Bhap bini di ban raya hu klauk jru pacang caga 

Sa-ai Hải Anh – sa urang ruak ung thư meng Kon Tum tame iak ruak di Sang iek ruak Ung bướu bal raya HCM cơ sở 2, min oh duah hu labik pah daok dalam dom harei cang mek jru, jien ba tui jeng jaik abih. Dalam tuk kan kandah, sa-ai ba tagok nyaom facebook “Daong gauk tuk jit ruak” likau daong. Tok dalam 4 tuk, hu 2 urang dalam nyaom daong sa-ai duah hu labik pah daok saong rilo urang karei payua jien mai daong diuk pasang sa-ai yam tapa dom harei kan kandah di Bei Gon:

“Ini lac sa nyaom biak siam hatai. Hu biak rilo bác sĩ hu mbaok tame. Dom urang nan daong ka drei langyah dom kadha oh ka thau ka ruak kik saong jit  Covid. Langiu di nan dalam nyaom jeng hu rilo menuac daong ngak pahla”.

Nyaom facebook “Daong gauk tuk jit ruak” hu mbaok labaih 200 bác sĩ haong labaih 370.000 urang dalam nyaom, jaik abih dom kadha sua tangi atau panuac likau daong jeng hu langyah saong daong brei chip. Bei Gon dalam dom harei brei daok atah di gauk, oh lac tok hu nyaom facebook “Daong gauk tuk jit ruak” bo daok hu SOSmap.net hu padang tabiak piah klah rabha haong bhap bani. Ini lac sa ứng dụng bản đồ cứu trợ hu dom kỹ sư công nghệ di công ty Xtek ngak tabiak piah pambuak bruk brei thau di urang caong hu daong saong urang caong khin daong. Ứng dụng daok hu daong ka bruk ngak pah hala di dom kapul nyaom dalam bhap bani piah klah di bruk pataom gauk nao daong sa labik, ba tal labik labaih, labik kurang. Hadei di jaik 2 adit tabiak mbaok, urak ini SOSmap taduan hu 2.000 harak likau daong. Dalam tuk manuac urang tut angan brei pandap panda, jien padai oh ka rilo nan ye SOSmap ta-eng drei padang kapul halar hatian, ieu pataom dom labik daong brei saong gaok mai buh jien kadung tabiak piah blei pandap panda, jru cavao payua ka bhap bani. Sa-ai Phạm Thanh Vi – urang  padang SOSmap brei thau:

"Công nghệ nan lac pren khang daong ka drei meda daong hu ka rilo menuac jang. Kapul halar hatian di SOSmap jeng daok biak lapih nan ye khaol dahlak caong khin meda hu rilo jang urang ngak pahla karei gam pandar nền tảng ini piah daong bruk haong gauk”

Lac sa dalam yaok rituh urang taduan hu bruk daong di SOSmap, amuk Trương Thị Liên, sa urang daok dalam sa puk palei kan kathaot di quận Tân Phú khan lac: Dom harei tapa, peih bruk brei daok atah di gauk nan ye amuk oh nao pablei tangeiy hu, oh hu jien mek tame, pandap mbang khik piah jeng oh daok. Amuk iew phon ka tổng đài 1022 min oh ieu hu. Patuah anek amuk duah mboh SOSmap piah likau daong saong hu kapul daong brei hasit pandap panda, kaya mbang piah diuk tapa harei tuk kan kandah ini:

“Biar harei kabroi hu sa urang likei dam mai brei sa kadung brah, 2 pok mì, 1 hộp ikan, 1 pok hadang. Jeng mboh biak uan tabuan, 2 anek amaik ba mai sang rabha gauk mbang”

Jeng lac daong ka bhap bani dalam tuk jit ruak, kapul ngak bruk samar drah PNF hu padang tagok meng 100 urang hu radaih ô tô, radaih bán tải, radaih tải piah ba tangin tame haong bal raya pacang jit. Tuk halei hu bhap bani atau dom jabat caong khin ye kapul ngak bruk samar drah PNF jeng hu mbaok piah pajeng ba brei saoh, hu tuk pajeng pandap panda, njam patam baoh karaoh, kaya mbang tal dom labik pacang veik, tuk pajeng pandap y tế tal dom sang iek ruak, tuk pajeng urang jakar y tế nao pruh jru pametai anek ruak dom labik daok di bhap bani... Sa-ai Phan Ngọc Mẫn – urang pan akaok Kapul ngak bruk samar drah PNF khan lac:  

“Kuhria rah tapa yaok harei khaol dahlak taduan hu 40 tal 50 harak likau daong. Yaok harak takik abih 500kg saong glaong abih tal 20 tấn pandap. Harei halei khaol dahlak jeng nduac. Khaol dahlak caong khin rik hasit pren yava di drei piah daong tame bruk pacang cakak jit ruak di bal raya HCM”)  

Nyaom facebook “Daong gauk tuk jit ruak”, bản đồ cứu trợ SOSmap.net atau Kapul ngak bruk samar drah PNF bahrau lac 3 dalam yaok rituh bruk brei mboh pren khang di bhap bani. Yaok sa nyaom hu dom pren khang karei saong dom urang nan daok patagok pren khang di drei piah ba tangin tame pacang  jit. Dom urang nan, lac dom menuac abih drei daong prein ka karja bal raya HCM di tuk ini./.

Urang lang: Jasi -6/8