Urang jakar mai tacei pato bruk gauk tok dalam but pajaih

Meyah thun 2017, tuk huyện ủy Bác Ái bahrau tabiak Chỉ thị 12 ka patagok dom jalan ngak piah pacang caga, patakik di abih bruk tok gauk tuk daok sit oh ka ginup umo thun tui hukum karja di bhum bhap bini Raglai ye dalam huyện hu 89 mbang tok gauk tuk daok sit oh ka ginup umo thun, hadei di 03 thun, nan lac thun 2020, Bác Ái tok daok 11 mbang tok diuk tok pasang tuk oh ka ginup umo thun. Bruk njauk biai nan lac huyện Bác Ái oh ka mboh mbang halei khin gauk dalam but pajaih. Dalam dom thun jaik di ini, bruk lakhah caga di bhum bhap bini bangsa takik, bhum biak kan kandah hu ngak tui Hukum lakhah caga saong baoh sang. Min bruk khin gauk tuk umo thun daok sit jeng daok rah tabiak dalam bhum bhap bini bangsa takik, abih di nyu lac tok gauk dalam but pajaih jeng daok hu mboh dalam bhap bini bangsa takik bhum biak kan kandah. Piah hu siam mekre yau ini, lac meng hu bruk ba tangin tame di abih hệ thống chính trị. Ong Mẫu Thái Phương, Bí thư huyện ủy Bác Ái, t.Ninh Thuận brei thau:

"hadei di tuk tabiak Chỉ thị 12, abih hệ thống chính trị meng huyện tal puk palei, abih di nyu lac UBND huyện patabiak jalan ngak biak cambaih laih piah peih ngak, peih bruk brei thau cambaih, pathau khan ka bhap bini. Hu dom bruk, puk palei peih ngak biak khang, dom urang oh ngak tui, njauk langyah gah hành chính, khik kajap bruk di adat hukum. Meng nan, bruk lakhah caga tuk oh ka ginup umo thun tui hukum jeng trun daok takik".

Hadei di tuk huyện ủy tabiak Chỉ thị 12, huyện Bác Ái brei padang 13 Kalup kapul patrun patakik bruk tok diuk tok pasang tuk oh ka ginup umo thun saong khin gauk dalam but pajaih di dom xã saong Sang bac THPT – bangsa gam bac gam daok Pi Năng Tắc. Langiu di nan, taong abih 9 xã di huyện Bác Ái jeng hu tabiak sarak piah peih ngak dom jalan patrun patakik bruk lakhah caga tuk daok sit dalam xã.Bruk tacei pato khang di huyện ủy Bác Ái hu daong ka pakat ủy, karja, kapul nyaom dom xã dak harei dak thau njauk, thau ginup ka labik dang, ka bruk ngak dalam tacei ba, pambuak bruk, ba tabiak rilo jalan ngak piah patrun patakik di abih bruk tok gauk tuk oh ka ginup umo thun tui hukum. Ong Pi Năng Chấn, Akaok jabat Bangsa huyện Bác Ái, t.Ninh Thuận lac:

"Meng tuk hu Chỉ thị 12 di mBan thường vụ huyện ủy, bruk tok gauk tuk daok sit jeng daok hu, min bruk khin gauk dalam but pajaih oh daok mboh. Yau nan min, kayua raidiuk kan kandah, bruk thau ka adat hukum karja di meneing mikva daok takik, mạng Internet urak ini njom tame dam dara urang umo thun sit, dom anek kamuan oh kham merat bac da-a. Meng nan ba tal bruk tok diuk tok pasang tuk umo thun oh ka ginup tui hukum jeng daok rah tabiak". 

Taphia bruk ba tangin tame ngak di karja palei, Bác Ái daok thau pambak tame dom taha palei, dom urang hu angan je di bhum bhap bini Raglai hu mbaok tame pathau khan, jak ba rahra klaak adat cambat tanarakun klak oh daok lagaih dalam bruk lakhah caga. Langiu di nan, huyện Bác Ái daok khang hatai langyah, taong phạt hành chính 12 bruk di dom sang hu jak ba blaoh min jeng daok ngak suan bruk lakah caga tuk oh ka ginup umo thun. Ong Katơr Báu, urang hu angan je di xã Phước Tân, huyện Bác Ái brei thau dom bruk ngak hu tapa pathau khan:

"Tapa bruk pathau khan di dom gah, dom kapul nyaom, pablak tame dom mbang họp di palei, jeng yau dom mbang taom gaok cử tri, kol dahlak hu pathau khan. Tal urak ini, meda lac dalam xã jeng hu bruk tok diuk tok pasang dahlau umo thun tui hukum karja. Anak tal, kol dahlak pambuak bruk haong dom gah, dom kapul nyaom pathau khan ka nyu siam jang".

Ndom ka jalan ngak khang di puk palei, ong Cà Mau Khánh, Phaok akaok UB bhap bini xã Phước Đại brei thau:

"Ngak tui Chỉ thị 12 di huyện ủy, xã jeng khang hatai padang jalan ngak di dom labik puk palei, tacei pato khang dom puk palei oh padauk dom adei oh ka ginup umo thun, jeng yau baoh sang oh ka ginup 3 rai khin gauk. Bruk ini  xã ngak catang. Tuk urang jakar, urang Đảng ngak suan, kol dahlak langyah dahlau, baloh tal dom kapul nyaom langyah, piah ngak brei trun bruk lakhah caga tuk umo oh ka ginup saong bruk khin gauk dalam but pajaih di dalam xã".

Piah ka bruk tok diuk tok pasang tuk umo thun oh ka ginup tui hukum karja di bhum bhap bini bangsa Raglai dalam huyện Bác Ái, tỉnh Ninh Thuận oh rah tabiak veik, taphia bruk ba tangin tame ngak khang di dom mban, ngành kapul nyaom saong karja dom puk palei, yaok menuac urang, yaok baoh sang, brei paglaong hatai sahneng, paglaong bruk di drei ngan saong rup drei, ngan saong baoh sang saong bruk njauk ngak di drei ngan saong puk paga./.

Urang lang: Mousaphuong -5/12