Gru duah dom bài ngak iek lagaih saong tuk halei jeng caik hatai pang phone piah langyah samar drah ka anek saih

Anai gru Nguyễn Thanh Hòa, pato môn Lịch Sử - sang bac THCS Nguyễn Du (Quận 1) brei thau, gam lac gru pato bộ môn, gam lac chủ nhiệm tal bac, nan ye yaom lac daok di sang min anai oh daok hu tukvak iek glang sang danaok. Piah daong ka anek saih chreih chrai, bac da-a hu siam, anai Hòa jeng yau rilo anai gru, cei gru karei sahneng duah ngak bharau bruk langyah, pato pakai, nan oh ka ndom tal bruk javap jalei dom tangi sua di amaik ame anek saih, saong rilo bruk karei karei. Anai Hòa khan lac:“Tin nhắn phone tangin gam gam, amaik ame bloh anek saih ieu, hu bruk yau K12 (phần mềm bac online) khut, oh tame hu atau anek daok ngak bài ye nyu  out tabiak, sa harei javap jalei jaik sa rituh tin nhắn”

Daok cei gru Nguyễn Tuấn Minh, pato môn Hóa học di sa sang bac pakat 3 daok di huyện Bình Chánh, bruk caga pato pakai abih rilo tukvak kayua dom panuac  ndom puac jeng brei ngak bahrau, harei puac adit brei caga ka adit tal. Kayua bruk biak karei di môn Hóa học, gru Minh brei sahneng duah dom bruk di anak meta piah ka anek saih mbuan thau, dom bài ngak iek lagaih saong tuk halei jeng caik hatai pang phone piah langyah samar drah ka anek saih: “Tukvak 1 mon pato online nyu katut panak veik nan ye drei njauk pandar dom phần mềm daong pabak. Tuk pato tok hu bruk pagap brei mboh, dom adei oh sahneng mboh cambaih hu  taong abih dom bruk meda tamuh tabiak, nan ye dom bài tập tuk ini hu daong pabak ilamu di dom adei”

Anai Nguyễn Thị Thế Loan, gru chủ nhiệm tal bac 1 sang bac Tiểu học Bông Sao (Quận 8) khan lac, tuk pato online, mesup tal bac peih tabiak meng mon 7, biar harei anai caga ka bruk pato di harei hadei, melam mai chấm bài ka anek saih. Hu melam medeih biak lavik melam piah cang anek saih payua bài, kayua rilo amaik ame harei nao ngak, melam mai meng hu mon tacei anek. Tuk bac online, hu adei dom adit camereip bac biak chreih chrai, min hadei di nan takik caik hatai tui pang. Rilo tuk anai Loan gam ngak gru pato, gam ngak amaik ame tacei anek bac. Anai Loan khan lac: “Anek sit abih di drei bac tal 2, daok la bac haong amaik. Rilo tuk ndom haong anek lac amaik langyah salah bruk di dom ayut bloh tal anek. Urak ini ban raya brei pacadu bruk pa-atah di gauk, min dahlak jeng oh ka yam takai tabiak truh sang kayua oh hu tukvak”

Tui gru Huỳnh Thanh Phú, Hiệu trưởng sang bac THPT Nguyễn Du (Quận 10), bruk bac online urak ini jeng daok bahrau bahrang ngan saong bruk pato megru di Việt Nam, dom cei gru anai gru takik hu pato pasram, saong komputer, jalan internet di rilo gru pato jeng oh ka pabak hu, ngak kandah kandaiy tal bruk pato saong bac. Urak ini dom cei gru, anai gru gam pato online, gam klah rabha, bac megru ilamu di gauk piah pato pakai hu chreih chrai, dui pachreih anek saih saong hu siam lagaih. Kayua yau nan ye, dom gru pato biak caong hu bruk klah rabha di dom amaik ame anek saih: “Dom gru biak glaih glar, abih di nyu lac oh thau cambaih ka công nghệ ye glaih glar jang rilo mbang. Taong abih dom gru pato urak ini ngak bruk abih drei saong caik biak rilo tukvak , prein yava ka sa mon bac online”

Jit ruak rah tabiak, bruk bac online lac bruk brei hu, min oh plaih hu kan kandah ka urang pato saong menuac bac. Min jang urang halei karei, dom gru pato lac dom urang glaih glar di abih. Urang daok kham merat eng drei bac megru, eng drei pasiam dom ilamu ndom puac nao mai dalam tal bac online, eng drei pasiam dom labaih kurang dalam tuk pato online. Bruk kham merat nan njauk hu iek praong, saong brei hu bruk klah rabha di yaok menuac urang, klah rabha dom kan kandah, trak damak di dom cei gru, anai gru dalam tukvak kandah kandaiy yau urak ini./.

Urang lang: M. Phuong – 16/10