Jaik sa bilan ini mai, amuk Chamaléa Thị Khánh daok di palei Đá Liệt, xã Phước Kháng, huyện Thuận Bắc biak bui sambai kayua hu dom pakat, dom ngành buh jien tame ngak, ba ia hacih brei saoh ka baoh sang amuk. Dahlau daih, tuk pandiak pandiak, baoh sang amuk Khánh bhian kurang ia pandar, min urak ini, hu ia meng bingun khoan kayua sở tài nguyên saong môi trường tỉnh pasiam veik, amuk Khánh hu ia pandar pak dalam bilan pandiak bhang. Amuk Chamaléa Thị Khánh lac:

 “Bilan hajan pandar ia craoh, rok bingun, karja ba ia nduac mai tal baoh sang tuk bilan pandiak ini drei brei patak pataom ia”.

Palei Đá Liệt, xã Phước Kháng hu labaih 110 baoh sang, ralo meng lac baoh sang kan kathaot, diukrai pagam pambak tame bruk ngak nông saong ia pandar mek meng kraong, craoh. Thun 2012, mintri tài nguyên saong môi trường buh jien tame ngak 2 baoh bingun saong tal bilan 7/2014, UB bhap bini xã Phước Kháng pambuak saong sở tài nguyên saong môi buh jien tame ngak pasiam veik dom mac njuk saong pabak bồn caik piah pabak ia pandar ka bhap bini palei Đá Liệt. Abih di nyu nan lac, meng akaok bilan 4/2015, UB bhap bini xã Phước Kháng hu buh tabiak meng kadung jien karja saong miễn phí jien pandar ia di bhap bini palei Đá Liệt, piah patrun kan kandah ka mikva dalam bilan pandiak. Ong Đậu Khắc Chính- phaok akaok Ủy ban bhap bini xã Phước Kháng, huyện Thuận Bắc brei thau:

 “Kol dahlak ngak pasiam veik hệ thống, ba bồn tagok gloang saong caik hệ thống nding ia tapen 2 gah piah hu ia hacih ka mikva. Thun 2015 pandiak bhang khang min palei Đá Liệt hu ia ginup piah pandar. Dalam xã labik halei jeng kuhrang ia min hệ thống ia Đá Liệt tuk halei jeng hu ia brei ka mikva pandar. Kol dahlak daok likau adat sở tài nguyên đầu tư dom baoh bingun khoan di dom palei, sở tài nguyên jeng hu danak dak”.

Piah pacang pandiak bhang, akaok thun ini, sở tài nguyên saong môi trường Ninh Thuận saong dom huyện hu nao pasang iek 23 bingun khoan saon pasiam veik dom  bingun khoan ba ia pandar daok hu yau urak ini. Taphia di nan thăm dò saong khoan barau dom baoh bingun ka dom labik kurang ia biak khang, yau palei Nha Húi, xã Mỹ Sơn saong palei Suối Le, xã Phước Kháng saong yaom jien abih tih labaih 1,3 tỷ đồng. Meng nan bo mikva daok di labik ini hu ginup ia pandar dalam bilan pandiak thu. Ong Nguyễn Bảo Triều, phaok akaok duk Tài nguyên ia saong Khí tượng thủy văn, Sở Tài nguyên–Môi trường Ninh Thuận brei thau:  

 “Duk tài nguyên ia saong khí tượng thủy văn pambuak bruk saong liên đoàn đại chất thủy văn Nam Trung Bộ pasang iek dom labik  pandiak bhang dalam tỉnh, saong piah xã hội hóa bruk pacang pandiak bhang saong ba ia ka bhap bini, sở hu pambuak bruk saong tỉnh đoàn ieu dom urang daong puk palei padang ngak  dom bingun khoan piah daong bhap bini oh kurang ia dalam bilan pandiak”.

Kayua hu bruk ba tangin tame di dom pakat, dom ngành, dalam nan hu gah tài nguyên saong môi trường, bhap bini daok di bhum pandiak bhang, abih di nyu nan lac bhap bini banagsa Glai dalam tỉnh NT hu ginup ia hacih pandar dalam bilan pandiak bhang biak khang yau urak ini./.