Patui tame yaok bruk saong khat lahik meng bruk pandar binguk thaik thaot urang karei, urang duas meda njauk taong bhat hanh chinh, gaok mai njauk taong bhat tui adat hukum hinh su.

Bahrau di ini, bac si Cao Hữu Thịnh bahrau brei tapa labik lambaok ka hukum hu thong cao bao chi, gam di nan kayua harak khan ka kong an phuong Chợ Quán, Ban raya Ho Chi Minh saong kong an Ban raya Ho Chi Minh.

Tui bac si Thịnh, tukvak jaik ini, ong duah mboh rilo tai khoan mang xa hoi patah angan yau ong, ngak mbuan ka urang nda lac dreih drei, piah ngak, cakak pagam tame dom thaik thaot, video kanjah jhak, ngak kanjah tal dom gheih ghang siam mekre piah chot pagat, pablei salih dom ndap nda yau ndap nda chuc nang, jru palageih, jru ngak sit ralo…

Dom blah mang xa hoi jeng pandar AI piah ngak tabiak thaik thaot, sap ndom ja, video ngak ka urang pandar je lac bac si Thịnh yaih khan, pablei salih dom ndap nda oh thau meng halei mai, oh thau siam halei oh..

Luat su Hà Thị Thanh Tuyền, Kapul Luat su Ban raya Ho Chi Minh, brei thau ngan haong yaok bruk tantu, tuk hu hatai caong ye jabat chuc nang brei tame ngak bruk saong ngak tantu bruk njauk suan tui adat hukum. Min yaok urang, kapul halei jeng oh hu khin ba khau tin, thaik thaot menuac urang karei tagok mang xa hoi, blaoh ndom dom panuac ngak kan kandah tal urang.

Dom bruk ini ngak kan kandah tal quyen tanggung saong thaik thaot, quyen tanggung padauk raidiuk hu Hien phap 2013 saong Hukum Bhapbini Dan su 2015 pacang khik. Cambaih laih lac, Pakat 20, 21 Hien phap thun 2013 brei adat lac: Grauk urang hu quyen tanggung oh brei ka thei ngak kan kandah tal rup pabhap, hu hukum pacang khik ka prein yava, angan je saong menuac urang di drei; oh njauk kateik geik, taong paoh, ngak lahik angan je yau ye ngak kan kandah tal rup pabhap, prein yava, ngak kan kandah tal angan je, menuac urang di drei.

Abih urang hu tanggung quyen oh brei ka thei ngak kan kandah tal raidiuk ta-eng drei, kadha kandauk di drei saong baoh sang; hu quyen pacang khik angan je di drei. Khau tin ka raidiuk di drei, di baoh sang hu hukum nagar khik kajap karo.

Rup Ta-eng drei hu tanggung quyen ngan saong thaik thaot di drei, bruk pandar binguk thaik thaot di drei brei ka hu bruk mbaoh tangin. Bruk pandar thaik thaot di urang karei meng bruk pablei salih ye brei bayar jien ka urang hu thaik thaot, langiu di bruk dom gah hu sanya mbaoh tangin karei. Raidiuk ta-eng menuac urang, bruk kandauk di menuac urang, di baoh sang lac bruk oh hu thei ngak kan kandah hu saong hu hukum pacang khik (Taka 32, 38 BLDS 2015).

Langiu di nan, bruk ba tagok khau tin oh njauk daok ngak chung adat Hukum An ninh mang thun 2018 saong Hukum Kong nghe khau tin thun 2006.

Daok bruk taong bhat ngan haong urang ngak chung suan Hukum  nagar, Luat su Đinh Thuỵ Phượng Uyên (Kapul Luat su Ban raya Ho Chi Minh) brei thau, di tanut njuel, bruk pabak, klah rabha khau tin ja, khau tin suan, tuh thac, ngak kan kandah tal angan je di jabat, kapul, angan je di menuac urang meda njauk taong bhat jien. Tanut taong bhat meng 10 - 20 trieu dong brei ka kapul, daok urang ngak suan hukum ye njauk taong bhat meteh jien ½ njauk taong bhat di kapul. Gam haong nan, pandar jalan pasiam bruk kan kandah lac pandar tayah abih dom kadha ba tagok.

Mabuh hukum trak jang, tui yaok bruk bo urang duas meda njauk taong bhat hinh su ka dom duas. Urang khat lahik jeng meda hu yak tabiak toà piah pandar bayar jien dan su rahra bhap bini…