Tukvak tapa, rilo urang di Ban raya Ho Chi Minh jeng urang piah chot pagat di dom kol bleik ngak ja mek angan jabat Bao hiem xa hoi piah chot pagat. Dom jalan chot pagat dalam nan hu bruk ngak ja gah pabak jitvu brei harei ngak bruk, pandar tich hop can cuoc cong dan tame harak BHXH online hu mek jien, atau pabak harak gar tapa jalan online.

Sa di dalam dom bruk jaik ini hu pambuak tal ong Lưu Chí Thành, daok di phuong Phú Nhuận, Ban raya Ho Chi Minh. Atah di ini dom harei, ong Thành taduan hu sa mbang taong phone meng urang mek angan lac urang ngak bruk di BHXH. Urang ini khan lac ong brei tich hop harak gar BHXH tame majam VNeID piah oh klaih klaoh bruk mek jien padeih huu saong sang iek taong ruak di BHYT. Hadei nan, ong taduan hu jalan link ba tal sa blah web di jabat BHXH, pandar ong tame tapa online.

Ong Thành brei thau: “Dom urang nan pandar cap mek dahlak ngak dom bruk pathau khan yau bhian, hadei nan pandar hahlak hulin bah CCCD tame phone piah ngak cambaih laih. Dahlak hulin meng katuak drei tuk mboh rah tabiak akhar patui veik payua jien, tuk ini dahlak meng padeih”. Meyah pa-um akhar “Patui veik”, paok jien labaih 32 trieu dong di ong Thành meda njauk nduac lahik abih.

Tukvak blaoh tapa, BHXH Ban raya Ho Chi Minh hu patui veik papar tabiak khau tin kakei caga ka bruk hu dom kol bleik ngak ja mek angan jabat BHXH piah chot pagat payua jien, hu dom jalan yau taong phone khan lac tavak jien BHXH, BHYT, BHTN saong pandar payua jien samar drah tame tai khoan di nyu, payua harak, email ja piah klaik mek khau tin tai khoan, mat khau, ma OTP gilang pariak, daong tich hop BHYT tame pandar VNeID atau tich hop CCCD tame harak gar online.

Ong Trần Dũng Hà – Phaok Yam ndok BHXH Ban raya Ho Chi Minh ndom mayai lac: “Ka sa, khol dahlak hulin oh hu taong phone tapak ka menuac urang, urang ngak bruk atau gah ngak mbang pablei salih piah pandar ngak harak gar, taong abih dom bruk meyit meyao jeng tapa labik hu angan. Dalam luac jalan ngak harak gar, meyah brei pasiam, pabak harak gar, khol dahlak hulin jeng ngak harak khan bayar, hu mbaoh angan saong bayar ka rahra, gah ngak mbang pablei salih piah ngak. Ka dua, khol dahlak hulin hu ngak saoh saong oh hu mek jien rahra. Ka klau, taong abih dom khau tin blaoh rahra caong khin jeng hu angaok dom blah web hu angan di BHXH Viet Nam saong BHXH Ban raya Ho Chi Minh. Dom meyit meyao meda hu ngak online di angaok Pambang jitvu karja pakat Negar atau Pambang jitvu karja pakat Negar di BHXH Viet Nam”.

BHXH Ban raya Ho Chi Minh pachreih rahra brei paglaong hatai caik caga, patruh oh pabak khau tin di drei, lek taka CMND/CCCD, lek taka tai khoan gilang pariak ka urang karei ngak ja mek angan urang jakar BHXH. Oh tame don jalan link atau mek trun dom ung dung meng dom harak tin nhan oh thau krein. Tuk ngak dom harak gar karja ka BHXH, BHYT, meyah gaok kan kandah brei langyah atau tok hu khau tin drei medil, brei pambuak tal Tong dai BHXH Viet Nam atau jalan talei pandiak BHXH Ban raya Ho Chi Minh saong BHXH labik jaik abih piah hu daong, ngak tantu cambaih laih./.