Pathau mikva saong taong abih gauk! Yau rayo sap ndom VN hu khan brei thau bloh, di xã Ia Dêr, huyện Ia Grai, tỉnh Gia Lai bahrau hu mbang mblung ia biak pandik harao ngak ka 3 anek saih metai. Dalam dom thun tapa, di xã Ia Dêr hu 8 uranaih mblung ia, saong dalam tỉnh Gia Lai hu tal 35 uraniah metai kayua mblung ia. Công Bắc – urang vak di rayo sap ndom VN daok di Tây Nguyên hu kadha vak brei thau ka bruk njauk báo động ini. Da-a mikva saong taong abih gauk tui pang.

Bahrau mbang tết bloh, bruk pandik harao me-om bak palei Blang 1, xã Ia Dêr, huyện Ia Grai, tỉnh Gia Lai kayua bruk tabiak nao di 3 adei sit, umo meng 8 tal 9 thun; nan lac Ksor Lực, Puih Khưn saong Puih Phơn. Dak pandik harao jang, tuk taong abih 3 adei sit urang J’rai ini, jeng lac adei sa-ai dalam but pajaih, sang daok jaik gauk saong metai haong gauk dalam baoh bingun palei daok jaik sang. Gam pandik harao, dom urang dalam sang gam mboh aih oh kayua kuhria bruk hamu puh bo var kakei anek drei plaih dom bingun, danao, kraong, craoh mbuan ba tal metai lihik. Ong Rơ Com Hunh, wa di dua adei Puih Khưn saong Puih Phơn drut drui lac: “Sang dahlak duh hatai lô, min jeng biak aih oh kayua oh khan brei kol nyu thau bruk nguy hiểm di dom baoh bingun bahrau kuac dalam palei. Maong mboh nyu kaoh, min nyu biak dalam, biak mbuan ba tal metai lihik kayua kol nyu oh thau caluai. Tapa bruk ini, kol dahlak njauk kakei cambaih laih jang brei anek kamuan nyu thau, abih di nyu nan lac di dom labik hu bingun brei ngak paga pacang vil taom dar, oh caik ka uranaih dalam palei tame caluai piah plaih metai lihik”

Ini oh lac mbang camereip palei Blang 1 mboh pandik harao kayua mblung ia. Atah di ini labaih 1 thun, di bilan pandiak thun 2013, bhap bini dalam palei jeng hu mbang pandik harao tuk rah tabiak sa bruk mblung ia yau nan, ngak ka 3 adei sit metai dalam baoh bingun di palei. Daok ngan saong xã Ia Dêr, huyện Ia Grai, ini lac thun ka 3 gam gam rah tabiak dom bruk mblung ia ngak brei 8 adei sit metai.

Meng bruk takik caik hatai sangka di dom amaik ame, bruk uraniah oh thau caluai ia, gam saong bruk kurang an toàn di dom danao, bingun, lac makna ba tal dom mbang mblung ia biak pandik harao di xã Ia Dêr. Ong Puih Alốt, urang jakar Y tế xã Ia Dêr, huyện Ia Grai, tỉnh Gia Lai brei thau: Dom thun ini mai thun halei jeng hu uraniah metai kayua menei di bingun ia urang pruh café. Dahlak ngak di bilai y tế xã jeng hu pathau khan rilo ka mikva thau lac, amaik ame nao ngak puh atah oh iek glang anek di drei hu, njauk ngak paga pacang oh caik ka uraniah tame meneri bloh metai mblung ia.  

Tui kuhria mboh di Sở Lao động Thương binh saong Xã hội tỉnh Gia Lai, dalam dom thun tapa, dalam tỉnh hu yaok pluh mbang mblung ia, ngak ka 35 uranaih metai. Dom mbang mblung ia nan rilo meng rah tabiak dalam bilan pandiak, tuk anek saih padeih hè, jak gauk nao menei di bingun, di danao, di kraong, craoh. Yaom lac yaok thun, dom gah chức năng di tỉnh Gia Lai jeng hu danak dak pacang caga mblung ia ka uraniah, min biak takik hu peih ngak tapak. Dalam tỉnh jeng oh ka hu labik caluai ia di karja, bahrau hu dom labik caluai ia kayua tư nhân peih eng di ban sit Pleiku. Nan ye bruk pato pasram caluai ia ka uraniah gaok rilo kan kandah, dom kapul, nyaom, dom sang bac jeng bahrau hu pato ka uraniah caluai di angaok thu. Ong Nguyễn Ngọc Hải – akaok duk khik caga, iek glang uraniah, Sở Lao động - Thương Binh saong Xã hội tỉnh Gia Lai brei thau:“Urak ini dalam tỉnh oh hu labik pato caluai ka uraniah. Daok môn caluai di Sở ilamu Thể thao Du lịch dalam dom thun tapa jeng klaak nao, oh hu dalam dom danak dak pato pakai. Ini lac bruk suh sah di dom sở ngành, abih di nyu nan lac Sở Lao động Thương Binh Xã hội. Anak tal, kol dahlak tham mưu ka dom urang dang akaok sở, jeng yau pambuak bruk haong dom gah, pathau khan, jhul pakhang dom bruk ngak ka nyu cambaih jang, siam lagaih jang piah daong ka dom adei thau pacang caga mblung ia, abih di nyu nan lac dalam tuk padeih hè jaik tal”

Oh hu labik caluai ia, takik hu mblang me-in ka uraniah, nan ye tal bilan pandiak, abih di nyu nan lac tuk padeih hè, anek saih ba gauk tabiak menei di dom kraong, craoh, bingun, danao dalam tuk oh thau atau takik thau caluai ia. Nan lac makna ba tal dom mbang uraniah mblung ia metai biak pandik harao di tỉnh Gia Lai gam gam rah tabiak. Urak ini lac tabung glaong bilan pandiak, anek saih jaik padeih hè, dom amaik ame saong gah chức năng di tỉnh Gia Lai njauk caik hatai sangka, khik iek catang anek kamuan di drei piah plaih di metai lihik biak pandik harao./.