Pathau mikva saong taong abih gauk! Hadei di tuk lah  di mblang mesruh Tây Nguyên saong dom tỉnh Duyên Hải gah kreh negar, kol lin ngụy kham merat padang labik pacang caga diPhan Rang piah pacang cakak jalan nao di bol lin drei, khik kajap bruk pacang caga meng atah piah khik caga Bei Gon. Min ngan haong hatai khang yau angin ribuk, bol lin drei taong tayah hu “Hala pacang pasei Phan Rang, rik daong ka bruk jayak prong di bilan xuân 1975. Kadha vak hadei ini di Việt Quốc, urang vak di rayo sap ndom Viet Nam daok pak bal raya Hồ Chí Minh brei thau veik dom ký ức hào hùng di dom urang dahlau diah hu mbaok dalam chiến dịch ini: 

Bal sit Phan Rang - Tháp Chàm lac sa bal sit daok angaok jalan nao tagok di Ninh Thuận. 40 thun dahlau, labik ini lac labik rah tabiak dom mbang taong khang di bol lin drei piah taong tayah labik pacang caga meng atah di kol ngụy quyền Nguyễn Văn Thiệu. Ong Lê Văn Nhiễm, dahlau diah ngak akaok ban chính trị Ban chỉ huy Tiền phương C tỉnh Ninh Thuận khan veik: akaok bilan 4 thun 1975, ngak tui jalan ba di Bộ Chính trị, Khu ủy saong Quân khu 6 tacei pato tỉnh Ninh Thuận njauk patagok taong abih lực lượng pak bhum taneran saong căn cứ, nao tapak tabiak gah nak taong tame kaol khamang, daong ka bol bhap brok tagok peih paha palei negar. Tỉnh ủy saong Tỉnh đội Ninh Thuận kham merat pasiam veik mBan chỉ huy Tiền Phương C caga pambuak haong bol lin chủ lực peih paha Ninh Thuận. Ong Lê Văn Nhiễm brei thau: Bruk praong di Tiền phương C nan lac taong kaol khamang peih paha jalan 11 dak samar dak  siam, piah pacang oh brei ka kaol khamang daong tagok Lâm Đồng, saong oh brei ka kol nyu angaok Lâm Đồng trun daong ka Phan Rang. Taphia di nan, pambuak haong bol lin chủ lực daong  peih paha tỉnh Ninh Thuận.

Meng harei 1 tal harei 3/4, hadei di tuk lah pak Lâm Đồng saong Khánh Hòa, kol tàn quân pak Đà Lạt ba gauk nduac tui jalan 11 mai Phan Rang jeng njauk bol lin drei cakak taong. Bol lin drei hu peih dom mbang taong meblah mek dom palei tapen jalan 11, peih paha quận Krông-Pha. Bộ đội puk palei di dua huyện Bác Ái saong Anh Dũng gam haong dom đơn vị karei di tỉnh hu tacei brei pabak ka Tiểu đoàn 610 ngak bruk khik iek Đèo Cậu, cakak taong kaol khamang meng mblang kapal haok Thành Sơn tabiak phản kích, taphia di nan pacang khik jalan 11 saong caga pambuak haong bol lin chủ lực peih paha bal sit Phan Rang.

Tuk nan, pak Phan Rang, ngụy quyền Bei Gon nyu pataom sa kapul quân sự prong, khang, dalam nan hu: Sư đoàn 6 không quân, Lữ đoàn 2 dù, Sư đoàn 2 bộ binh, Liên đoàn 31 biệt động quân, 2 chi đoàn thiết giáp pambuak haong gah pháo binh, bảo an, dân vệ, cảnh sát hu labaih 10.000 urang; 150 sruh kapal haok dom janih caga taong veik. Di langiu tasik daok hu hạm đội 7 caga daong. Kol lin ngụy mek pabah mbang Du Long, atah di Phan Rang labaih 20 mbaik jalan, ngak jeng labik pacang caga. Rah tui jalan 1 meng Du Long tame Cà Đú, kaol nyu daok padang ralo labik pacang caga khang kajap.   

Ngak tui jalan ba di Bộ Chính trị nan lac njauk ngak ka nyu salah bruk peih paha gah meraong dalam bilan 4, Trung tướng Lê Trọng Tấn - Tư lệnh cánh quân Duyên Hải tabiak lệnh ka Sư đoàn 3 Sao Vàng saong Trung đoàn 25 Quân khu 5 taong tame chip meblah mek Phan Rang. Page mesup harei 14/4, pháo binh saong bộ binh di drei meblah hu quận lỵ Du Long saong dom labik jaik taphia, ngak tayah pren khang di kol khamang, taphia di nan taong tayah hu ralo mbang phản công di kaol khamang. Ong Huỳnh Hữu Lộng, urang dahlau diah ngak Tham mưu trưởng mBan chỉ huy Tiền phương C daong Cánh quân Duyên Hải tame peih paha tỉnh Ninh Thuận khan veik: Page mesup harei 14, bol lin drei taong tayah labik pacang praong di quận Du Long saong taong meblah Suối Vang, Suối Đá, Bà Râu. Kaol khamang tuk nan mesruh veik  meng kapal haok palaik bom saong trực thăng cuh pháo, kol lin akaok mbaok haluk pandar pháo cuh tame labik di drei. Min oh ngak hagait hu kayua  drei jeng cuh saongpacang taong abih dom jalan daong nan).

Page harei 16/4, bol lin drei parabha jeng 3 gah praong: Gah akaok mereip hu radaih tăng ba akaok nao tui jalan 1, hadei di tuk taong meblah Phan Rang meda taong tagok mblang kapal haok Thành Sơn. Gah  ka dua meng Tây Bắc taong tapak tame mblang kapal haok Thành Sơn. Gah ka klau taong meblah pabah lamnge Ninh Chữ, oh brei ka kaol khamang nduac tabiak tasik. Pambuak haong bol lin chủ lực, bol lin 311 daok pak ceik Cà Đú tabiak, taong tame kaol khamang daok klaak nduac. Di gah Tây Bắc, đặc công saong công binh Quân khu 6 pambuak haong bol lin puk palei nao tapak trun Phước Thiện, Ninh Quý taong tame labik Bảo An - Tháp Chàm. Tướng ngụy Nguyễn Vĩnh Nghi 37 mbang brei kapal haok par tagok taong tame Trung đoàn 101, min khaol drei samar yam tame bal sit. Tal 9 tuk meteh harei 16/4, hala dok jayak hu par angaok Toà hành chính – labik dang akaok di ngụy quyền tỉnh Ninh Thuận, brei mboh lac bhummi Ninh Thuận hu peih paha. Ong Phạm Việt Dũng, urang dahlau diah ngak Trợ lý Binh vận Trung đoàn 18, Sư đoàn 325, Quân đoàn 2 tame peih paha Phan Rang khan veik: Tuk nan, khaol dahlak hu brei thau lac Trung đoàn 101 di Sư đoàn 325 hu ngak mũi tiến công akaok mereip gam haong dom kapul ayut peih paha Phan Rang. Harei 16/4, khaol dahlak nao tapa Du Long saong peih bruk taong tame bal sit Phan Rang – Tháp Chàm, dua gah jalan bak phao 105, tuk nan oh daok sa urang ngụy halei tra nduac abih.

Jayak labik pacang caga Phan Rang hu yaom biak glaong, rik daong praong ka bruk đại thắng mùa xuân 1975 dakrai. Ong Nguyễn Trọng Nghĩa, Akaok Kapul urang dahlau diah ngak bol lin tỉnh Ninh Thuận, jeng lac Tham mưu trưởng Tiểu đoàn 610 dahlau deih, brei thau: Drei taong tayah labik pacang caga Phan Rang hu ralo makna. Kasa lac taong tayah bruk caong pacang caga meng atah di kaol ngụy quân ngụy quyền Bei Gon. Kadua  lac, labik pacang caga di kaol khamang pak Du Long saong tỉnh Ninh Thuận hu peih paha taong abih. Kaklau tra nan lac.  peih tabiak jalan ka bol lin chủ lực – cánh quân duyên hải miền Trung samar taong tame dom tỉnh gah meraong taong tayah pabah mbang pasei Xuân Lộc, daong  peih paha Bei Gon.

Ninh Thuận hu peih paha. “Hala pasei pacang” Phan Rang - labik pacang caga meng atah piah pacang khik Bei Gon njauk kol drei taong tayah brei mboh bruk lah khang dalam kham merat puac abih di kaol khamang piah pacang khik chế độ Bei Gon. Kuhria meng tuk nan, tinh thần saong pren mesruh metak di kol ngụy quân dak harei dak yếu ớt, yau brei mboh lac chế độ Sài Gòn daok cang tal harei jaleih, gah meraong jaik hu peih paha./.