Trich doan Amu Nhan daoh

Kadha daoh “palei chăm dhar phon wa” hu nhạc sĩ Amư Nhân paneh tabiak di thun 1985. Thun nan, ong hu nao rivang palei wa. Hadei di tuk mai veik, meng hatai anit ranam, maong mboh dom salih baru dalam rai diuk di bhap bini di palei negar, ong paneh tabiak kadha daoh ini. “Palei chăm dhar phon wa” ndung bak lagu daoh bhap bini chăm, gam lai li-ar gam drah samar tui jalan anh hùng ca, mbuan nao tame dalam hatai menuac. Ragu saong panuac daoh brei mboh hatai anit ranam di bhap bini chăm brei ka wa. Nhac4 sĩ Amư Nhân lac:

 “Pak angan kadha daoh biak mộc mạc. Nyu brei mboh bhap bini chăm, dom palei chăm daok nao tagok, kayua hu wa Hồ di kol drei ba mai độc lập tự do ka taneh ia. Daok dahlak lac nhạc sĩ, dahlak mboh hu bruk nan saong paneh tabiak piah brei thau hatai jai di urang chăm brei ka wa Hồ anit ranam”.

Palei chăm Phú Nhuận, huyện Ninh Phước, tỉnh Ninh Thuận lac labik tabiak rai kadha daoh “palei chăm dhar phon wa”. Meng ini, kadha daoh hu yava atah jang tal dom palei chăm di Ninh Thuận, Bình Thuận saong dom tỉnh gah meraong. Oh ta-eng hagaih nhạc sĩ Amư Nhân, bo urang chăm di palei Phú Nhuận jeng mboh hadah mbaok meta ka bruk ini. Ong Trần Văn Vính, akaok palei Phú Nhuận, xã Phước Thuận, huyện Ninh Phước lac:

 “Kadha daoh ini nao biak atah, min biak jaik saong palei chăm kol dahlak. Tuk kadha daoh palei chăm dhar phon wa yava tagok, bhap bini palei Phú Nhuận kol dahlak biak hadah mbaok meta”.

 trích đoạn bà Hương daoh meng sap chăm.

Bruk hadah mbaok meta nan hu brei mboh tapa bruk bhap bini anit ranam saong kanal cambaih kadha daoh ini, meng panuac Yuan tal panuac chăm. Thun ini umo labaih 60 thun, kanal biak ralo kadha daoh bhap bini saong kadha daoh ndung bak ragu bhap bini chăm, amuk Lộ Thị Hương brei thau “palei chăm dhar phon wa” nan lac sa dalam dom kadha daoh amuk takre, dom pluh thun ini mai, yaok mbang daoh lac yaok mbang mboh drut drui.

 “Hatung hatian di urang chăm brei ka wa Hồ nan. Drei kanal jeng lavik ye, tuk urang barau paneh tabiak, urang daoh, drei pang drei mblah tui, kanal mbiah tal harei ini”.

Tal urak ini, meda lac dalam palei thei jeng kanal cambaih kadha daoh ini. Ong Đổng Hộ, akaok kapul urang taha umo palei Phú Nhuận brei thau:

 “Anek kamuan thei jeng megru tui. Dalam palei ini meng urang taha tal uranaih sit jeng thau daoh kadha daoh nan, abih 99% ye. Daoh piah hadar dhar phon di wa hu  padang taneh ia. Saong mbiah tal rai rah harei ini, yaom lac wa lihik nao, min wa jeng daok dalam baoh hatai kol dahlak”.

Rai rah hadei patui jalan rai rah nao dahlau. Hatai jia tame chủ tịch HCM nan ye diuk miat haong thun bilan, dalam baoh hatai di bhap bini palei chăm Phú Nhuận, Ninh Thuận jeng yau bhap bini Chăm dalam taneh ia. Hatai anit ranam nan yava tagok miat luac sajarah dak rai bangsa./.