Lai Hòa lac xã daok kan kandah di ban sit Vĩnh Châu, hu rilo bhap bini Khmer, mikva diuk meng bruk ngak nong saong nao tasik. Nan ye, piah piah nao ngak mbang duah jien, mikva bhian mai iek ruak meng biak aval. Tui Thiếu tá Thái Minh Phong, Akok Bilai Quân dân y Ðồn Biên phòng Lai Hòa, piah iek ruak ka mikva sumu tukvak, mong 6 page yaok harei urang jakar y te di balai hu mbaok piah ngak bruk. Abih di nyu bruk njauk biai nan lac, mikva rilo meng mai tal bilai iek ruak langiu tukvak ngak bruk, nan ye, balai parabha urang jakar y te hu mbaok luac harei melam piah duh siam ka bruk iek glang prein yawa saong ngak siam bruk di urang gru jru ngan saong urang ruak.

“Urang jakar, urang lin di balai ini abih hatai duh ka bruk iek ruak, mikva tame mai ye drei iak ruak, taong ruak, oh caik ka miva cang lavik. Drei pasang iek ruak saong brei jru chip piah ka mikva nao ngak mbang. Mikva taong yaom balai ini biak glong.”

Meng bruk abih hatai di urang gru jru cuk quân hàm xanh saong abih hatai haong urang ruak nan ye padang hu hatai jia di bhap bini. Urak ini, kuhria rah tapa yaok harei balai hu iek ruak saong brei jru ka labaih 30 urang. Y sĩ Kiên Na Riêl urang jakar y te di balai brei thau, adei lac urang Khmer nan ye thau cambaic rai diuk di mikva dalam palei. Rilo mikva oh ndem cambaic sap Viet, tuk urang jakar thau meyai sap Khmer jeng mbuan tacei pato mikva menyum jru, iek glang prein yawa, caga ruak …, nan ye mikva biak sambai. Ini jeng lac bruk pachreih ba gru jru di Balai Quân dân y Ðồn Biên phòng Lai Hòa ngak siam bruk di drei. 

Kayua daok biak atah pasak xã nan ye rilo mikva di dom palei  dalam xã  Vĩnh Tân, yau dom palei Prey Chóp, Prey Chóp A, Prey Chóp B, di xã Lai Hòa jeng mai iek ruak di bilai. Thiếu tá Thái Minh Phong, Akok Balai Quân dân y Ðồn Biên phòng Lai Hòa brei thau, bhap bini di dom jalan tapen tasik di ban sit Vĩnh Châu, tỉnh Sóc Trăng saong mikva di xã jaik taphia di tỉnh Bạc Liêu jeng tapa ini iek ruak. Kuhria rah tapa yaok thun, Balai hu iek ruak saong brei jru ka labaih 10.000 mbang urang ruak. Gam haong nan, balai daok hu pathau khan mikva ka jalan pacang caga dom jit ruak yau: Pandiak dom, tangin - takai- cambuai, pandiak tabiak darah…Abih di nyu lac, urang jakar balai mai tal yaok sang pathau khan ka bruk pacang caga jit Covid-19 ka mikva thau. Meng nan, ba tangin tame haong karja palei pacang caga jit Covid-19 hu siam. Thiếu tá Thái Minh Phong daok brei thau lac:

“Drei pathau khan yaok harei, yau ye brei harak pathau khan ka jit Covid-19, tukvak tapa, jit mboh yau tamuh gilac veik  ye blai ieu mikva juai pataom gauk rilo, cuk pataik pacang mbaok, rao tangin hacih meng jabon, ramik sang danaok hacih sa-at. Pathau khan yaok harei, meyah mikva mboh pandiak glong ye drei jak ba brei daok dalam sang, balai y te nao tal dut iek pandiak dalam rup harei 2 mbang piah pasang iek”

Urak ini, Balai Quân dân y Ðồn Biên phòng Lai Hòa hu 5 urang jakar y te piah duh ka bruk iek ruak. Yaom lac oh ka hu bac si min balai jeng padang hu hatai jia ka bhap bini tuk mai iek ruak. Mboh mikva oh huac kanda jalan atah mai tal balai iek ruak, dom urang lin, dom gru jru tuk halei jeng abih hatai iek ruak, oh lac harei atau melam. Bruk bui sambai di mikva tuk dhit abih ruak lac prein khang pachreih ba dom sa-ai daok veik haong bhum palei, pambuak haong bhap bini, ngak siam bruk hu jao brei.

Jaik 20 thun tapa, Balai Quân dân y Ðồn Biên phòng Lai Hòa, Bol lin Biên phòng Sóc Trăng hu jeng labik jia tame, ba bui sambai ka urang ruak kan kathaot, abih di nyu lac bol bhap Khmer labik taphia negar./.

Urang lang: Ai Nghiem -30/11/2021