Di kreh palao atah, yaok thaik binguk,, yaok sap ndom bhain randap di gauk gar daok di sang tuk halei jeng ngak brei dom urang jakar, urang lin tasik mboh biak uan. Kayua yau nan ye, dom boh kapan song dom pandap panda sit sot di dom kapul ngak bruk ba tabiak palao kaoh dalam dom harei jiak si tet, lac hatai anit ranam di dom urang daok di palei brei ka dom saai, jeng  bruk pachreih ba ka dom sa-ai yam tapa kan kandah piah ngak siam bruk khik caga lingik tasik palao kaoh ginreih di taneh ia. Kadha vak di  Phương Thúy, urang vak di rayo sap ndom VN dalam mbang nao ngak bruk di bhum 5 Hải quân. 

Nao tapa yaok rituh hải lý angaok dom riyak khang di tasik, boh kapan 637 ba khol hulin tabiak tal mik va, urang lin dok diuk rai song ngak bruk khik caga chủ quyền taneh ia di dom palao atah dalam bhum tasik  Tây Nam yau hòn Khoai, hòn Chuối, Thổ Chu... Nan lac dom pok pandap ndung bak hatung hatai menuac urang di boh taneh brei ka mik va urang lin di labik ni uan raok Tết nguyên đán, lac dom boh sang bahrau padang ka urang tong ikan song urang lin angaok palao piah pacang pandiak, njaik hajan. Mbang camereip hu nao tal dom palao kaoh yau  hòn Đốc, Nam Du, Thổ Chu...amuk Trần Thị Đẹp, daok di An Giang brei thau, hu mboh di anak meta rai duik dok rilo kan kandah, kurang anak, kurang likuk di dom urang lin angaok pulao, thei jeng mboh anit song mboh brei hu trách nhiệm jang dalam bruk klah rabha dom kan kandah labaih kurang song dom saai. Nao rivang dom urang lin di bhum tasik gah Tay Nam daok gaok rilo kan kandah dalam raidiuk, min hatung hatain di dom urang lin tuk halei jeng chreih bui,  halan hatain khik caga taneh ia. Tapa nan mboh lac, brei hu trách nhiệm jang dalam bruk dong ka dom urang lin, jak ba menuac urang, dom kapul nyom piah daong pren, daong pandap ka dom urang lin.

Ong Huỳnh Văn Phúc, Phó Chủ tịch Mặt trận tỉnh Vĩnh Long brei thau: yaom lac dok atah sang, atah di gauk gar min tuk tabiak rivang dom urang lin dok ngak bruk di angaok palao, ong hu mboh cambaih jang dom urang lin ranaih umo halan hatain ba abih umo dsaok ranaih di drei brei ka brukkhik caga tasik, palao di taneh ia. Ong jeng khan lac, hadei di mbang nao rivang ni brei pathau khan, jak ba bhap bini piah thau jang ka rai duik di adei saai urang lin daok di palao atah. Adei saai daok di labik ini njauk lac sa bruk biak praong. Tabiak tal ni khol hulin meng mboh hu bruk nan, bo dok di boh taneh iek mbao, pang rayo, iek tivi ye drei oh thau hu abih. Tabiak tal labik ni meng thau hu kan kandah di adei saai. Dalam tuk Tết anek sak pabe thun 2015 ni, lambaok ka adei saai dalam kapul likau tadhau ayuh tong abih urang jakar, urang lin Bhum 5 Hải quân hu rilo pren yava song ngak siam bruk  di drei. Tapa nan khol hulin hu payua panuac tangi sua tal taong abih boh sang di adei saai.

Taduan tuai meng boh taneh tabiak rivang palao, bui sambai di bhap bini song dom urang lin di labik ni hu mboh cambaih di angaok mbaok meta. Nao tal halei jeng mboh dom urang lin trạm rada, đồn biên phòng jar var parang tabiak dom janih "đặc sản" hu caga meng dom harei dahlau piah payak kapul. Nan lac njam hijao, lac dom drei menuk kayua urang lin rong, atau kaya ikan di urang tong chap ikan bahrau chap mek hu meng saboh mesup. Saai  Phan Thị Mến – diuk di Trung úy Phạm Thọ Trường, trắc thủ  Trạm rada 505 di angaok palao hòn Chuối, bahrau meng Thái Bình tabiak rivang pasang brei thau : Harei ni oh ka lac harei Tết  min adei saai dalam đơn vị kuhria caga, biak jar var min biak sambai. Var lisei harei ni adei saai caga ginup yaok janih yau var lisei uan raok tet piah taduan kapul. Adei saai bui sambai lô, chreih chrai lô.

Meng Thổ Chu tal hòn Khoai, hòn Chuối, quần đảo Nam Du, hòn Đốc...dom pok pandap sit sot, dom panuac doh taom gaok ndom nyai nao mai di angaok palao, lac tong abih hatung hatai anit ranam, klah rabha di urang dok di boh taneh brei ka urang jakar, urang lin song bhap bini dok ngak bruk song dui rai di labik ni, dong ka dom saai khang hatai yam tapa dom kan kandah labaih kurang tuk dok atah boh sang, atah di gauk  gar piah ngak siam bruk khik ramik tasik palaoginreih di taneh ia. Thượng úy Hồ Hữu Nghĩa- Trưởng Trạm rada 600 di quần đảo  Nam Du lac: Dom urang lin kol hulin saong bhap bini di labik ini mboh biak uan tabuan. Hulin jang yau dom urang jakar, urang lin song bhap bini angaok palao daok chreih chrai uan raok sa thun bahrau dalam bui sambai, siam mekre, patak patom. Tapa nan jeng likau payua panuac tadhau yuh tal mikva, gauk  gar hu sa thun bahrau siam mekre salamat song likau sinya haong mik va daok di boh taneh sahanang hatai kayua di langiu ni jeng hu khol hulin khik caga palao tasik.

Thun bahrau yau mai tal dahlau jang di dom baoh palao gah Tây Nam taneh ia. Kayua lac, boh taneh tuk halei jeng pamaong tabiak tasik, pulao, tuk halei jeng ba abih hatai anit ranam di drei brei ka dom urang lin dok harei melam pan kajap tangin phao khik caga chu quyen tasik palao gam song dom urang tong chap ikan dok harei melam khang hatai tabiak tasik./.