Pathau mikva saong taong abih gauk! Nao ngak bruk di pulao atah, gaok rilo kan kandah min dom  y, bác sĩ, Pasak Y tế Quân - Dân y Lý Sơn, tỉnh Quảng Ngãi tuk halei jeng ngak siam bruk di drei. Bruk ngak kandang joa di dom urang lin ao mbong hu daong iek glang pren yava ka urang lin saong bhap bini angaok pulao. Da-a mikva saong taong abih gauk pang kadha vak di Vinh Thông, urang vak di rayo sap ndom VN daok di bhum kreh negar brei thau ka bruk nan.

Labaih 6 thun tapa bloh min sa-ai Trần Thị Công daok di palei Đông, xã An Vĩnh, huyện pulao Lý Sơn, tỉnh Quảng Ngãi jeng oh var hu harei yau Yuan lac "thập tử nhất sinh" nan. Pasang nao tasik atah, sang kan kathaot, tuk pandik tung menek anek taluac, sa-ai Công hu mikva angaok pulao ba nao cấp cứu di Pasak Y tế Quân - Dân y Lý Sơn dalam tuk biak nguy kịch. Mboh ini lac mbang ndih tapui kan, mbuan ba tal metai lihik, dom y, bác sĩ di Pasak Y tế Quân - Dân y Lý Sơn hu pataom gauk tame blac raih saong daong hu ka 2 amaik anek. Sa-ai Công hadar veik. Mikva ndom lac, di Lý Sơn oh blac raih hu, min tuk dahlak hu blac raih bloh, 3 - 4 urang hadei jeng blac raih hu siam mekreì abih. Dalam nan dahlak trak di abih. Bác sĩ lac oh samar blac raih ye mbuan si metai lô.  Abih rai dahlak oh var hu dar phor dom urang hu daong ka dahlak. Oh hu bác sĩ Danh ye dahlak metai livik ye.

        Sa-ai Trần Thị Công nan lac sa dalam rilo urang ruak hu Bác sĩ Phạm Công Danh saong dom gru jru di Pasak Y tế Quân - Dân y Lý Sơn samar daong. Menek tabiak saong praong tagok di pulao Lý Sơn, meng sit Phạm Công Danh caong jeng sa urang gru jru piah daong iek ruak kik ka mikva urang ngak ikan di drei. Urak ini tuk bruk caong khin hu jeng biak, Bác sĩ Phạm Công Danh mai veik palei piah ngak bruk saong hu labaih 22 thun kak kajap haong Pasak Y tế Quân - Dân y Lý Sơn: Meng sit dahlak caong jeng urang gru jru. Urak ini jeng bác sĩ, dahlak caong daok veik palei piah iek glang pren yava ka mikva daok di pulao tasik kan kandah ini. Meng kan ong muk drei hu tabiak Hoàng Sa padang cột mốc biên cương, khik pulao, daok drei lac dom urang rai hadei, dom urang khik caga pren yava ka bhap bini ye drei halan hatian iek glang pren yava ka mikva. Drei oh tabiak tasik hu ye drei daok di labik ini daong ka dom urang khik caga pulao.

           Pasak Y tế Quân - Dân y Lý Sơn urak ini hu 4 khoa praong nan lac nội, ngoại, sản, nhi saong cấp cứu. Yaok thun, Pasak hu iek ruak ka labaih 35 ribau mbang urang, iek ruak nội trú ka labaih 3 ribau mbang urang. Dahlau deih oh ka hu điện negar nan ye oh pandar hu pandap điện. Meng puac thun bloh, điện negar hu dui tabiak pulao, rilo pandap điện hu ba tabiak pandar, ba mai rilo siam lagaih ka bruk iek ruak. Bác sĩ Mai Hữu Hậu, Yam ndok Pasak Y tế Quân - Dân y Lý Sơn brei thau: meng tuk hu điện tal ini, yaok harei pasak hu labaih 200 mbang urang mai iek ruak: Urak ini, gam haong dom jamriak hu bloh, kol dahlak daok khik ramik saong patagok bruk pandar dom jamriak iek ruak. Brei dom adei  saai nao megru pandar jamriak piah tuk peih ngak  danak dak paglaong bruk iek ruak di Pasak y tế Quân dân y pambuak haong huyện Lý Sơn, kol dahlak hu ginup menuac piah pandar dom jamriak iek ruak.  

           Bruk ngak dalam kandang joa di dom urang lin ao mbong labik pulao atah daok hu rik daong ka bruk peih ngak danak dak “Patagok y tế tasik, pulao Việt Nam tal thun 2020” hu siam mekre yau bruk ba tabiak./.