- Khoa Nhiễm – Thần kinh, sang iek ruak Nhi đồng 1 ban raya Hồ Chí Minh dalam dua adit jaik di ini hu taduan jaik 12 uranaih njauk viêm não saong 30 uranaih njauk viêm màng não daok ndih iek ruak. Dalam dom bilan karei dalam thun, tok hu 5 mbang uranaih njauk viêm não saong 12 uranaih njauk viêm màng não ndik iek ruak di ini. Daok tui kuhria mboh di sang iek ruak Nhi đồng 2, kuhria meng akaok bilan 4 – lac tukvak tame bilan pandiak khang tal urak ini, hu 27 uranaih njauk viêm màng não ndih iek ruak di Khoa Nhiễm. Dom bác sĩ brei thau : dom rauk viêm não, viêm màng não bhian hu rilo di bilan pandiak saong tuk salih bilan. Bruk njauk biai nan lac ruak rah tabiak biak samal. Hu uranaih pandiak sa harei ye njauk tame sang iek ruak thở máy. Saai Thị Nhung, umo 30 thun daok di Bình Phước, hu anek kumei 6 bilan tame sang iek ruak piah iek ruak viêm màng não di sang iek ruak Nhi đồng 1 khan lac :

 “Anek viêm màng não hu laneh, tal urak ini lac 3 adit. Daok di sang nyu pandiak 1 harei, gam pandiak gam tagalaoh ta-ok gam aih traoh nan ye tame  iek ruak di sang iek ruak đa khoa huyện. Ndih pak nan 6 harei, min oh trun ruak nan ye likau ba tagok mai pal ini. Bác sĩ chẩn đoán gam viêm màng não hu laneh gam nhiễm trùng jalan meik”.

Ruak viêm não, viêm màng não kayua nhiễm siêu vi saong vi khuẩn. Min, triệu chứng akaok mereip jeng dreih gauk saong dreih yau dom ruak kayua nhiễm siêu vi ba tal: pandiak, patuk, tagalaoh ta-ok, aih traoh…Ngan saong dom uraniah tame sang iek ruak kayua viêm màng não tok hu jaik 15% lac trak. Dalam tuk nan, meyah tame sang iek ruak ye meda lac dom uraniah njauk viêm não jeng lac trak, dalam nan jaik 30% njauk suak yava meng jamriak. Saai Bùi Thị Trúc Linh, umo 26 thun, daok di Kiên Giang, hu anek 6 thun njauk viêm não brei thau :

“Tuk bahrau ruak, adei pandiak, ndih rilo, pandiak jaik 38 độ min, oh ka tal 39 độ. Bác sĩ lac viêm não Nhật Bản. Ruak tok pasiam hu dalam dom bilan atau dom thun, oh meda thau dahlau hu.”.

Dom bác sĩ kakei lac: tuk amaik ame mboh ruak trak jang yau pandiak glaong oh trun, taglaoh ta-ok, pandik akaok miat, khin ndih, klak mbang, klak mam njauk ba uranaih nao sang iek ruak, kayua tok ngak xét nghiệm saong tui iek meng duah mboh tabiak ruak viêm não, màng não. Bruk njauk biai nan lac, viêm não, màng não meda caik veik dom di chứng biak trak ka uranaih. Bác sĩ Trương Hữu Khanh, akaok khoa Nhiễm – Thần kinh, sang iek ruak Nhi đồng 1 brei thau :

“Di chứng viêm não màng não lac uranaih diuk min oh thau hagait. Di chứng ini meda dui atah biak rilo thun, iek glang uranaih biak glaih glar. Hadei di nan uranaih njauk viêm phổi veik, bloh metai. Di chứng ka 2 lac uranaih suai praong, bac da-a takik thau. Di chứng patui di nan lac tangin, takai limin lamuac, não hu ia atau tangaoh”

Dom bác sĩ daok kakei lac, tuk njauk viêm não, viêm màng não bhian di nyu uranaih nyu pandiak glaong chip. Ngan saong uranaih njauk viêm màng não meda gam tui triệu chứng patuk, haok ia dung, daok uranaih viêm não oh hu dom triệu chứng ini. Meyah caik uranaih hôn mê blaoh meng ba tame sang iek ruak bhian oh siam. Piah pacang plaih ruak viêm não, viêm màng não, amaik ame langiu di bruk ba anek nao klauk jru caga ginup, njauk khik caga pren pacang ruak ka uranaih tuk lingik salih bilan, iek ka abih ruak viêm tangi, dung, tanrakaong piah plaih virus mbang tagok não./.