Patui bruk anit ranam đồng đội, oh huac di metai lihik, halan hatian daong gauk meng lisei huak tal khan ao ngui cuk dalam saman mesruh metak, tukvak tapa, dom pakat kapul urang dahlau diah ngak bol lin tỉnh Ben Tre hu padang ngak rilo bruk daong ka dom urang dalam kapul yam tapa kan kandah dalam ridiuk, yam tagok patruh kan kathaot khang kajap…

Ong Huỳnh Văn Lũy, sa urang dahlau diah ngak bol lin umo thun taha, pren yawa oh daok khang kajap, daok di palei Thiện Mỹ, xã Tân Thiềng, huyện Chợ Lách, tỉnh Ben Tre, lac sa baoh sang kan kathaot, raidiuk kan kandah. Diuk ong lac urang ngak tabiak jien piah raong baoh sang jeng padeih bruk kayua ruak kik. Thau bruk kan kandah di sang ong, Kapul urang dahlau diah ngak bol lin xã Tân Thiềng hu padang sa tổ hu 5 urang dahlau diah ngak bol lin urak ini  sang kaya meda piah daong ka ong Lũy ngak mbang patagok raidiuk. Hadei di tuk duah thau hatai caong khin di ong Lũy, tổ urang dahlau diah ngak bol lin palih ruah bruk raong pabe piah daong baoh sang ong tapa truh kan kathaot.

Tui jalan jak ba, dom urang dalam tổ urang dahlau diah ngak bol lin rik hu 6 triệu đồng, gam 1 triệu 2 rituh ribau đồng jien di sang, ong Lũy blei 4 drei pabe mai raong. Uy ban bhap bini xã brei nyim taneh padang ngak var ro piah raong. Hadei di dom bilan raong saong hu daong ilamu raong  glang, urak ini 4 drei pabe binai di sang ong jaik tal harei menek. Yaom taphon pabe tagok labaih 16 triệu đồng. Tui kuhria mboh di ong Lũy, dom bilan tra sang ong hu tagok phun jien piah peih praong bruk raong glang. Langiu di nan, mboh hu bruk kham merat yam tapa kan kandah di ong Lũy, Kapul urang dahlau diah ngak bol lin xã dang angan brei ka baoh sang ong mesre 25 triệu đồng meng Gilang pariak sarak karja piah blei limo raong. Meng nan, bruk kathaot rambah, iek lipa kadun likuk sang ong. Ong Huỳnh Văn Lũy khan lac: “Hu dom adei sa-ai dalam kapul urang dahlau diah ngak bol lin xã Tân Thiện jeng yau chi hội palei Thiện Mỹ daong ka dahlak phun jien piah blei anek pajaih mai raong, urak ini anek pajaih cak rok, raidiuk sang dahlak dak harei dak tagok. Dahlak jeng kham ngak mbang piah thau dhar phol dom adei sa-ai dalam kapul hu daong ka dahlak yam tapa kan kandah, grap tanat raidiuk.”

Jeng daok dalam palei haong gauk saong hu raidiuk dreih yau ong Lũy, ong Nguyễn Văn Thắm dahlau diah sang biak kan kandah. Hu ayut dahlau diah nao bol lin saong gauk brei nyim taneh pala 300 phun tắc. Meng tari tarieng iek glang, bein tắc tamuh siam hijao brei rilo baoh radhar. Ong Nguyễn Văn Thắm brei thau: “ Mboh sang dahlak kan kathaot kurang taneh ngak mbang yau nan ye brei dahlak nyim labaih 2 birau met vuông taneh. Jeng hu adei sa-ai sahabat dalam kapul daong peih taneh bilau saong brei phun tắc, daong phun jien pala urak ini mboh phun tamuh siam. Jeng kham merat ngak mbang piah tapa truh kan kathaot, hadei drei pataom hu jien  blei limo binai mai raong piah menek hu rilo drei, harei hadei drei hu rilo phun jien.

          Meng hatai kham merat “oh luai ka urang dalam kapul urang dahlau diah ngak bol lin eik lipa kathaot rambah” meng thun 2010, Mban chấp hành Kapul Urang dahlau diah ngak bol lin tỉnh Ben Tre hu peih bruk pakacah tal yaok pakat kapul. Tui bruk ba tabiak yaok thun trun kathaot ka 20% urang dalam kapul urang dahlau diah ngak bol lin dalam tỉnh.

          Thau cambaih kadha nan, rilo bruk ngak siam, lagaih, njauk saong raidiuk hu dom pakat Kapul Urang dahlau diah ngak bol lin padang ngak yau: Kadung jien daong ka urang dahlau diah ngak bol lin kan kathaot, (yaok urang dalam kapul rik tame 100 ribau đồng sa thun, jien nan hu daong ka urang dahlau diah ngak bol lin kan kathaot mesre  piah patagok kinh tế); padang dom tổ rik phun jien oh mek laba; dom tổ pambuak bruk raong pabui, raong katrau, pala kruac bung kalik hijao…Dom urang dahlau diah ngak bol lin tame tổ hu daong phun jien, ialmu raong glang, pala drak…Tapa nan hu rilo jalan ngak patagok hu kein laba. Yau ye, jalan ngak 5 pagam 1 (nan lac 5 urang dalam kapul sang ginup meda daong ka sa urang kan kathaot) mboh ngak hu siam, daok hu pambak praong dalm dom kapul nyaom. Ong Phan Thanh Hùng, Akok Kapul urang dahlau diah ngak bol lin xã Tân Thiềng brei thau: “Tui jalan ayut bol lin daong gauk patruh kan kathaot, hadei di  tuk thau hu bruk ngak 5 pagam 1 di kapul urang dahlau deih ngak bol lin tỉnh Ben Tre, khol dahlak mboh lac bruk ngak nan meda ba mai kein laba, dahlak padang jalan ngak,  ba tabiak tal yaok urang piah thau ka jalan ngak ini piah ngak tui, tapa nan tal puac thun 2013 khol dahlak  palahik hu meteh dom baoh sang kan kathaot dalam kapul urang dahlau diah ngak bol lin, khol dahlak kham merat tal thun 2015 oh daok baoh sang halei kan kathaot”. 

Bruk urang dahlau diah ngak bol lin daong gauk patrun kan kathaot, ngak kaya meda hu pamedeih tagok bruk jum pataom urang dahlau diah ngak bol lin. Yaom lac yaok urang atau kapul nyaom, tuk halei jeng paglaong jalan diuk rai siam hatung hatai di urang lin Bo đoi Wa Ho, sahaneng ngak habar piah daong ayut sahabat di drei yam tapa truh kan kathaot, ngak kaya meda ka rup drei, ka baoh sang saong ka xã hội.  Patagok dom bruk ngak hu nan, anak tal dom pakat Kapul urang dahlau diah ngak bol lin tỉnh Ben Tre daok patui jalan jhul pakhang bruk jak ba “Urang dahlau diah ngak bol lin hadah krah, pakacah gauk ngak mbang, pablei salih naih joi”, pagam saong bruk  jak ba “ Padang ngak palei pala birau”; kham merat tal thun 2015, taong abih baoh sang urang dahlau deih ngak bol lin tapa truh kan kathaot khang kajap. Ong Bui Thanh Khởi, Phó akaok Kapul urang dahlau diah ngak bol lin tỉnh Ben Tre brei thau:“ Tui nan, jalan ngak di kapul urang dahlau diah ngak bol lin Bến Tre kham merat ngak  habar piah jak ba urang dalam kapul yam tagok tabiak truh kan kathaot khang kajap piah daong pren ka bruk patruh kan kathaot di tỉnh Ben Tre, nan lac sa bruk hu makna praong saong lac bruk kham merat di kapul urang dahlau diah ngak bol lin tinh Ben Tre”.

Abih hatung hatai daong ayut bol lin saong gauk, dom bruk ngak siam mekre  hu makna praong galong nan hu dom pakat kapul urang dahlau diah ngak bol lin tỉnh Ben Tre daok patui ngak piah daong hu sa binah halei ka dom ayut sahabat yam tapa kan kandah dalam raidiuk. Hatung hatai di dom urang nan hu daong ngak brei hadah angan Bo đoi Wa Ho di palei Đồng Khởi anh hùng./.

                                                                                        Bhumi