Kreh tasik praong, pulao Nam Yết mblo tabiak yau sa asar intan dalam dom asar intan Trường Sa. Sa baoh pulao hu ralo phun la-u, phong ba, mù u, bàng baoh vuông… hijao mekre. Taphai bruk sẵn sàng chiến đấu, dom urang lin labik ini oh huac kan kandah harei melam iek glang ka yaok phun angaok pulao, ngak ka dom phun hijao jeng baoh sang siam mekre ka rai diuk, gam ngak brei chreih hatai manuac urang tuk yam takai tal Trường Sa. Urang vak Vân Thiêng hu kadha vak: “Hijao mekre pulao la-u Nam Yết”. Daa mikva saong taong abih gauk tui pang.          

Khaok dahlak mai rivang pulao Nam Yết - huyện pulao Trường Sa, tỉnh Khánh Hòa dalam sa biar harei bilan 5 pandiak thu. Gilai pataok meng atah, khaol dahlak ndik ca nô tame pulao. Yam tapa  cổng chào hu talei akhar “Pulao Nam Yết” gam haong panuac thề abih hatai ka taneh ia, khaol dahlak yau lạc tame sa baoh bein hijao di la-u, mù u, phong ba, bàng baoh vuông. Dom pa-uh pa-ang dalam bilan pandiak yau lihik abih tapa plak tangin pan kajap gauk saong cambuai klao biak chreih chai di dom urang lin angaok pulao. Dom sa-ai taduan raok khaol dahlak yau gauk gar di palei mai, ala halui di phun mù u rituh thun tapen cột mốc chủ quyền.

Yaom lac oh thau cambaih dom phun mù u angaok pulao Nam Yết hu meng tuk halei mai, min ngan haong sa phun prong pacang halui li-an ka 200 urang dalam sa mbang giao lưu văn nghệ ye thei jeng thau kayua halei dom phun mù u angaok pulao Nam Yết hu ngak ka urang yam takai tal ini oh var hu. Trung úy Thái Viết Nhị, Phân đội 2, cụm chiến đấu 1, pulao Nam Yết lac: Phun prong abih angaok pulao hu mù u , 4 ụrang meng kua abih got. Nyu pacang halui prong, ginup labik ka yaok rituh urang giao lưu haong urang jakar, urang lin angaok pulao. Langiu di nan nyu daok ngak hacih môi trường, pacang halui ka adei sa-ai dalam dom tuk sinh hoạt, abih di nyu nan lac tuk lingik pandiak, urang jakar urang lin hu labik peih padeih padei.

Min bruk dui pachreih di Nam Yết daok hu ralo jang nan. Abih baoh pulao halui li-an ala binguk phun la-u hijao. Di Trường Sa, oh hu labik halei la-u tamuh samar saong khang kadang yau di pulao Nam Yết. Khang hatai yau dom urang lin harei melam khik iek langik tasik palei negar, labik halei hu taneh ye labik nan hu phun la-u hijao. La-u tamuh jeng glai angaok pulao, bak baoh saong jamen aia. Ala halui phun la-u hijao, harei harei dom sa-ai kham merat pasram, dom baoh la-u meda hu daong ka dom sa-ai tuk mahu aia, hala la-u hu pandar piah ngak blah tauk pacang riyak, pacang angin mbak ka dom bein njam, van raong anek athur, menuk ada. Balaok la-u thu ngak pandap chok aia atau pagam baoh bao tasik tame ngak jeng dom hộp quà sit alin brei ka urang daok pak taneh haluk. Mbang ndom biai haong  Thiếu úy Đặng Hoàng Bạo, palei daok pak Bình Dương brei thau ngan haong dom sa-ai, phun la-u nan lac sa binah dalam rai diuk pak Trường Sa: Pulao drei me-om hijao taong abih, abih  di nyu nan lac la-u. La-u di pulao drei siam saong ralo baoh.

- Adei sa-ai drei rik daong yau habar piah ka pulao ini dak harei dak hu ralo la-u, hu ralo halui?

- Dom bilan ye peih bruk pala la-u sa mbang.

- Adei pakla hu dom phun paje? 7 phun paje.

- Phun di adei yau halei? Nyu glaong labaih sa mét, hu phun bahrau pacah meta”

Nam Yết lac baoh pulao prong ka 4 di Trường Sa. Nam Yết daok lac bhum tasik pulao hu hệ động thực vật ralo abih, labaih 240 janih san hô, labaih 80 janih rong tasik, labaih 400 janih ikan, kra kanduh tasik, jaik 20 janih phun angaok kaoh yau la-u, mù u, bàng baoh vuông, phong ba; ralo janih kaya ikan dalam aia hu yaom glaong yau bào ngư, hadang hùm, hải sâm, ốc anh vũ, vích, đồi mồi... saong 10 janih cim tasik, dalam nan hu dom janih hu ba tame tapuk bhong yau hải âu mbaok mbong, cim điên hatian mbong, chim điên takai bhong... Khu bảo tồn tasik Nam Yết, dalam nan hu pulao Nam Yết saong labik jaik taphia praong jaik 20 ribau ha daok hu padang nga. Rup binguk sa baoh pulao hijao halui la-u nan meda lac kadha dui pachreih di Nam Yết angaok jalan tabiak rivang Trường Sa. Trung úy Thái Viết Nhị lac: Dom rai urang lin angaok pulao patui gauk pala la-u piah ka pulao dak harei dak hijao jang, mekre jang. Tuai damuai angaok baoh taneh tabiak ini, ralo urang tatuak drei tuk mboh phun la-u pak ini hijao siam yau nan. Thei jeng tangi sua lac kayua halei di labik ini oh pala phun hagait karei bo pala ralo la-u yau nan….

Anak tal, tuk tour du lịch Trường Sa hu peih tabiak, pulao la-u Nam Yết meda lac sa dalam dom labik peih takai oh kurang hu di tuai damuai. Piah ka kreh tasik bak angin pandiak, tuai damuai hu menyum aia la-u jamen bingi, hu yam nao ngaok dom canah jalan hijao halui la-u bo yau mboh drei daok nao angaok dom jalan bhian randap di bhum palei Việt Nam, piah ka manuac urang mboh anit ranam jang Trường Sa; piah ka Trường Sa dak harei dak jaik jang haong baoh taneh, baoh taneh jeng dak harei dak jaik jang haong Trường Sa!