Kiệu nan lac janih phun pala katut harei, mbuan pala, abih takik phun jien, samar buac pablei saong ba mai kein laba glong. Yaok hecta meyah iek glang siam meda mek hu meng 35 tal 40 tấn. Phun kiệu di angaok darak pasa dalam negar jeng hu pandar rilo nan ye mbuan pablei, yaom glong, bhian hu urang blei rilo di tuk tame tết.

Palih ruah song ngak taneh: Palih taneh limin, pasoh, rilo cuah, mbuan tathuak ia, độ PH meng 6 tal 6,5, yau dom janih taneh meluk cuah, taneh phù sa tapen krong piah pala kiệu nan lac siam di abih. Taneh pala kiệu brei li-ua ka nyu pasoh, ngak hacih hareik, buh ginup khak song chu tapung.

Bilan pala: Phun kiệu meda pala hu luac thun, min hu 2 vụ praong, pala meng bilan 9 tal bilan 1, buac pablei dalam bilan 1, bilan 2. Vụ ni phun tamuh siam nan ye năng xuất glong, pablei di tuk  tame tết, hu yaom. Vụ sit meda pala di bilan 4, bilan 5, buac mek dalam bilan 7, bilan 8.

Kuhria caga akaok pajaih: palih dom akaok prong, nde gauk, oh hu halak ba nao cambu thu ka hala layau bloh kak veik jeng pok tual angaok mejam khik mepiah mbiah tal tuk pala. Dahlau di tuk pala meng neh dom tép tabiak, yaok lubang tok pala sa tép.

Pala: Meda pala jeng talei gar atau patui angaok ro, talei ini atah talei deih meng 20 tal 25cm, phun ni atah phun deih meng 10 tal 12 cm. Njauk caik hatai: Oh lam haluk tame dalam lubang bo tok pakroi sa tal haluk lipih di angaok mbaok ro, bloh mek pong me-om sre  song pruh ginup ia.

Iek glang:  Bhian ngak hacih hareik di angaok mbaok ro, pruh ginup pasah ka kiệu tamuh samar song khang, akaok praong. Langiu di nan, brei buh khak pachreih ka kiệu 2-3 mbang, yaok mbang atah di gauk  meng 12 tal 15 harei, song yaom khak meng 35 tal 40 kg ure lai ia pruh tame gha, pambauk haong bruk ngak hacih hareik.      

Pacang caga halak halin: Yau dom janih phun lisun, kiệu bhian hu jit ruak palai pajoa yau: halak mbang hala bhian mboh dalam tuk bahrau pala, tuk phun kiệu dok meda. Meda pandar dom janih jru halak yau Polytrin, fastac 5EC piah pruh. Ruak bruk akaok bhian tamuh tabiak saong palai pajoa di labik pasah, buh khak oh samu gauk, abih di nyu nan lac buh biak rilo đạm, kurang lân song kali. Meda xử lý akaok pajaih dahlau di tuk pala meng jru pacang bimao Benomyl 50 WP. Tuk mboh yau khin ruak ye pandar Rovral 50 WP, atau Aliette 80 WP lai tame nồng độ 0,3%  piah pruh di angaok mbaok ro. 

Buac mek: Phun kiệu pala meng 3 tal 5 bilan ye buac pablei hu. Dahlau di tuk buac brei tathuak ia ka nyu njom tame  mbaok ro ngak limin taneh mbuan buac. Buac tal halei rao saat kiệu tal nan, kak jeng pok bloh ba nao pablei./.