Adei thau halei oh, tuk anek di sa-ai bahrau bak 5 bilan ye sa-ai ba tagok ini paje, tal tuk hu urang ndih tapui pak sang njauk tabiak ralo darah ye sa-ai njauk nao tal nan piah cấp cứu. Dalam tuk nan anek daok pak sang mahu mam hia abih aia meta, Amaik di sa-ai mboh yau nan pok nyu nduac nao tal labik cấp cứu, dang pak gah langiu, gah dalam sa-ai daok cấp cứu ka urang ruak, yau nan dua anek amaik thei jeng nao cấp cứu. Saneng gilac mboh pandik harao  min jeng mboh bui sambai.

Nan lac sa bruk sa  kadha bo bác sĩ Đoàn Thị Phơn oh tuk halei var hu. Menek tabiak di bhum taneh Thái Bình min prong tagok saong padang mbang ngui di xã Sông Lũy, huyện Bắc Bình, tỉnh Bình Thuận. Thun 1994, sa-ai bac tamat Sang bac Trung cấp Y tế Phan Thiết. Kayua jien bilan takik, nao ngak ye jalan mbak atah dhua nan ye pasang di sa-ai oh khin ka sa-ai tui nghề y. Min ngan haong hatai ranam bruk, sa-ai jeng kham merat tame ngak di phân trạm y tế Song Bình dalam xã Sông Lũy. Thun 1999, sa-ai salih nao ngak pak balai y tế xã Phan Tiến – labik hu ralo mikva bangsa takik daok, lac sa dalam 4 xã biak kan kandah di huyện Bắc Bình. Tal thun 2008, hu pakat angaok daong palagaih, sa-ai patui veik cih angan drei tame sang bac Đại học Y Phạm Ngọc Thạch, bal raya Hồ Chí Minh piah paglaong tangin ngak. Saong hadei di 4 thun bac megru, harei ini anai y sĩ đa khoa harei dahlau hu jeng sa urang bác sĩ blaoh.

Labaih 10 thun dahlau, Phan Tiến hu mong yau sa pasak di ruak la-ar dom. Kayua yau nan ye, Balai Y tế xã biak caik hatai tal bruk pathau khan brei ka mikva thau piah pacang caga ruak la-ar dom. Hu melam sa drei gam haong đèn pin, bác sĩ Phơn nao trun tal yaok baoh sang hu urang njauk ruak la-ar dom piah brei jru saong tacei pato mikva kak kamo dahlau di tuk ndih. Abih iek ruak, sa-ai gilac gam haong urang jakar puk palei nao trun tal yaok baoh sang hu urang metian piah khám saong jak ba adei sa-ai tame balai ndih tapui… yaom lac bruk nao mai dalam tukvak nan biak kan kandah. Tuk mahit dahlak sua tangi, hu bằng bác sĩ paje, sa-ai hu khin nao ngak bruk di labik karei halei oh? Bác sĩ Đoàn Thị Phơn khan lac: Ngak pak halei jeng yau nan, kadha njauk ndom nan lac nyu lagaih haong drei halei oh. Mikva pak ini jeng slut mbut, urak ini bo pandar drei trun nao ngak di bhum gah ala atau tagok bệnh viện ye drei jeng oh takre. Piah thau ka mikva ye njauk hu tukvak. Saong sa kadha tra dahlak mboh pak urang gru jru bo thau cambaih laih jang ka jit ruak, dịch tễ nan oh njauk lac harei sa harei dua bo sa-ai ye daok pak ini labaih 10 thun ini  mai. Dịch tễ di labik ini ye dahlak thau abih mbong, sang hu hadom urang, thei ruak hagait, sang pak halei ye bruk nan biak mbuan lagaih ka dahlak.

Meda lac oh hu sa urang halei di bhum glaong Phan Tiến ini bo oh thau tal bác sĩ Phơn – sa urang oh lac abih hatung hatai haong bruk ngak bo daok lac sa urang đồng nghiệp siam, sa urang salut mbut, sa urang jakar hadah krah. Nan lac panuac khan di Y sĩ Mang Dí – sa dalam dom urang daok ngak bruk haong bác sĩ Đoàn Thị Phơn pak Trạm Y tế xã Phan Tiến ini. Mang Dí ndom lac: Dom kadha hagait bo sa-ai ba tabiak, ndom ka ilamu ye sa-ai daong ba dahlak biak ralo dalam bruk ngak, daong ka dahlak chẩn đoán ruak njauk jang nan lac gah chuyên môn. Daok ngan haong adei sa-ai dalam balai sa-ai tuk halei jeng sangka brei salah bruk, sa-ai tuk halei jeng khim klao, tuk halei jeng bui sambai haong adei sa-ai. Dom hatai saneng, hatai caong khin di adei sa-ai ye sa-ai klah rabha abih saong duah jalan daong ka adei sa-ai. Sa-ai njauk lac sa urang sa-ai piah ka adei sa-ai bac megru.

Ndom tal bác sĩ Phơn, ong Nguyễn Thái Trung – Phaok Akaok Pasak Y tế huyện Bắc Bình, tỉnh Bình Thuận brei thau: Dalam bruk ngak Phơn nan lac sa urang jakar abih hatai haong bruk ngak di drei, biak kham merat dalam bruk ngak, diukrai siam mekre, talei rohim jeng biak siam. Meng tuk balai daok kan kandah, urak ini balai hu padang ngak bahrau praong siam, ginup abih pandap panda ye dahlak saneng lac bruk pambuak pagam di bác sĩ Phơn pak Balai Y tế Phan Tiến njauk pok meyaom.

Tuk likau la, sa-ai ndom haong dahlak lac: “Ngak urang iek ruak oh mbuan hasit halei, tuk yam takai tame nyu ye taduan klaak nao dom bruk dom kadha chreih chai bui sambai di drei saong ba bruk ngak tagok dang akaok. Urang gru jru meda jeng sa urang amaik ka dua ba raidiuk mai ka manuac urang, min meyah oh caik hatai ye meda jeng “but khamot” klaik nao sinh mạng di urang". Mai meng hatai saneng yau nan bo ralo thun ini mai, bác sĩ Đoàn Thị Phơn oh padeih patagok, ngak siam bruk ngak di drei lac gru jru yau urang amaik./.