Sang bac Phổ thông Bangsa gam bac gam daok pakat sa Đăk Roong daok kreh ceik glai, dalam xã biak kan kandah Đăk Roong, atah di pasak huyện Kbang jaik 70km. Sang bac hu padang tagok atah di ini 4 thun tui jalan gam bac gam daok, kayua lac taong abih 300 anek saih bangsa Ba Na thei jeng daok veik sang bac meng harei som tal harei suk. Kayua dom adei njauk nao labaih 10km jalan glai meng dom buôn palei meng tal sang bac. Piah daong palagaih ka dom anek saih, sang bac hu jak ba xã hội hóa, ieu pataom ralo nguồn lực dalam saong langiu tỉnh, padang labik daok piah hu labik mbang, labik ndih ka anek saih daok veik. Dom bilan hajan ribuk, anek saih daok veik 2 adit, gaok mai sa bilan meng nao sang sa mbang. Anak thun bac bahrau 2015-2016, sang bac daok kham merat ramik ngak pasiam dom labik yau sang mbang, duk ndih, duk bac, haong dom kadha karei piah raok anek saih. Ong Phạm Quốc Tuấn, Akaok sang bac Phổ thông Bangsa gam bac gam daok pakat sa Đăk Roong, xã Đăk Roong, huyện Kbang, tỉnh Gia Lai, brei thau: "Piah  caga ka thun bac bahrau, tui số lượng anek saih, blaoh padang labik mbang, labik ndih, labik ma-in ye sang bac hu caga meng akaok bilan 7. Buh jien tame peih prong pasiam taong abih janih. Tal tukvak ini ye khaol dahlak hu ginup taong abih labik piah taduan raok dom adei tame sang bac dalam thun bac bahrau."

Sang bac tiểu học Sơn Lang, dalam xã bhum 3 Sơn Lang, thun bac bahrau ini, hu 100 anek saih bangsa Ba Na gam bac gam daok, meblah jaik 30% anek saih dalam sang bac. Jaik abih dom adei hu rai diuk kan kandah, sang atah sang bac labaih 6 km. Ini lac thun akaok mereip sang bac hu tỉnh Gia Lai brei daong dom adei mbang bac tui diện anek saih bán trú. Yaom lac cơ sở vật chất daok kan kandah, dom urang jakar, dom gru pato di sang bac kham merat kuhria caga saong tal tukvak ini meda lac pabak hu dom kadha piah yam tame thun bac bahrau. Amuk Nguyễn Thị Phượng, Akaok sang bac Tiểu học Sơn Lang, xã Sơn Lang, huyện Kbang, tỉnh Gia Lai, lac: "Caga ka thun bac bahrau 2015-2016, sang bac hu pasiam veik cơ sở vật chất, duk bac, puh ramik veik dom duk, balik mbaih mboh saong pasiam veik sang daok ka anek saih bán trú piah caga ba 100 anek saih mai daok. Sang bac jeng hu caga ginup abih cơ sở vật chất, duk balik bac, saong hu  tuyển dụngmenuac phục vụ, iek glang dom adei daok bán trú."

Thun bac bahrau ini, dalam huyện Kbang hu labaih 15.000 anek saih, tui bac di 53 sang bac meng mầm non tal pakat klau. Lac bhum palei nao mai kan kandah, hu ceik glai saong hu ralo bhap bani bangsa takik, kadung jien di huyện buh tame ka bruk pato megru jeng daok takik, dom thun tapa, pakat ủy, karja dom pakat saong bhap bani dalam huyện kham merat iek glang ka gah pato megru piah dak harei dak paglaong chất lượng pato saong bac. Gam haong nan, dom sarak di raja-ei jeng brei ngak dahlau ka bhum atah bayah, bhum urang bangsa takik jeng patagok hu siam mekre di huyện Kbang. Dalam nan, mô hình sang bac gam bac gam daok nan lac sa điển hình. Thun bac bahrau ini, dalam huyện hu 7 sang bac gam bac gam daok saong 6 sang bac hu anek saoh tui bac diện bán trú, hu jaik 1.600 anek saih hu mbang tui chế độ. Mô hình gam bac gam daok nyu daong khik hu sĩ số di huyện saong chất lượng pato pakai oh padeih patagok. Tal tukvak ini, taong abih dom sang bac dalam huyện hu caga blaoh dom điều kiện ka thun bac 2015-2016. Amuk Hoàng Thị Quế, Phaoak akaok Jabat Pato Megru huyện Kbang, tỉnh Gia Lai, lac: "Ngan haong gah pato megru huyện Kbang ye tal urak ini, meda lac ngak hu  ginup abih dom kadha piah caga ka thun bac bahrau. Labik bac da-a, dom gru pato jang yau anek saih meda lac hu caga ginup abih. Harei 24/8  anek saih pakat dua tame bac, pakat sa saong mầm non tame bac meng harei 31/8, peih ngak njauk tui biên chế thun bac bahrau. "

Yau dom labik karei dalam taneh ia, huyện bhum atah Kbang, tỉnh Gia Lai, palei di Anh hùng Núp hu caga bloh dom kadha ka thun bac bahrau, dalam kham merat di pakat ủy, karja, gah chức năng saong bhap bani aa gauk sangka tal bruk pato megru./.