Thun bahrau ini, mai veik Tây Ninh, khaol dahlak mboh tatuak drei anak dom salih bahrau di bhum taneh hu labaih 3.000 urang Cam daok. Meng salih bahrau akaok saneng, kham merat ngak mbang saong hu bruk sangka di Karja nan ye rai diuk di mikva urang Cam labik ini hu ralo salih bahrau.

Meng jalan 785, nao jaik 1 km ye tal palei Cam Tân Châu, xã Tân Phú, huyện Tân Châu. Nao rah tapa palei, khaol dahlak meng mboh bruk salih bahrau mbaok meta bhum palei ini. Dalam palei, hu tamuh tagok ralo baoh sang praong, siam. Jaik abih palei sang halei jeng hu radaih patuh, hu tivi, hu sang daok hu mac li-ua… Yau ye sang sa-ai Du Soh, pala hu labaih 2,5 ha tabau, yaok thun laba hu labaih 20 triệu đồng sa ha. Sa-ai brei thau: Dahlau diah mikva kan kandah ralo, ngak padai oh njauk kayua taneh njaom lakhur, năng suất padai oh glaong. Min meng tuk hu Công ty Cổ phần tabau saradang Bourbon Tây Ninh brei mesre phun jien saong daong brei pajaih, sang sa-ai salih tapa pala tabau; tuk tak tabau bloh, sang sa-ai pala bei plom, yaok thun laba hu labaih 30 triệu đồng sa ha.

Oh ta-eng hagait sang sa-ai Du Soh, sang ong Lóc Lao, bangsa Khmer, dahlau diah daok di Campuchia, mai padang mbang angui di palei Tân Châu meng thun 1977, lac sang kathaot dahlau daih, urak ini  hu ginup meda. Dahlau diah, sang ong biak kan kandah, oh hu jien phun, oh hu taneh pala drak. Meng hu mbang tui danak dak 134, 135 saong meng kham merat ngak mbang, urak ini sang ong hu 6 ha taneh pala tabau saong bei plom, yaok thun jien laba meng pablei tabau saong bei plom hu 150 triệu đồng. Urak ini, sang ong daok hu 2 sruh mac li-ua piah pala drak. Hu yau harei ini, ong Lóc Lao bui sambai khan lac: “Sang drei dahlau daih kan kandah ralo. Hadei ini hu Đảng, Karja daong, meng nan nyu tagok tal harei ini ”.

Dahlau diah, oh ka tuk halei mikva bangsa Cam padang hu sang prong, mekre yau urak ini. Meng hu dom danak dak buh jien tame ngak di Karja, urang nong ngak mbang hu kein laba, jhul kadul hu eik lipa, kathaot rambah; rai diuk di mikva dak harei dak tagok glaong. Anek kamuan bangsa Cam hu sangka, hu daong nao bac daa, hu jeng dom urang kein laba ka rahra. Amuk Hà Thị Huệ, Phaok akaok Ủy ban bhap bani xã Tân Phú, huyện Tân Châu, tỉnh Tây Ninh brei thau: “Dahlau diah rai diuk di mikva biak kan kandah. Dom thun jaik di ini hu bruk sangka di Đảng ủy, Ủy ban jang yau Karja ye rai diuk di mikva patagok jang. Thun halei jeng hu dom sarak, brei peih ngak dahlau ka bhap bani. Tukvak jaik di ini rai diuk kinh tế di mikva drei dak harei dak tagok”.

Likau lia palei Cam Chăm ấp Tân Châu, khaol dahlak nao tal palei Cam xã Suối Dây, huyện Tân Châu, labik hu 356 baoh sang urang Cam daok. Dom thun dahlau daih, rai diuk di mikva urang Cam labik ini biak kan kandah, ngak mbang pagam pambak tame glai saong kaya ikan dalam hồ Dầu Tiếng. Mboh yau nan, dom urang jakar ngak nong xã hu tacei pato mikva pak ini pala bei plom. Nan lac pajaih bei plom lai (karei jang pajaih bei plom piah mban) piah ngak pandap mbang ka anek athur raong, ngak har kẹo, ngak năng lượng hacih… Bruk pala bei plom hu kein laba hu daong ngak ka rai diuk di mikva salih bahrau biak samar. Sa-ai Sali, sa urang pala bei plom pak ini brei thau: “Akaok mereip urang jakar tacei pato biak abih hatai,  urak ini mikva thau ngak abih paje. Blaoh sang mac daok brei radaih trun tal labik pala piah blei, nan ye buac blaoh lac hu jien”. Meng dom vụ bei plom hu năng suất glaong bo dom thun tapa, sang sa-ai Maghim, daok pak palei Cam, xã Suối Dây hu jien ngak sang daok bahrau biak praong, siam, dalam sang hu ginup abih pandap panda.

Gam haong bruk patagok kinh tế, rai diuk ilamo di bhap bani dom palei Cam jeng oh padeih cakrok. Bruk bac daa di anek kamuan hu caik hatai sangka. Uranaih dalam umo nao bac hu tame sang bac, ralo sang hu anek nao bac đại học, cao đẳng. Pagap yau sang ong Mách Ta Rế hu dua urang anek daok bac gah ngành Y. Meng dom sarak buh jien tame daong di Karja, hu ralo sang urang Cam tỉnh Tây Ninh tabiak truh kathaot yam tagok ngak kaya meda.

Sa thun bahrau mai tal, yau sanya ba ralo siam mekre ka bhap bani Cam Cam labik ini. Mikva tuk halei jeng pachreih gauk,daong ba gauk yam tagok dalam bruk mbang piah ka rai diuk dak harei dak hadah hadai./.