Pathau mikva saong taong abih gauk! Ikan kan nan lac janih ikan mbuan raong, praong samar, lac janih ikan mbang tạp, pandar hu ralo janih pandap mbang hu mbiah dalam hamu. Mikva meda raong dalam danao sit dom pluh mét vuông tal danao praong yaok rituh mét vuông, raong sa janih iakn kan atau raong haong ikan karei jeng hu. Dalam kadha “urang ngak hamu caong thau” harei ini kol dahlak likau khan dom jalan ngak piah raong ikan kan mek hu kein laba glaong, daa mikva saong taong abih gauk tui pang:

Urang nông: Pathau kĩ sư, khin mek hu kein laba dalam bruk raong ikan, brei palih ruah pajaih ikan yau habar?

Kĩ sư: urak ini pajaih ikan kan hu 2 janih: pajaih lai thường saong pajaih lai trê phi. Ikan kan thường hu sambo kanyik hu 8 bilau mbiuk. Trê phi akaok haluak sit hu meng 9 tal 12 bilau mbiuk, angaok rup hu bingu. Iek tui bruk blei mbang di yaok labik bo palih ruah janih halei piah raong. Ikan kan thường raong meng 6 bilan tagok trak hu meng 450g tal 500g sa drei. Trê phi raong meng 5 tal 6 bilan praong hu meng 1 kg tal 1,2kg sa drei.

Urang nông: pandap mbang saong labik raong yau habar piah ikan hu siam, pablei hu yaom, pathau kĩ sư?

Kĩ sư: ikan kan lai lac janih mbang tạp, min lagaih saong ia hacih. Meyah ia njom nerak ikan kan lai suai praong saong mbuan hu ruak. Kayua yau nan ye urang raong brei khik ia siam saong salih ia gam gam. Palih ruah pandap mbang ka ikan: ikan kan mbang tạp saong takre mbang rilo động vật, langiu di nan meda raong ikan kan meng pandap mbang công nghiệp tui yaok tukvak praong tagok di ikan piah khik ginup đạm brei ka ikan praong tagok. Tuk raong ikan meng pandap mbang công nghiệp, yaom phun glaong jang meng 8 tal 10 ribau đồng sa kg. Yaom lac raong ikan kan hu laba glaong min urak ini ralo baoh sang oh dahan buh jien tame piah raong kayua huac ikan kan mbang ralo oh hu laba gloang. Jalan brei mbang: ikan kan takre mbang tui taphon, nan ye urang raong brei mbang di sa tukvak halei nan yaok harei piah tuk mbang drei halei jeng mbang hu trei samu gauk ka trọng lượng. Meda brei mbang harei sa mbang di tuk meng 18 tuk tal 19 tuk melam. Tuk raong meng 4 tal 6 bilan ikan trak hu meng 500g tal 1,2 kg ye pablei hu, kayua raong gilac ikan nyu suai praong, palai pajoa pandap mbang, patrun kein laba./.

Urang nông: likau ndua dhar phon kĩ sư.