Mblang hamu padai di palei Mrông Yố I, xã Ia Ka, huyện Chư Păh, tỉnh Gia Lai daok dang anak bruk pandiak bhang khang di abih dalam dom thun jaik di ini. Padai daok dalam tukvak pacah mbu min oh daok ia pruh, nan ye meteh mblang hamu daok thu, layau, ralo labik thu yau pon. Tui mikva urang nông, thun ini pandiak bhang mai tal avar jang. Tukvak ini dom thun dahlau, mblang hamu ini jeng daok hajao that kayua hu halau ia meng dom mbon ceik sraiy trun, min thun ini ia di labik ini thu abih. Ong Siu Phú daok di palei MRông Yố I, xã Ia Ka, huyện Chư Păh lac:

 “Palei MRông Yố I hu 47 ha padai min thu lagu abih 30 ha ye. Mikva gaok biak ralo kan kandah, caong khin karja dom pakat daong ka mikva”.

Ong Nguyễn Công Sơn – akaok UB bhap bini xã Ia Ka, huyện Chư Păh, tỉnh Gia Lai brei thau, ini lac mbang pandiak bhang biak khang dalam 5 thun tapa. Karja xã hu jak ba bhap bini ngak dom jalan pacang cakak pandiak bhang yau kuac rok cống rãnh kraong ribaong, ba ia meng danao thủy lợi. Min, di dom mblang hamu pandar halau ia, ia sraiy, daok atah công trình thủy lợi, oh hu ia halei karei piah pabak tame ye njauk khat lahik abih. Ong Nguyễn Công Sơn lac:

 “Anak bruk pandiak bhang yau ini, kayua mblang hamu oh hu nguồn thủy lợi piah ba ia nan ye xã daok nao pasang iek dom taneh njauk pandiak bhang. Piah hu jalan daong pajaih ka mikva dalam vụ anak tal. Ka dua nan lac meda daong eik lipa ka dom baoh sang eik lipa dalam tuk cang yuak jaik tal”.

Tui sở ngak nông saong patagok palei pala tỉnh Gia Lai, bahrau tame akaok bilan thu min hu jaik 400 ha padai saong cà phê kurang ia pruh. Rilo labik, urang nông hu rok bingun piah duah ia daong pacang pandiak bhang ka cà phê, amriah kalu. Njauk caik hatai nan lac bhum pala drak praong di tỉnh dalam dom huyện gah pai saong Đông Nam, taneh phun pala kurang ia pruh meda hu rilo jang dalam tukvak anak tal. Gah chức năng puk palei daok peih ngak rilo jalan pacang pandiak bhang ka phun pala yau kuac rok craoh, kraong ribaong, khơi thông labik ia nduac, ba ia lagaih di dom công trình thủy lợi. Ong Nguyễn Văn Lương, akaok Chi cục Thủy lợi, thủy sản tỉnh Gia Lai brei thau:

 “Sở ngak nông jeng hu patabiak jalan tacei pato peih bruk pala drak bilan đông xuân ka dom puk palei piah peih ngak. Taphia di nan, hu tacei dom puk palei brei padang jalan  pacang pandiak bhang di yaok labik, yaok công trình thủy lợi piah patakik khat lahik dalam bilan thu thun 2015 ini”.

Tui rayo khí tượng thủy văn bhum Tây Nguyên, kayua bilan hajan thun bloh abih avar jang labaih sa bilan. Gam saong nan, labik gah timur saong saletan tỉnh Gia Lai, hạ lưu Sông Ba, ia hajan hu meng 60 tal 70% duk saong rilo thun. Kayua yau nan ye ia di dom danao thủy lợi, thủy điện patrun meng 20 tal 40%, hu labik samu meteh duk saong thiết kế. Ia di ralo kraong craoh jeng biar jang dom thun jaik 20%, hu labik biar jang tal 50%. Ong Trần Trung Thành - Phó Giám đốc rayo Khí tượng Thủy văn labik Tây Nguyên lac:

“Thun ini lac tukvak daok salih tapa EL Nino, kayua yau nan ye ia hajan di dom bilan puac bilan thu di vụ đông xuân ini, saong akaok bilan hajan tal meda biar jang. Kayua yau nan ye, pandiak bhang meda rah tabiak di dom bilan 3, 4 saong akaok bilan 5. Saong pandiak bhang tui kol dahlak kuhria mboh, meda biak khang di gah timur saong saletan Gia Lai, lac angaok kraong Ba”.

Anak dom kan kandah di langik tasik, pandiak bhang daok mai tal avar, karja saong gah chức năng di tỉnh Gia Lai brei kham merat, kuhria caga peih dom jalan ngak chip piah patrun tal tanut biar di abih dom khat lahik kayua pandiak bhang./.