Ngan saong ong Hoàng Anh Phố ndih tapui thun 1957 daok di jalan Phan Đình Phùng, ban sit Pleiku, lương y Đinh Văn Ấp oh lac gru jru njauk pok meyaom, bo daok lac sa urang hu dar phor praong. Ong Phố brei thau, meng 20 thun dahlau, ong ruak pandik dạ dày biak trak. Diuk metai, ta-eng raong 3 urang anek sit, bruk ngak mbang oh tani tanat, ong Phố oh hu jien iek ruak. Biak patuah jamo, thau tal duk iek ruak di lương y Đinh Văn Ấp, ong Phố hu iek thit ruak, hu pren ngak mbang raong dom anek. Rilo thun tapa nao, dom urang anek praong tagok jeng menuac jeng urang, rai diuk jeng takik kan kandah, ong Phố oh tuk halei var hu dhar phon di urang gru jru bangsa Hrê brei ka drei. Ong Hoàng Anh Phố lac: 

 “Yaok mbang tuk dahlak pandik, dahlak ndih jaik abih bilan, oh mbang menyum hu, oh nao ngak hu. Ong mboh oh nao ngak hu, oh hu jien blei jru, ong daok brei jien gac. Tal urak ini, dahlak hu pren yava veik, nao ngak bruk hu. Dahlak biak thau dhar phon urang gru jru. Dahlak caong khin gru jru Đinh Văn Ấp tuk halei jeng hu khang kajap pren yava piah iek ruak ka dom urang kan kathaot yau dahlak”.

Jeng hu rai diuk kan kandah, jaik 30 thun ini mai amuk Nguyễn Thị Mai Hương ndih tapui thun 1934, daok di palei Pleiku Ró, phường Yên Đổ, ban sit Pleiku bhian mai tal duk iek ruak di lương y Đinh Văn Ấp. Tukvak camereip, amuk Hương pandik dây thần kinh ka 7, vaiy cambuai, khang kang, bruk mbang huak biak kan kandah. Ruak ini daok ngak ka amuk kan nao mai, bhian labuh, oh ngak bruk hu. Ruak ini hu iek thit ye tal ruak viêm khớp umo taha nyu ngak pap amuk, amuk Hương hu iek ruak saoh yaok harei. Lương y Đinh Văn Ấp jeng sa urang hu dar phor, sa urang yau gauk gar dalam sang di amuk Hương:

 “Meng harei gaok bác sĩ Ấp, ruak oh daok tra. Urak ini châm cứu jeng oh mek jien, jien jrum oh bayar tra, jien jru jeng oh mek. Ong biak anit ka urang kan. Ong daong hu hagait ye daong. Dahlak gam thit ruak, gam hu baoh sang ong anit ranam. Kan kandah ye ong brei brah, brei bánh chưng, njam patam dalam bein, ong buac ong brei. Thun halei jeng brei yau nan"

Ndih tapui tabiak dalam baoh sang urang bangsa Hrê daok di Quảng Ngãi, gru jru Đinh Văn Ấp dahlau deih lac anek saih gah meraong hadah krah hu brei nao bac di sang bac sư phạm bhum ceik saman mesruh metak pacang Mỹ. Hadei di nan, meng hatai caong khin hu iek ruak ka urang, ong likau tui bac gah đông y. Ong Đinh Văn Ấp brei thau, dalam 30 thun ngak gru jru di Gia Lai, oh tuk halei ong oh var panuac pato di dom urang nao dahlau saong panuac kakei di wa Hồ lac “lương y yau từ mẫu”.

 “Ngan saong dahlak, bruk daong ka urang nan lac biak praong. Y đức saong hatai jai lac ngak yau habar ka nyu njauk ruak, njauk jru, oh lac jru sit bo oh brei, oh lac jru ini lap jien bo brei ralo jang, ruak njauk saong jru halei ye brei jru nan. Đông y trak hatai anit ranam, kanan panuac Hải Thượng kakei drei, 9 paka y huấn, siam hatung hatian,  gaok gauk ini lac yau gauk, bac jalan ngak menuac, bac jru meng naih”.

Labaih 30 thun iek ruak di Plei Ku, langiu dar phor caik veik ka yaok ribau urang ruak, lương y Đinh Văn Ấp daok pato hu ka rilo anek saih, gam hu mbaok tame iek ruak ka bhap bini. Saong y đức jeng lac bruk akaok meti bo taong abih dom gru jru lac anek saih di ong brei thau hu. Saai Trần Tiến Sỹ ndih tapui thun 1966, hội viên hội đông y ban sit Pleiku, anek saih di lương y Đinh Văn Ấp brei thau:

“Mai tal lương y Đinh Văn Ấp, bruk akaok meti dahalak hu bac nan lac abih hatai ka bruk ngak. Lương y Đinh Văn Ấp hu tacei pato, bruk taduan rok, iek glang urang ruak. Nao tal urang ruak tui jalan bo wa Hồ pato, nan lac abih hatai ka bruk ngak, pasram megru paglaong đạo đức hadah hadai di urang gru jru. Kol dahlak hu lương y Đinh Văn Ấp kakei, brei iek urang ruak kan kathaot yau gauk gar, piah daok jaik saong anit ka bruk pandik harao di urang ruak. Saong brei kham merat iek ruak ka nyu siam piah patrun pandik harao ka urang ruak, iek ruak meng hatai jai di urang gru jru”.

Urak ini, yaom lac umo 85 thun, min yaok harei lương y Đinh Văn Ấp jeng hu peih pabah mbang duk iek ruak taduan rok saong iek ruak ka dom urang kan kathaot. Ngan saong ong, bruk iek ruak daong ka urang nan lac sa bruk ngak praong glaong. Urang gru jru iek ruak oh lac ba mai ka urang ruak rup pabhap khang kajap, bo daok ba mai hatai jia ka dom yaom glaong siam mekre di rai diuk./.