Huyện Ninh Phước hu peih bruk ngak iek sangka iek glang, taong ruak ka urang ruak Covid-19 di sang

Dalam 9 xã, ban sit di huyện Ninh Phước, hu tal 8 xã bhian njauk peih bruk taong yaom bruk ngak di drei kayua dom urang klauk jru oh hu yau bruk ba tabiak. Min, hadei di 2 bilan, meng bruk kham marat di abih gah, huyện Ninh Phước hu labaih 80% rahra klauk ginup 2 mbang vắc xin Covid -19. Dom uranaih meng umo 12 tal 17 thun, hu klauk jru vắc xin Covid 19 labaih 82%. Dom xã Phước Hậu, Phước Hữu, Phước Thái, Phước Sơn bhian tamuh dom sruh jit ngan haong yaok rituh urang njom Covid- 19 dalam rahra, urak ini pasang iek hu jit ruak saong abih 4 xã hu taong yaom lac pakat 1, samu haong bhum hijao. Ông Quảng Thúc Đoan, Bí thư Đảng ủy xã Phước Hậu, huyện Ninh Phước brei thau:“Klauk vắc xin lac jalan njauk ngak piah khol drei pasang iek hu jit ruak di dalam xã. Mboh hu bruk ini, khol dahlak tuk halei jeng pato tacei tuk taduan vắc xin mai dalam harei saong khol dahlak brei klauk salah dalam harei, oh caik tapa harei hadei.” 

Ndom ka ilamo jhul samar bruk klauk vắc xin Covid 19 di dalam xã, Ong Huỳnh Ngọc Du, Bí thư Đảng ủy, Akaok UBND xã Phước Thuận, huyện Ninh Phước, lac: “Piah peih praong labik klauk jru, khol dahlak ieu dom urang ngak gah y tế, dom adei saai hu ilamo y tế padieh hưu blaoh di dalam palei. Dom urang jakar y tế dalam dom sang bac, dom mban ngành kapul nyaom hu mbaok tame daong padang ngak harak gar ka bhap bini tuk mai klauk jru.”

Tuk dom urang njom daok tagok glaong, huyện Ninh Phước hu pato pasram, peih bruk ngak iek sangka iek glang, taong ruak ka urang ruak Covid-19 di sang. Ban sit Phước Dân lac labik hu dom urang F0 taong ruak, iek glang di sang rilo abih di huyện Ninh Phước ngan haong 450 urang. Piah hu ginup labik saong taong ruak, pandap panda y tế saong “kadung prein yava iek glang ka F0 di sang”, huyện Ninh Phước hu jak ba rahra rik hu 450 triệu đồng piah blei pabak jru alin ka F0 di sang. Gam haong nan, dom urang dalam kapul y te nao mai bhian tangi sua, pachreih ba dom urang njom ruak Covid-19 tuk halei jeng chreih chrai, bui sambai, samar thit ruak.

Ong Phú Thanh Đông, Akaok bilai y tế ban sit Phước Dân, huyện Ninh Phước, Ninh Thuận biak njauk hatai haong bruk karja pak ini pambuak gauk pacang caga jit: “Mayah khol drei taong ruak F0 di sang bo ta-eng gah y tế ngak ye oh ngak hu. Kayua yau nan ye, bruk pambuak gauk haong dom puk palei lac biak praong. Jit biak rilo, y tế jeng oh ginup menuac nao pasang iek. Khol dahlak jeng hu pato tacei dom khu phố, dom baoh sang ngak habar njauk tanut chuan ye khu phố ngak siam jang. Bruk pabak jru, khol dahlak jeng hu pato tacei ka dom khu phố ba nao tal, manyum yau habar, manyum dom mbang, khol dahlak jeng hu pato tacei biak cambaih laih”.

Tal krieh bilan 12, huyện Ninh Phước hu brei angan lac huyện bhum hijao yaom lac jeng daok 05 xã, ban sit bhum katam - lac pakat 2, lac bhum njom mbiah. Huyện daok taong yaom biak cambaih bruk mbuan njom mbak piah paglaong siam lagaih bruk pacang caga jit COVID-19, dak harei dak palagaih dalam salamat. Dalam nan, piah khik kajap bhum hijao, Ninh Phước daok jhul khang bruk klauk ginup vắc xin ka urang di dalam huyện./.

Urang lang: Thu Thao – 21/12