini sang iek ruak hu 10 urang halar hatian daok daong ka y bác sĩ mong iek urang ruak F0 saong hu jaik 20 urang payua harak likau mai veik min sang iek ruak oh ka ramik hu labik ndih daok ka dom urang ini, nan ye oh ka taduan. Tui bác sĩ An, dom ayut halar hatian pak ini ngak bruk biak abih hatai, meng bruk cakon dom bình oxy, mong iek dom urang ruak  F0... biak tani tanat saong ngak njauk tui hukum di sang iek ruak. Dom ayut F0 tuk abih ruak hu mbaok tame bruk halar hatian ye thei jeng oh huac glaih glar, kan kandah saong oh caong khin “chế độ” hagait. Yau nan min, adei sa-ai pak ini mong mboh dalam vaktu ngak bruk, dom ayut biak glaih glar nan ye hu likau haong urang dang akaok sang iek ruak daong sa binah halei piah adei sa-ai hu pabak pren khang ngak bruk yam tapa vaktu jit ruak”.

Gru jru Bùi Thị Kim Kha – urang taong ruak ka Minh Quang saong Duy Khánh brei thau, tapa sa adit dom ayut mai veik sang iek ruak, gru jru biak drut droi saong iek prong hatung hatai di dom ayut.

Tui bác sĩ Kha, kayua urang jakar y tế oh pabak ginup nan ye oh tuk halei jeng daok jaik taphia urang ruak hu. Tuk ini, dom F0 abih ruak pak ini lac gah tangin pambuak atah piah samar mboh dom hagait salih karei oh siam ka prein yava di urang ruak dalam labik di drei khik iek saong khan brei ka y bác sĩ thau piah mai iek ruak, patrun biak rilo trak damak ka urang jakar y tế.

Bác sĩ Kha khan lac: “Meyah oh hu hatai anit ranam manuac urang, dahlak saneng lac takik thei daok veik piah mong iek F0 yau dom ayut nan. Dahlak caong lac meda hu rilo jang urang halar hatian yau nan...”./.

Urang lang: Jasi – 08/09