Yaok thun, tỉnh Đắc Lắc trun hu 30% boah sang kan kathaot, min baoh sang tabiak truh kathaot jeng mbuan gilac veik kathaot; tok gaok tua riya, ia sua atau hu urang ruak lavik harei ye gilac veik kan kathaot. Kayua yau nan ye, gam saong sarak daong tapak, tỉnh Đắc Lắc  brei hu jalan ngak  mbang suai lavik, piah ka mikva patruh kan kathaot khang kajap. Ndom ka bruk ini, Hxíu, urang vak di Rayo sap ndem Viet Nam daok ngak bruk di Tay Nguyen hu kadha vak “Kayua habar patrun kan kathaot di Đắc Lắc oh ka hu khang kajap?”. Da-a mikva saong grauk ayut tui pang:      

20 thun dahlau, sang amuk Hoàng Bích Ngân dmeng tỉnh Thái Nguyên mai xã Tân Hòa, huyện Buôn Đôn, tỉnh Đắc Lắc padang mbang ngui. Meng 4 sào taneh apuh saong 2 sào hamu padai ia, dom thun camereip bahrau peih taneh bilau, taneh riya daok siam rilo, langik tasik siam lagaih nan ye kinh tế di sang dak harei dak hu tani tanat. Min, hadei di dom mbang gaok bala meng langik tasik, tua riya, bo dalam sang daok hu manuac ruak, nan ye sang gaok kan kandah. Yaom lac hu Karja daong pajaih phun pala saong pandap panda piah ngak mbang pala drak, min raidiuk amuk oh tagok truh. Amuk Hoàng Bích Ngân lac:“Tame ini ngak nong tuk camereip khol dahlak mboh ngak hagait jeng hu, min dom thun hadei langik oh lagaih khol dahlak oh daok ngak hu tra. Karja thun halei jeng hu daong pajaih brei ka dom baoh sang kan kathaot min mbang ini ngak hu ye mbang hadei nyu lahik. Coang khin hu phun jien ngak mbang piah tapa truh kan kathaot.”

Tui Uy mban bhap bini huyện Buôn Đôn, urak ini huyen daok hu jaik 4 ribau baoh sang kan kathaot saong labaih 1 ribau 500 baoh sang jaik si kan kathaot. 5 thun tapa, baoh sang kan kathaot kuhria rah tapa yaok thun trun jaik 3%, urak ini daok 26%. Bruk patrun kan kathaot ini yaom lac glaong min oh ka hu khang kajap. Dom baoh sang tabiak truh kan kathaot meng taduan hu jien bayar di dom danak dak thủy điện padang ngak di palei; nan ye jien mek tame di dom baoh sang nan nyu glaong jang tanut kan kathaot. Daok dom baoh sang tabiak truh kan kathaot meng bruk ngak hamu ngak apuh ye oh khang kajap, hu sa mbang tua riya, ia sua atau dalam sang hu urang ruak lavik harei ye gilac veik kan kathaot. Ong Y Sê Ê Ban, Phaok akok Jabat Lao động, Thương binh saong xa hoi huyen Buôn Đôn brei thau: “ Hu dom baoh sang khol dahlak birau ba angan tame veik, kayua tuk duah thau, pasang iek ye xã, palei lac tabiak truh kan kathaot hu, min hadei di tuk  tabiak truh kan kathaot blaoh ye sang ini hu diuk ruak trak. Tui Thông tư 24 di Mentri Lao động, khol dahlak ngak veik harak gar ba angan urang tame veik. Biak di nyu, kayua trak gah danak dak, njauk ba angan urang tabiak. Nan ye hu rilo tavak tavaiy dalam tuk peih bruk patrun kan kathaot.”

Tỉnh Đắc Lắc urak ini daok 19 xã kathaot di 5 huyện hu baoh sang kathaot rilo (labaih 30%) nan lac: Buôn Đôn, Ea Sup, Lắc, Krông Bông saong M’Đrắc. Dom thun tapa, karja hu rilo sarak patrun kan kathaot yau: brei mesre jien laba lap, peih tal pato pachreih ngak nong, pato bruk ngak, daong gah y tế, pato megru…brei ka dom baoh sang kan kathaot. Min dom sarak nan tok daong tapak di anak meta, dalam tukvak katut panak, sarak daong jalan ngak mbang daok takik. Phun jien mesraiy rilo min tukvak mesraiy katut panak, nan ye oh ka lagiah. Langiu di nan, hu dom urang, abih di nyu nan lac urang bangsa takik, bhum atah bayah jeng daok hu hatai sahneng pagam pambak tame bruk daong di Karja, oh ka kham yam tagok. Kayua yau nan ye, bruk patrun kan kathaot oh ka hu khang kajap.