Kadha “urang ngak hamu caong thau” harei ini, kol dahlak hu kadha vak di kỷ sư Phan Văn Năm daok ngak bruk di Sở ngak nong saong patagok palei pala ban sit Cần Thơ tacei pato ilamu “njaik rầy, kua ia” dalam pacang caga  rầy nâu, ruak vàng lùn, lùn blik hala di phun padai bhum taneran kraong Cửu Long

       Urak ini, rầy nâu saong ruak vàng lùn, lùn blik hala di phun padai daok lac dom janih jit ruak palai pajoa khang dom labik ngak padai dalam taneh ia dom thun ini mai. Piah pacang caga jit ruak njom mbak, rilo ilamu hu urang ngak nong bhum taneran kraong Cửu Long ba tame ngak saong ba mai kein laba yau: tam drak sa tukvak yau gauk piah njaik rầy, pandar ia piah pacang cakak, khik caga phun padai tuk mboh rầy nyu mai ndam,  ngak tui IPM, tui jalan “3 trun 3 tagok”, pacang caga rầy nâu ngak khut padai meng jalan sinh học… Abih di nyu nan lac, ilamu “njaik rầy, kua ia” dalam pacang caga rầy nâu, ruak vàng lùn, lùn blik hala di phun padai bhum taneran kraong Cửu Long bahrau hu Cục Khjik caga phun pala – Mintri ngak nong saong patagok palei pala pok brei angan lac ilamu bharau. Kol dahlak likau khan brei mikva urang ngak nong thau  6 ilamu piah pala drak.

Ka 1. Vệ sinh mblang hamu, ngak brei samu mbaok hamu saong pok ar piah ba ia tame tabiak hu mbuan lagaih.

Ka 2. Tam drak sa tukvak yau gauk, yaok mbang tam drak oh livik jang 10 harei; tui iek bẫy gom, tuk rầy nâu tame gom biak rilo, brei panuac ka urang ngak nong caga pajaih saong tam drak hadei di nan 2 atau 3 harei.

Ka 3. Tuk vak tam drak oh dui atah jang 2 bilan yaok vụ, tukvak padeih padei di 2 vụ takik di abih 3 adit piah li-ua, pambu taneh saong patrun patakik halak halin meng vụ ini tapa vụ deih.

Ka 4. Pandar sa janih pajaih oh rilo jang 15 tal 20% dom pajaih padai, piah pacang bruk thích nghi di rầy nâu, plaih tamuh tabiak jit rầy nâu.

Ka 5. Meyah gaok kan kandah oh tam drak sa tukvak yau gauk hu, njauk pacang ka phun padai meng bruk ba ia tame tabiak mblang hamu. Abih di nyu nan lac tuk biar harei sup, njauk ba ia tame ka nyu dauk abih jhung padai, bloh mesup ba ia tabiak veik.

Ka 6. Ngak tui jalan  “3 trun 3 tagok”, piah patrun yaom phun jien, patakik ruk kik halak halin, patagok năng suất saong chất lượng, mek hu kein laba, siam mekre ka alam môi trường.

Mikva njauk caik hatai thau lac:  patagok bruk caik bẫy đèn di dom labik pakat huyện (kayua rầy nyu daok rilo tui bhum saong par nao mai dalam labik nan), tui kuhria mboh dahlau ka mbang hu rầy di trú cấp vùng (kayua Pasak khik caga phun pala gah meraong, Cục Khik caga phun pala), pakat tỉnh (kayua Chi cục khik caga phun pala tỉnh, ban) saong Bilai khik caga phun pala huyện tui iek bruk tame gom di huyện saong daong ka karja palei tabiak panuac tacei pato ka harei bilan tam drak./.